ខេត្តពោធិ៍សាត់៖ ថ្ងៃព្រហស្បតិ៍ ១១កើត ខែបុស្ស ឆ្នាំរោង ឆស័ក ព.ស.២៥៦៨ ត្រូវនឹងថ្ងៃទី៩ ខែមករាឆ្នាំ២០២៥ ដោយទទួលបានការអនុញ្ញាតដ៏ខ្ពង់ខ្ពស់ពី ឯកឧត្តមសាស្ត្រាចារ្យ ឈាង រ៉ា រដ្ឋមន្ត្រីក្រសួងសុខាភិបាល ព្រមទាំងទទួលបានការណែនាំពី លោកជំទាវវេជ្ជបណ្ឌិត យក់ សម្បត្តិ រដ្ឋលេខាធិការក្រសួងសុខាភិបាល ឯកឧត្ដមវេជ្ជបណ្ឌិត ពាស់ មូស្លីម អនុរដ្ឋលេខាធិការក្រសួងសុខាភិបាល បានចុះទៅពិនិត្យស្ថានភាពមណ្ឌលសុខភាពស្វាយស នៃការិយាល័យស្រុកប្រតិបត្តិក្រគរ ខេត្តពោធិ៍សាត់។
ការចុះពិនិត្យនេះធ្វើឡើងដើម្បីជួយគាំទ្រជំរុញលើកទឹកចិត្ត និងពង្រឹងការផ្តល់សេវាថែទាំ និងព្យាបាលប្រកបដោយប្រសិទ្ធភាពខ្ពស់ ដោយផ្តល់ការណែនាំដល់ថ្នាក់ដឹកនាំ និងបុគ្គលិកមណ្ឌលសុខភាពមានដូចជា៖
-បង្កើនការយកចិត្តទុកដាក់ ការងារអនាម័យ និងភាពស្អាតនៅក្នុង និងក្រៅអគារ
- ការគ្រប់គ្រង ការចែកចាយឱសថ វ៉ាក់សាំង រួមទាំងការបំពាក់សម្ភារៈបរិក្ខារពេទ្យ និងការគ្រប់គ្រងឱសថ
- ខិតខំកត់ត្រាព័ត៌មានអ្នកជំងឺឱ្យបានគ្រប់ជ្រុងជ្រោយ
- ការបំពេញការងារប្រចាំការ និងបម្រើសេវា២៤ម៉ោង/៧ថ្ងៃ/សបា្តហ៍
- ការលើកកម្ពស់គុណភាព សុវត្ថិភាពអ្នកជំងឺ ព្រមទាំងមធ្យោបាយបញ្ជូន និងប្រព័ន្ធទំនាក់ទំនង
- ត្រៀមលក្ខណៈសម្រាប់អន្តរាគមន៍ជួយប្រជាពលរដ្ឋពេលមានគ្រោះអាសន្ន
- ផ្តល់ឱកាសទូលំទូលាយទទួលយកព័ត៌មានត្រឡប់ពីប្រជាពលរដ្ឋ និង
- បង្កើនសកម្មភាពអប់រំសុខភាពនៅតាមសហគមន៍។
នាក្នុងឱកាសនោះ ឯកឧត្ដមវេជ្ជបណ្ឌិតក៏បានពាំនាំនូវការផ្តាំផើ្ញសួរសុខទុក្ខពី ឯកឧត្តមសាស្ត្រាចារ្យរដ្ឋមន្ត្រីក្រសួងសុខាភិបាល ព្រមទាំងថែ្លងអំណរគុណដល់មន្រ្តីសុខាភិបាលទាំងអស់ដែលបានខិតខំបម្រើសេវាថែទាំ និងព្យាបាលអ្នកជំងឺជូនប្រជាពលរដ្ឋនៅក្នុងមូលដ្ឋាន។
សូមបញ្ជាក់ផងដែរថា ការចុះពិនិត្យនេះក៏មានការសហការពី លោកវេជ្ជបណ្ឌិត សៅ ហួ និងលោកអនុបណ្ឌិត សោម វ៉ាន់ស័ក្ត អនុប្រធានមន្ទីរសុខាភិបាលខេត្តពោធិ៍សាត់ផងដែរ។
