Ministry Of Health

ពិធីបើកការដា្ឋនសាងសង់នេះ មានការអញ្ជើញចូលរួមពីសំណាក់ ឯកឧត្តម លោកជំទាវ ឧបនាយករដ្ឋមន្ត្រី ទេសរដ្ឋមន្ត្រី រដ្ឋមន្ត្រី ឯកឧត្តម លោកជំទាវ ជាថ្នាក់ដឹកនាំ និងមន្ត្រីរាជការសុខាភិបាល ទាំងថ្នាក់ជាតិ និងថ្នាក់ក្រោមជាតិ តំណាងអង្គទូតនានា តំណាងក្រសួង ស្ថាប័ននានា និងដៃគូអភិវឌ្ឍន៍ទាំងអស់។

January 15, 2025

រាជធានីភ្នំពេញ៖ នាព្រឹកថ្ងៃចន្ទ ១៤កើត ខែភទ្របទ ឆ្នាំរោង ឆស័ក ព.ស.២៥៦៨ ត្រូវនឹងថ្ងៃទី១៦ ខែកញ្ញា ឆ្នាំ២០២៤ ឯកឧត្តមសាស្ត្រាចារ្យ ឈាង រ៉ា រដ្ឋមន្ត្រីក្រសួងសុខាភិបាល អញ្ជើញចូលរួមក្នុងពិធីបើកការដា្ឋនសាងសង់ អគារមជ្ឈមណ្ឌលកណ្តាល អគារចំណត រោងជាង និងអគារវេជ្ជសាស្រ្តស៊ីក្លូត្រុង នៃមន្ទីរពេទ្យកាល់ម៉ែត ដែលប្រព្រឹត្តទៅក្រោមអធិបតីភាពដ៏ខ្ពង់ខ្ពស់បំផុតរបស់ សម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តីនៃព្រះរាជាណាចក្រកម្ពុជា។

អគារទាំងបីខាងលើនេះ នឹងចូលរួមចំណែកក្នុងការលើកកម្ពស់សុខភាព និងសុខុមាលភាពដោយធានាបានការថែទាំ និងព្យាបាលជូនប្រជាពលរដ្ឋ សម្រាប់បង្កើនសមត្ថភាពមន្ទីរពេទ្យក្នុងការទទួលពិនិត្យព្យាបាលអ្នកជំងឺ និងបង្កើនសមត្ថភាពបច្ចេកទេសតាមជំនាញឯកទេសនីមួយៗ ប្រកបដោយនវានុវត្តន៍ រួមទាំងចំណតដែលអាចផ្ទុកទោចក្រយានយន្ត ចំនួន ៤៦៥គ្រឿង និងរថយន្តចំនួន ៥៤៦គ្រឿង។

អគារថ្មីនេះនឹងត្រូវបំពាក់ដោយសម្ភារ ឧបករណ៍ពេទ្យ ដែលមានលក្ខណៈទំនើប និងមានហេដ្ឋារចនាសម្ព័ន្ធសំណង់ទាន់សម័យ ស្របតាមស្តង់ដាអន្តរជាតិ ហើយគ្រោងដាក់ឱ្យប្រើប្រាស់ ជាអគារពហុមុខងារ ពិសេស សម្រាប់ពហុឯកទេសពាក់ពន្ធ័ ដូចជាសមត្ថភាពធ្វើរោគវិនិច្ឆ័យ និងការព្យាបាលបែបកម្រឹតស្មុគស្មាញករណីជំងឺមហារីក ជំងឺមិនឆ្លងរ៉ាំរ៉ៃ ដែលមានផលលំបាកផ្សេងៗ សំដៅឆ្លើយតបបានទៅនឹងការវិវត្តនៃតម្រូវការថែទាំសុខភាពរបស់ប្រជាជនកម្ពុជា ។

សមិទ្ធផលជាតិថ្មី បន្ថែមមួយទៀត ដ៏ទំនើបឈានមុខនេះ នឹងជួយជំរុញឱ្យកម្ពុជា អភិវឌ្ឍវិស័យសុខាភិបាលឈានដល់កម្រិតស្តង់ដាតំបន់ និង អន្តរជាតិមួយចំណែកបន្ថែមទៀត។ ក្នុងនោះដែរ ក្រោមការយកចិត្តទុកដាក់របស់រាជរដ្ឋាភិបាល ការកែលម្អហេដ្ឋារចនាសម្ព័ន្ធរូបវ័ន្ត ការបំពាក់ឧបករណ៍វេជ្ជសាស្ត្រទំនើបៗបច្ចេកវិទ្យាចុងក្រោយ ការបណ្តុះបណ្តាលធនធានមនុស្សកម្រឹតជំនាញ ការជ្រើសរើស និងការពង្រាយគ្រូពេទ្យបុគ្គលិកបច្ចេកទេស ការផ្គត់ផ្គង់ឱសថសារវ័ន្ត នៅតាមមណ្ឌលសុខភាព និងមន្ទីរពេទ្យបង្អែកស្រុក ខេត្ត បាន និងកំពុងដើម្បីអនុវត្ត ជាបន្តបន្ទាប់សំដៅបន្តពង្រឹងសមត្ថភាពផ្តល់សេវាប្រកបដោយគុណភាព ជូនអ្នកជំងឺ និងក្រុមគ្រួសារ និងសំដៅពង្រីកបន្ថែមការគ្របដណ្តប់នៃកម្មវិធីមូលនិធិសមធម៌សុខាភិបាល ដល់គ្រួសារងាយរងគ្រោះ និងក្រុមគោលដៅក្នុងសេដ្ឋកិច្ចក្រៅប្រព័ន្ធ របបសន្តិសុខសង្គមផ្នែកថែទាំសុខភាព(ប.ស.ស)ដល់សមាជិកគ្រួសារ និងអ្នកនៅក្នុងបន្ទុកសមាជិក ប.ស.ស. និងប្រជាជនជនស្វ័យនិយោជឈរលើគោលការណ៍ស្ម័គ្រចិត្ត ព្រមទាំងកម្មវិធីជំនួយសង្គមផ្សេងៗទៀត ជូនប្រជាជនគោលដៅ។

ពិធីបើកការដា្ឋនសាងសង់នេះ មានការអញ្ជើញចូលរួមពីសំណាក់ ឯកឧត្តម លោកជំទាវ ឧបនាយករដ្ឋមន្ត្រី ទេសរដ្ឋមន្ត្រី រដ្ឋមន្ត្រី ឯកឧត្តម លោកជំទាវ ជាថ្នាក់ដឹកនាំ និងមន្ត្រីរាជការសុខាភិបាល ទាំងថ្នាក់ជាតិ និងថ្នាក់ក្រោមជាតិ តំណាងអង្គទូតនានា តំណាងក្រសួង ស្ថាប័ននានា និងដៃគូអភិវឌ្ឍន៍ទាំងអស់។