រាជធានីភ្នំពេញ៖ នៅព្រឹកថ្ងៃព្រហស្បតិ៍ ៣រោច ខែបុស្ស ឆ្នាំរោង ឆស័ក ព.ស.២៥៦៨ ត្រូវនឹងថ្ងៃទី១៦ ខែមករា ឆ្នាំ២០២៥ ដោយទទួលបានការអនុញ្ញាតដ៏ខ្ពង់ខ្ពស់ពី ឯកឧត្តមសាស្រ្តាចារ្យ ឈាង រ៉ា រដ្ឋមន្រ្តីក្រសួងសុខាភិបាល ឯកឧត្តមសាស្ត្រាចារ្យ កុយ វ៉ាន់នី រដ្ឋលេខាធិការក្រសួងសុខាភិបាល ទទួលបន្ទុកគុណភាពសេវាមន្ទីរពេទ្យ ឯកឧត្តមសាស្ត្រាចារ្យ យីត ស៊ុនណារ៉ា រដ្ឋលេខាធិការក្រសួងសុខាភិបាល និងជាប្រធានក្រុមការងារលើកកម្ពស់គុណភាព បានដឹកនាំកិច្ចប្រជុំគណៈកម្មការរៀបចំសេចក្តីព្រាងលិខិតបទដ្ឋានគតិយុត្ត ស្តីពីការគ្រប់គ្រងសេវាសុខាភិបាល ៖ “ចែករំលែកបទពិសោធន៍ និងពិភាក្សា ស្តីពីប្រព័ន្ធទទួលស្គាល់គុណភាពសេវាសុខាភិបាល”។
គោលបំណងនៃកិច្ចប្រជុំថ្ងៃនេះ ដែលផ្តោតលើការចែករំលែកបទពិសោធន៍ និងការពិភាក្សា ដែលជាធាតុចូលដ៏សំខាន់ដើម្បីឱ្យក្រុមការងារអាចធ្វើការសម្រេចចិត្តទៅលើការរៀបចំបង្កើតប្រព័ន្ធទទួលស្គាល់គុណភាពសេវាសុខាភិបាល (Accreditation System)។
បន្ទាប់ពីបទបង្ហាញ និងការពិភាក្សា ស្តីពីសមិទ្ធិផលកន្លងមករបស់ក្រុមការងារលើកកម្ពស់គុណភាព (QIWG) ដោយសហការណ៍ជាមួយ USAID/EQHA-II/FHI360 ក្នុងការត្រៀមរៀបចំបង្កើតប្រព័ន្ធទទួលស្គាល់គុណភាពសេវាសុខាភិបាល ដែលបានកំណត់នៅក្នុងផែនទីបង្ហាញផ្លូវឆ្ពោះទៅការគ្របដណ្តប់សុខភាពជាសកលនៅកម្ពុជា ឆ្នាំ២០២៤-២០៣៥ រួចមក ឯកឧត្តមសាស្រ្តាចារ្យ កុយ វ៉ាន់នី រដ្ឋលេខាធិការក្រសួងសុខាភិបាល បានស្នើឱ្យតំណាង USAID/EQHA-II/FHI360 ជួយធ្វើការសិក្សាវិភាគបន្ថែមដើម្បីបង្ហាញអំពីអត្ថប្រយោជន៍គំរូទាំងបី (3 Models) នៃប្រព័ន្ធទទួលស្គាល់គុណភាព គឺ ១.លក្ខណៈកាតព្វកិច្ច (Mandatory) ២.លក្ខណៈស្ម័គ្រចិត្ត (Voluntary) និង៣. ចាប់ផ្តើមដំបូងជាលក្ខណៈស្ម័គ្រចិត្ត រួចប្រែជាកាតព្វកិច្ច (Transition from Voluntary to Mandatory) ដើម្បីឱ្យក្រុមការងារអាចសម្រេចជ្រើសរើស និងដាក់ជូនឯកឧត្តមសាស្ត្រាចារ្យ រដ្ឋមន្ត្រីក្រសួងសុខាភិបាល ណែនាំបន្ថែម និងសម្រេច។
