រដ្ឋមន្ត្រីសុខាភិបាល៖ «កិច្ចសហប្រតិបត្តិការដែលកម្ពុជាចង់បាន គឺ «ការអមដំណើរនៅជាមួយគ្នាយូរអង្វែង ជាជាងការផ្ទេរតែបច្ចេកទេសមួយពេល» ដោយមានគោលដៅពង្រឹងសមត្ថភាព និងបង្កើតភាពម្ចាស់ការរបស់ក្រុមគ្រូពេទ្យកម្ពុជា»

October 07, 2026

រាជធានីភ្នំពេញ៖ ល្ងាចថ្ងៃអង្គារ ទី៦ ខែតុលា ឆ្នាំ២០២៦ ឯកឧត្តមសាស្ត្រាចារ្យ ឈាង រ៉ា រដ្ឋមន្ត្រីក្រសួងសុខាភិបាល បានអញ្ជើញចូលរួមពិធីថ្លែងអំណគុណ ចំពោះបេសកកម្មប្តូរតម្រងនោមលើកដំបូងនៅកម្ពុជា ដែលរៀបចំឡើងនៅស្ថានទូតបារាំងប្រចាំកម្ពុជា ដោយមានការចូលរួមពី ឯកឧត្តមឯកអគ្គរដ្ឋទូតបារាំង ក្រុមអ្នកជំនាញនៃ Hospices Civils de Lyon ព្រមទាំងថ្នាក់ដឹកនាំ និងក្រុមគ្រូពេទ្យជំនាញនៃមន្ទីរពេទ្យកាល់ម៉ែត និងភាគីពាក់ព័ន្ធ។

ក្នុងឱកាសនេះ ឯកឧត្តមសាស្ត្រាចារ្យរដ្ឋមន្ត្រី បានសម្តែងនូវការថ្លែងអំណរគុណយ៉ាងជ្រាលជ្រៅចំពោះរដ្ឋាភិបាលបារាំង ស្ថានទូតបារាំង និងក្រុមអ្នកជំនាញនៃ Hospices Civils de Lyon សម្រាប់ការគាំទ្រ ជំនាញ និងបទពិសោធន៍ ក្នុងការជួយអភិវឌ្ឍសមត្ថភាពក្រុមគ្រូពេទ្យកម្ពុជា ឈានទៅការអនុវត្តការប្តូរតម្រងនោមបានជោគជ័យនៅកម្ពុជាស្របតាមស្តង់ដារអន្តរជាតិ។ ឯកឧត្តមសាស្ត្រាចារ្យរដ្ឋមន្ត្រី បានគូសបញ្ជាក់ថា គម្រោងប្តូរតម្រងនោម បានចាប់ផ្តើមតាំងពីឆ្នាំ២០១៩ ប៉ុន្តែត្រូវបានផ្អាកដោយសារជំងឺកូវីដ-១៩ និងបានចាប់ផ្តើមឡើងវិញនៅចុងឆ្នាំ២០២៥ ជាមួយនឹងការបញ្ជូនសមាជិកក្រុមការងារកម្ពុជា ទៅទទួលការបណ្តុះបណ្តាលបន្ថែម និងផ្លាស់ប្តូរបទពិសោធន៍សុីជម្រៅនៅទីក្រុងលីយ៉ុង ប្រទេសបារាំង។

ការប្តូរតម្រងនោម គឺជាការឆ្លើយតបទៅនឹងតម្រូវការសុខភាពសាធារណៈដ៏សំខាន់ សម្រាប់អ្នកជំងឺដែលមានជំងឺខ្សោយតម្រងនោមដំណាក់កាលចុងក្រោយ។ ក្រសួងសុខាភិបាលគាំទ្រកម្មវិធីនេះ ដោយផ្តោតលើក្របខណ្ឌច្បាប់ និងក្រមសីលធម៌វិជ្ជាជីវៈ ការបណ្តុះបណ្តាលធនធានមនុស្ស និងការតាមដានអ្នកជំងឺ ដើម្បីធានាបានគុណភាព និងសុវត្ថិភាពនៃសេវា។ ពិធីនេះបានបង្ហាញពីការបន្តពង្រឹងមិត្តភាព និងកិច្ចសហប្រតិបត្តិការដ៏យូរអង្វែងរវាង កម្ពុជា និងបារាំងក្នុងវិស័យសុខាភិបាល និងជាជំហានសំខាន់មួយក្នុងការអភិវឌ្ឍសេវាវេជ្ជសាស្ត្រឯកទេស និងធនធានមនុស្សសុខាភិបាលនៅកម្ពុជា។