រាជធានីភ្នំពេញ៖ ព្រឹកថ្ងៃចន្ទ ទី១៨ ខែឧសភា ឆ្នាំ២០២៦ ឯកឧត្តមសាស្ត្រាចារ្យរង ហេង សុទ្ធី អនុរដ្ឋលេខាធិការក្រសួងសុខាភិបាល បានអញ្ជើញជាអធិបតីភាព ក្នុងពិធីបើកវគ្គបណ្តុះបណ្តាលគ្រូបង្គោល ស្តីពីការផ្ដល់ប្រឹក្សាជាមូលដ្ឋានសម្រាប់ការពន្យល់លទ្ធផលតេស្ត អេច ភី វី នៅសណ្ឋាគារកាំបូឌីយ៉ាណា។
វគ្គបណ្តុះបណ្តាលនេះ រៀបចំឡើងក្នុងគោលបំណងរួម ដើម្បីលើកកម្ពស់ការពិនិត្យរកវីរុស HPV និងការថែទាំដំណាក់កាលមុនមហារីកដែលផ្តោតលើអ្នកជំងឺ តាមរយៈការពង្រឹងសមត្ថភាពបុគ្គលិកសុខាភិបាល នៅសហគមន៍ និងតាមមូលដ្ឋានសុខាភិបាល ក្នុងការគាំទ្រផ្នែកចិត្តសាស្ត្រមូលដ្ឋាន ការប្រឹក្សាយោបល់ប្រកបដោយប្រសិទ្ធភាព ព្រមទាំងគាំទ្រសម្រាប់ការតាមដាន និងការថែទាំជាប់ជាបន្ត នៅក្នុងប្រព័ន្ធបង្ការជំងឺមហារីកមាត់ស្បូន។
កម្មវិធីបណ្តុះបណ្តាលនេះមាន ៧ម៉ូឌុល ផ្តោតលើការគាំទ្រផ្នែកចិត្តសាស្ត្រជាមូលដ្ឋាន ការផ្តល់ប្រឹក្សា និងការផ្សាភ្ជាប់ជាមួយប្រព័ន្ធក្នុងការថែទាំអ្នកផ្ទុកវីរុស HPV។
សូមជម្រាបជូនថាវគ្គបណ្តុះបណ្តាលនេះមានការអញ្ជើញចូលរួមពី ឯកឧត្តម លោកជំទាវ សាស្ត្រាចារ្យ ជាគ្រូបង្គោលថ្នាក់ជាតិ មន្ត្រីមកពីនាយកដ្ឋានការពារសុខភាព ដែលមានការគាំទ្រថវិកាដោយអង្គការសុខភាពពិភពលោក និងបណ្តុះបណ្តាលជំនាញបច្ចេកទេសដោយ អង្គការ Jhpiego សរុបចំនួន ៣៥រូប។
