ការចុះគាំទ្រ និងតាមដានវឌ្ឍនភាពនៃការគ្រប់គ្រងជំងឺគ្រុនឈាម និងវគ្គបណ្តុះបណ្តាលស្តីពី «ការ​គ្រប់គ្រង​ ព្យាបាល​ និង​ថែទាំ​ជំងឺគ្រុនឈាម» ជាមួយមន្ទីរពេទ្យ​គន្ធបុប្ផា​ នៅខេត្ត​តាកែវ​។

August 20, 2026

ខេត្ត​តាកែវ​​៖ ថ្ងៃទី១៩​ ខែសីហា ឆ្នាំ២០២៦ ក្រុមការងារតាមដានវឌ្ឍនភាពនៃការគ្រប់គ្រងជំងឺគ្រុនឈាម នៃក្រសួងសុខាភិបាល តាមបណ្តារាជធានី ខេត្ត ដឹកនាំដោយឯកឧត្ដមឱសថការី អ៊ូ វិភព រដ្ឋលេខាធិការ និងឯកឧត្ដម​សាស្ត្រាចារ្យ​រង​ ហេង សុទ្ធី អនុរដ្ឋលេខាធិការ បានអញ្ជើញជាអធិបតី ក្នងពិធីបើកវគ្គបណ្តុះបណ្តាលស្តីពី ការ​គ្រប់គ្រង​ ព្យាបាល​និង​ថែទាំ​ជំងឺគ្រុនឈាម ដើម្បីឆ្លើយតបនឹងការកើនឡើង នៃជំងឺគ្រុនឈាម ដោយសហការជាមួយមន្ទីរពេទ្យ​គន្ធបុប្ផា​។

គោលបំណងសំខាន់នៃវគ្គបណ្ដុះបណ្ដាលនេះគឺ ដើម្បីធ្វើវិក្រឹតការ ចែករំលែកបទពិសោធន៍ ជំនាញបច្ចេកទេស និងវិធានការព្យាបាលថ្មីៗ ដើម្បីធានាបាននូវការធ្វើរោគវិនិច្ឆ័យជំងឺគ្រុនឈាម បានឆាប់រហ័ស ត្រឹមត្រូវ និងការព្យាបាលប្រកបដោយប្រសិទ្ធភាពខ្ពស់។

ព្រឹក​ថ្ងៃ​ទី១៩​ ខែសីហា ឆ្នាំ២០២៦ ថ្នាក់ដឹកនាំទាំងពីររូបបានជួបសំណេះសំណាលក្នុងពិធីបើកបើកវគ្គបណ្តុះបណ្តាល ដោយផ្តល់នូវអនុសាសន៍ដល់សិក្ខាកាមឱ្យយកចិត្តទុកដាក់ក្នុងការរៀនសូត្រពីសាស្រ្តាចារ្យដែលជាអ្នកឯកទេស នៃជំងឺគ្រុនឈាម ក្នុងគោលបំណងពង្រឹងសមត្ថភាពក្នុងការក្លាយជាគ្រូបង្គោល ប្រចាំមន្ទីរពេទ្យរបស់ខ្លួន សម្រាប់ការបណ្តុះបណ្តាលបន្ត ទៅដល់សហការីជាគ្រូពេទ្យ គិលានុបដ្ឋាក នៅពេលបន្តបន្ទាប់ទៀត។

បន្ទាប់ពីពិធីបើកវគ្គរួច ថ្នាក់ដឹកនាំ បានអញ្ជើញចុះអភិបាលពិនិត្យការថែទាំ និងព្យាបាលអ្នកជំងឺគ្រុនឈាម នៅ​មន្ទីរពេទ្យ​បង្អែក​ខេត្ត​តាកែវ​ ​មន្ទីរពេទ្យ​បង្អែក​អង្គរកា​​ និង​ចុះ​តាម​ខ្នង​ផ្ទះ​មេីល​តាម​ពាង​ទឹក​ របស់​អ្នក​ភូមិ​នៅ​ឃុំ​ត្រពាំង​ធំ​ខាង​ត្បូង​ ដោយ​មាន​ការ​ចូល​រួម​ពី​លោក​ស្រី​ មុត​ ប៉ុម​ សមាជិក​ក្រុមប្រឹក្សា​ឃុំ​ និង​ជា​ប្រធាន​ HCMC​ ដេីម្បី​អប់រំ​ពី​ការ​ដាក់​ថ្នាំ​អាបែត​បន្ថែម​ និង​ស្នេី​ឱ្យ​មាន​យុទ្ធនាការ​ធ្វើ​គម្រប​ពាង​ឱ្យ​បាន​គ្រប់​ពាង​ដោយ​សហការ​ជាមួយ​អាជ្ញាធរ​ឃុំ។

រសៀល​ថ្ងៃ​ទី​១៩​ ខែសីហា ឆ្នាំ២០២៦ គណៈប្រតិភូ បានជួបពិភាក្សាការងារជាមួយតំណាងមន្ទីរសុខាភិបាលខេត្ត តំណាងការិយាល័យស្រុកប្រតិបត្តិ និងមន្ទីរពេទ្យនានាទូទាំងខេត្ត ដោយផ្តោតលើ៖
-ការងារគ្រប់គ្រង និងបំបាត់ជម្រកមូសដែលជាភ្នាក់ងារចម្លងជំងឺគ្រុនឈាម។
-ការងារគ្រប់គ្រង បែងចែកអ្នកជំងឺសម្រាកពេទ្យ ជាពិសេសអ្នកជំងឹគ្រុនឈាម ដែលកំពុងតែមានចំនួនច្រើន ឱ្យសមស្រប ប្រកបដោយលក្ខណៈបច្ចេកទេស ដើម្បីការថែទាំ ព្យាបាល និងតាមដានជំងឺប្រកបដោយប្រសិទ្ធភាព គុណភាព និងសុវត្ថិភាព។
-ការងារបញ្ជូនអ្នកជំងឺទៅមន្ទីរពេទ្យ ដែលមានកម្រិតខ្ពស់ជាង ឱ្យទាន់ពេលវេលា តាមបទដ្ឋានបច្ចេកទេស និងប្រកបដោយសុវត្ថិភាព។

សូមបញ្ជាក់ផងដែរថា វគ្គបណ្ដុះបណ្ដាលនេះមានការចូលរួមយ៉ាងយកចិត្តទុកដាក់ពី លោក លោកស្រី ជាវេជ្ជបណ្ឌិត គ្រូពេទ្យព្យាបាល និងគិលានុបដ្ឋាកមកពីគ្រប់មន្ទីរពេទ្យ​សាធារណៈ​ និង​ឯកជន​ នៃខេត្ត​តាកែវ​។