វគ្គបណ្តុះបណ្តាលស្តីពី សមភាពយេនឌ័រ និងបរិយាបន្នសង្គម។

July 31, 2026

ខេត្តកំពត៖ ថ្ងៃព្រហស្បតិ៍ ទី៣០ ខែកក្កដា ឆ្នាំ២០២៦ លោកជំទាវវេជ្ជបណ្ឌិត ប៉ែន រិកស៊ី រដ្ឋលេខាធិការ និងជាប្រធានក្រុមការងារបញ្ជ្រាបយេនឌ័រ (GMAG) នៃក្រសួងសុខាភិបាល បានអញ្ជើញជាអធិបតីក្នុងវគ្គបណ្តុះបណ្តាល ស្តីពីសមភាពយេនឌ័រ និងបរិយាបន្នសង្គម (GESI) សម្រាប់នាយកដ្ឋានការពារសុខភាព នាយកដ្ឋានសេវាសុខភាព ការិយាល័យធានាគុណភាពសេវា និងមជ្ឈមណ្ឌលជាតិគាំពារមាតា និងទារក ដែលជាអង្គភាពអនុវត្តគម្រោងលើកកម្ពស់គុណភាព និងសមធម៌សុខាភិបាល ជំហានទី២ (H-EQIP2) នៅសណ្ឋាគារ ខេមរា ខេត្តកំពត។

គោលបំណងនៃវគ្គបណ្ដុះបណ្ដាល៖
១.បំពាក់បំប៉នសិក្ខាកាមមកពីការិយាល័យធានាគុណភាព (QAO) នាយកដ្ឋានសេវាសុខភាព (PMD) និងមជ្ឈមណ្ឌលជាតិគាំពារមាតា និងទារក (MCH) ឱ្យយល់ដឹងកាន់តែច្បាស់អំពីគំនិតវិទ្យាសាស្ត្រស្នូល នៃសមភាពយេនឌ័រនិងបរិយាបន្នសង្គម GESI ព្រមទាំងការអនុវត្តដោយផ្ទាល់ទៅលើអភិបាលកិច្ចសុខាភិបាល ការគ្រប់គ្រងមន្ទីរពេទ្យ ការធានាគុណភាពសេវា និងសេវាសុខភាពមាតា និងទារក។
២.គាំទ្រសិក្ខាកាមក្នុងការពិនិត្យឡើងវិញនូវផែនការសកម្មភាពតាមនាយកដ្ឋាន និងគំនិតផ្តួចផ្តើមដែលគាំទ្រថវិកាដោយគម្រោង H-EQIP2 ដើម្បីកំណត់ថាការប្រតិបត្តិការផែនការបច្ចុប្បន្នបានឆ្លុះបញ្ចាំង ឆ្លើយតប និងជួយជ្រោមជ្រែងដល់គោលដៅ GESI។
៣.កសាងសមត្ថភាពជូនក្រុមការងារបច្ចេកទេស QAO, PMD និង MCH ក្នុងការបញ្ចូលសូចនាករស្នូល ដែលឆ្លើយតបនឹង GESI ទៅក្នុងឧបករណ៍វាយតម្លៃគុណភាព ស្តង់ដារគ្រប់គ្រងមូលដ្ឋានសុខាភិបាល និងបញ្ជីផ្ទៀងផ្ទាត់ការចុះគាំទ្រការងារជាទៀងទាត់។

គួរបញ្ជាក់ផងដែរថា វគ្គបណ្ដុះបណ្ដាលនេះមានសមាសភាពចូលរួមជាគ្រូឧទ្ទេសនាម និងសិក្ខាកាមសរុបចំនួន ២៨រូប (ស្រ្តី១៣ រូប)។