ខេត្តបាត់ដំបង៖ ថ្ងៃចន្ទ ៥កើត ខែអស្សុជ ឆ្នាំរោង ឆស័ក ព.ស.២៥៦៨ ត្រូវនឹងថ្ងៃទី៧ ខែតុលា ឆ្នាំ២០២៤ ដោយទទួលបានការអនុញ្ញាតដ៏ខ្ពង់ខ្ពស់ពីឯកឧត្តមសាស្ត្រាចារ្យ ឈាង រ៉ា រដ្ឋមន្ត្រីក្រសួងសុខាភិបាល ឯកឧត្តមវេជ្ជបណ្ឌិត ពាស់ មូស្លីម អនុរដ្ឋលេខាធិការក្រសួងសុខាភិបាល បានចូលរួមជាអធិបតីក្នុងឱកាសបើកសិក្ខាសាលា ស្តីពីការងារត្រួតពិនិត្យ ការអនុវត្តល្អក្នុងផលិតកម្មវត្ថុធាតុដើម សម្រាប់ផលិតឱសថ នៅសណ្ឋាគារស្ទឹងសង្កែ ខេត្តបាត់ដំបង ដែលរៀបចំដោយនាយកដ្ឋានឱសថ ចំណីអាហារ បរិក្ខារពេទ្យ និងគ្រឿងសំអាង ដោយមានការគាំទ្របច្ចេកទេសពីអង្គការសុខភាពពិភពលោក (WHO) និងអាជ្ញាធរស្តង់ដាផលិតផលសុខភាពអូស្រ្តាលី (TGA)។ 

សិក្ខាសាលានេះ មានរយៈពេល ៥ថ្ងៃ ដោយចាប់ផ្តើមពីថ្ងៃទី០៧ ដល់ថ្ងៃទី១១ ខែតុលា ឆ្នាំ២០២៤ ដែលមានការចូលរួមពីសមាជិក សមាជិកា គណៈកម្មាធិការត្រួតពិនិត្យ GMP នៃក្រសួងសុខាភិបាល តំណាងអង្គការ WHO និង TGA សរុបចំនួន ២០រូប។ សិក្ខាសាលានេះបានផ្តោតលើការលើកកម្ពស់សមត្ថភាពក្នុងការត្រួតពិនិត្យការអនុវត្តល្អក្នុងផលិតកម្មវត្ថុធាតុដើមសម្រាប់ផលិតឱសថ និងដើម្បីឱ្យមានកិច្ចត្រួតពិនិត្យដែលមានប្រសិទ្ធភាពជាមួយនឹងស្តង់ដាអន្តរជាតិដូចជា WHO និង PIC/S។ 

ឯកឧត្ដមអនុរដ្ឋលេខាធិការ បានជម្រាបជូនពីសារៈសំខាន់ នៃការត្រួតពិនិត្យគុណភាពវត្ថុធាតុដើមសម្រាប់ផលិតឱសថ ដែលជាផ្នែកមួយនៃការធានាសុវត្ថិភាព និងប្រសិទ្ធភាពនៃឱសថ។ សិក្ខាសាលានេះ គឺមានសារៈសំខាន់ណាស់ក្នុងការពង្រឹងសមត្ថភាពដល់ភ្នាក់ងារត្រួតពិនិត្យឱសថ ដើម្បីធានាថាវត្ថុធាតុដើមសម្រាប់ផលិតឱសថ ដែលផលិត និងចែកចាយមានគុណភាពត្រឹមត្រូវ។