July 15, 2026
រាជធានីភ្នំពេញ៖ ថ្ងៃអង្គារ ទី១៤ ខែកក្កដា ឆ្នាំ២០២៦ លោកជំទាវសាស្ត្រាចារ្យ អុឹម សិទ្ធិការ្យ រដ្ឋលេខាធិការក្រសួងសុខាភិបាល បានដឹកនាំកិច្ចប្រជុំ រវាងក្រសួងសុខាភិបាល តាមប្រព័ន្ធអនឡាញ (Post-WHA Online Meeting) ជាមួយនឹងទីស្នាក់ការកណ្តាលនៃអង្គការសុខភាពពិភពលោក។
ជាកិច្ចចាប់ផ្តើមលោកជំទាវសាស្ត្រាចារ្យ រដ្ឋលេខាធិការ បានវាយតម្លៃខ្ពស់ចំពោះភាពជាដៃគូយ៉ាងរឹងមាំរវាងក្រសួងសុខាភិបាលកម្ពុជា និងអង្គការ WHO ក្នុងការលើកកម្ពស់របៀបវារៈសុខាភិបាលជាតិ។ លោកជំទាវសាស្ត្រាចារ្យ បានគូសបញ្ជាក់ពីការប្រឹងប្រែងរបស់ក្រសួងសុខាភិបាល ដាក់ចេញនូវទិសដៅអាទិភាពសំខាន់ៗចំនួន ៥ រួមមាន៖ ១.ការពង្រឹងគំរូនៃការថែទាំដោយឆ្មប ក្នុងការថែទាំផ្ទៃពោះ(ANC) ថែទាំពេលសម្រាល និងក្រោយសម្រាល រួមទាំងការគ្រប់គ្រងសម្ភពសង្គ្រោះបន្ទាន់ដូចជាការធ្លាក់ឈាមក្រោយសម្រាល និងក្រឡាភ្លើង។ ២.ការលើកកម្ពស់គុណភាពជាប្រចាំដោយការអនុវត្តយន្តការ PDIA។ ៣.ការពង្រីកបណ្តាញសង្គ្រោះបន្ទាន់ផ្នែកសម្ភព និងទារក (EmONC)។ ៤.ការលើកកម្ពស់សុខភាពយុវវ័យ និង៥.សិទ្ធិសុខភាពផ្លូវភេទ និងបន្តពូជ (SRHR)។
មន្ត្រីជំនាញនៃអង្គការសុខភាពពិភពលោក បានបញ្ជាក់អំពីការបន្តកិច្ចសហប្រតិបត្តិការយ៉ាងជិតស្និទ្ធនាពេលអនាគត ដោយផ្តោតសំខាន់ការលើកកម្ពស់សមត្ថភាពឆ្មបក្នុងការអនិវត្តនូវអទិភាពទាំង ៥ ព្រមទាំងការជំរុញការចូលរួមក្នុងការសិក្សាស្រាវជ្រាវដើម្បីជាមេរៀនដកពិសោធន៍ និងសម្រាប់ការពង្រីកនូវការអនុវត្ត។
ជាទីបញ្ចប់ លោកជំទាវសាស្ត្រាចារ្យ បានសង្កត់ធ្ងន់ថា ការយកឈ្នះលើបញ្ហាប្រឈមនានា ទាមទារឱ្យមានការពង្រឹងសមត្ថភាពគ្លីនិក និងការគាំទ្រយ៉ាងរឹងមាំពីដៃគូសកលដូចជាអង្គការ WHO UNFPA ជាដើម។
កិច្ចប្រជុំនេះក៏មានការអញ្ជើញចូលរួមជាកិត្តិយសពីមន្រ្តីជំនាញនៃអង្គការ WHO-HRP (the UNDP/UNFPA/UNICEF/WHO/World Bank Special Programme of Research, Development and Research Training in Human Reproduction) ក្រោមការដឹកនាំរបស់លោកស្រីវេជ្ជបណ្ឌិត Pascale Allotey នៃWHO ទីស្នាក់ការកណ្តាល ព្រមទាំងតំណាងអង្គការ WHO និង UNFPA ប្រចាំកម្ពុជា និងមន្ត្រីជំនាញជាច្រើនរូប។
