រាជធានីភ្នំពេញ៖ ថ្ងៃព្រហស្បតិ៍ ទី៣០ ខែតុលា ឆ្នាំ២០២៥ លោកជំទាវសាស្ត្រាចារ្យ អ៊ឹម សិទ្ធិការ្យ រដ្ឋលេខាធិការក្រសួងសុខាភិបាល និងជាប្រធានគណៈកម្មការ MPDSR ជាតិ បានអញ្ជើញដឹកនាំកិច្ចប្រជុំស្តីពី ការពង្រឹងប្រសិទ្ធភាពការអនុវត្តការងារពិនិត្យមរណភាពមាតា និងទារក ជុំវិញកំណើតនិងការឆ្លើយតបថ្នាក់ជាតិ និងគណៈកម្មការ MPDSR ថ្នាក់មន្ទីរពេទ្យកាល់ម៉ែត។
គោលបំណងនៃកិច្ចប្រជុំនេះ គឺដើម្បីពង្រឹងប្រសិទ្ធភាពការអនុវត្តការងារ ពិនិត្យមរណភាពមាតា និងទារក ជុំវិញកំណើតនិងការឆ្លើយតប ស្វែងយល់ពីមូលហេតុដែលនាំឱ្យមានការយឺតយ៉ាវទាំង៣ លើកកម្ពស់គុណភាពពាក់ព័ន្ធការយឺតយ៉ាវទាំង៣ និងរៀបចំផែនការលើកកម្ពស់គុណភាពសេវាសម្ពពកាន់តែមានប្រសិទ្ធភាពខ្ពស់។
ជាកិច្ចចាប់ផ្តើម លោកជំទាវសាស្រ្តាចារ្យរដ្ឋលេខាធិការ បានបញ្ជាក់ពីភាពជោគជ័យការងារ MPDSR រួមមាន គណនេយ្យភាព (Accountability) ការទុកចិត្ត ឬការមិនស្តីបន្ទោសគ្នា (No Blame Culture) និងកិច្ចសហការណ៍រវាងបុគ្គលិកសុខាភិបាលទាំងអស់ដែលពាក់ព័ន្ធ (ថ្នាក់ដឹកនាំរបស់មន្ទីរពេទ្យ ផ្នែកសម្ភព ផ្នែកប្រពោធនកម្មទារក ផ្នែកសង្គ្រោះបន្ទាន់ ផ្នែកថ្នាំសណ្តំ និងផ្នែកកែលម្អរគុណភាពរបស់មន្ទីរពេទ្យ)។
ឆ្លៀតក្នុងឱកាសនៃកិច្ចប្រជុំនេះ ឯកឧត្តមសាស្រ្តាចារ្យ កុយ វ៉ាន់នី រដ្ឋលេខាធិការ ទទួលបន្ទុកគុណភាពសេវាមន្ទីរពេទ្យ ក៏បានលើកបង្ហាញពីការគាំទ្រ និងបន្តជំរុញការអនុវត្តន៍ភារៈកិច្ច របស់គណៈកម្មការ MPDSR ជាតិ ដែលបាន និងកំពុងបំពេញកិច្ចការរបស់ខ្លួនយ៉ាងសកម្ម ម៉ត់ចត់ត្រឹមត្រូវ មានការទទួលខុសត្រូវខ្ពស់ក្នុងការវិភាគ លើករណីអសកម្មនានា ជាពិសេសការយឺតយ៉ាវទាំង៣ដំណាក់កាល និងយកមកជាការចងក្រងបណ្តុះបណ្តាលជាបន្តបន្ទាប់។ ទស្សនៈវិជ្ជានៃការងារ MPDSR គឺសែ្វងរកចំណុចអសកម្មនានាជាយថាហេតុ ជាពិសេសការយឺតយ៉ាវទាំង៣ដំណាក់កាល ដោយសំដៅចងក្រងជាបទពិសោធន៍យកមកចៀសវាង (ផលអវិជ្ជមាន ដែលបានកើតមានឡើង) ដែលជាការជួយបច្ចេកទេសពាក់ព័ន្ធ និងវិទ្យាសាស្រ្តការពារសុខភាពមាតា និងទារកជុំវិញកំណើត។
លោកជំទាវសាស្រ្តាចារ្យ ប្រធានអង្គប្រជុំ បានបន្តក្រើនរំលឹកដល់សមាជិក MPDSR ជាតិ ទាំងអស់ អនុវត្តឱ្យបានខ្ជាប់ខ្ជួននូវភារកិច្ច៖ (១) រៀបចំរបាយការណ៍ករណីមរណភាពមាតា និងទារកមក គណៈកម្មការ MPDSR ជាតិ កាន់តែសុក្រឹត ប្រកបដោយគរុកោសល្យ (២) កាន់តែខិតខំស្វែងយល់ពីករណីអសកម្មនានា ជាពិសេសការយឺតយ៉ាវទាំង៣ដំណាក់កាល (៣) ពិនិត្យ និងវិភាគរៀបចំផែនការកែលម្អចំណុចអសកម្មទាំងនោះ (៤) តាមដានការអនុវត្តផែនការប្រកបដោយប្រសិទ្ធភាពខ្ពស់ និង(៥) មន្ទីរពេទ្យជាតិត្រូវបន្តជួយដល់មន្ទីរពេទ្យថ្នាក់ក្រោមជាតិ ដែលជាមន្ទីរពេទ្យសម្ព័ន្ធមេត្រីលើផ្នែកបច្ចេកទេស។
កិច្ចប្រជុំនេះ រៀបចំដោយគណៈកម្មការពិនិត្យមរណភាពមាតា និងទារកជុំវិញកំណើត និងការឆ្លើយតបថ្នាក់ជាតិ ដោយមានការចូលរួមពី ឯកឧត្តមសាស្ត្រាចារ្យ លោកជំទាវសាស្ត្រាចារ្យ លោក លោកស្រីជាគណៈកម្មការជាតិពិនិត្យមរណភាពមាតា និងទារកជុំវិញកំណើត និងការឆ្លើយតបជាតិ គណៈកម្មការមន្ទីរពេទ្យកាល់ម៉ែត និងអង្គការមូលនិធិសហប្រជាជាតិសម្រាប់ប្រជាជន UNFPA សរុបចំនួន ៣៥រូប។
