រាជធានីភ្នំពេញ៖ នាព្រឹកថ្ងៃចន្ទ ៨កើត ខែស្រាពណ៍ ឆ្នាំរោង ឆស័ក ព.ស. ២៥៦៨ ត្រូវនឹងថ្ងៃទី១២ ខែសីហា ឆ្នាំ២០២៤ នៅទីស្ដីការក្រសួងសុខាភិបាល ឯកឧត្តមវេជ្ជបណ្ឌិត ស៊ុង វិនតៈ រដ្ឋលេខាធិការ តំណាងដ៏ខ្ពង់ខ្ពស់ ឯកឧត្តមសាស្រ្ដាចារ្យ ឈាង រ៉ា រដ្ឋមន្រ្ដីក្រសួងសុខាភិបាល បានទទួលជួបពិភាក្សាការងារ ជាមួយ Mr.Paul Clements ប្រធានសភាពាណិជ្ជកម្មអន្តរជាតិកម្ពុជា និងក្រុមការងារក្នុងគោលបំណង ស្វែងយល់ និងពិភាក្សាការងារជំរុញកិច្ចសហប្រតិបត្តិការអភិវឌ្ឍវិស័យសុខាភិបាលក្នុងប្រទេសកម្ពុជា ឱ្យស្របទៅតាមអាទិភាព និងគោលនយោបាយរបស់ក្រសួងសុខាភិបាលដែលបានដាក់ចេញ ក៏ដូចជាយុទ្ធសាស្រ្តបញ្ចកោណ ដំណាក់កាលទី១ និងផែនទីបង្ហាញផ្លូវឈានទៅសម្រេចការគ្របដណ្តប់សុខភាពជាសកល។

ក្នុងនាមក្រសួងសុខាភិបាល ឯកឧត្តមរដ្ឋលេខាធិការបានស្វាគមន៍ការចូលរួមរបស់សភាពាណិជ្ជកម្មកម្ពុជា ស្របតាមគោលនយោបាយភាពជាដៃគូរវាងរដ្ឋ-ឯកជន ក្នុងកិច្ចសហប្រតិបត្តិការអភិវឌ្ឍន៍ធនធានមនុស្ស ការធ្វើទំនើបកម្មសម្ភារបរិក្ខារវេជ្ជសាស្ត្រនៅមូលដ្ឋានសុខាភិបាល និងឌីជីថលសុខាភិបាល។ល៕