admin

ខេត្តបន្ទាយមានជ័យ៖ នារសៀលថ្ងៃអាទិត្យ ១១កើត ខែស្រាពណ៍ ឆ្នាំថោះ បញ្ចស័ក ព.ស.២៥៦៧ ត្រូវនឹងថ្ងៃទី២៧ ខែសីហា ឆ្នាំ២០២៣ ឯកឧត្តមសាស្រ្តាចារ្យ ឈាង រ៉ា រដ្ឋមន្រ្តីក្រសួងសុខាភិបាល រួមជាមួយ ឯកឧត្តម អ៊ុ រាត្រី អភិបាលនៃគណៈអភិបាលខេត្តបន្ទាយមានជ័យ និងប្រតិភូក្រសួងសុខាភិបាល បានអញ្ជើញចុះពិនិត្យការផ្តល់សេវាសុខភាពជូនប្រជាពលរដ្ឋ និងពិនិត្យហេដ្ឋារចនាសម្ព័ន្ធមូលដ្ឋានសាធារណៈសុខាភិបាល នៅមន្ទីរពេទ្យបង្អែកខេត្ត មិត្តភាពកម្ពុជា-ជប៉ុន មង្គលបុរី និងមន្ទីរពេទ្យបង្អែកស្រុកព្រះនេត្រព្រះ ក្នុងគោលបំណងពិនិត្យវឌ្ឍនភាពវិស័យសុខាភិបាល រួមទាំងបញ្ហាប្រឈមនានា ដើម្បីជំរុញសេវាថែទាំសុខភាពនៅក្នុងខេត្ដនេះ ឱ្យកាន់តែធានាបាននូវគុណភាព សុវត្ថិភាព ប្រសិទ្ធភាព ស័ក្តិសិទ្ធភាព និងសមធម៌ ដើម្បីឆ្លើយតបទៅនឹងយុទ្ធសាស្រ្តបញ្ចកោណ ដំណាក់កាលទី១ របស់រាជរដ្ឋាភិបាលអណត្តិទី៧ ជំរុញបង្ខិតសេវាថែទាំសុខភាព ឱ្យបានកាន់តែគៀកប្រជាពលរដ្ឋ។

ក្នុងថ្ងៃដដែលនេះ ឯកឧត្តមសាស្រ្តាចារ្យរដ្ឋមន្រ្តី និងឯកឧត្តមក្រុមប្រឹក្សាខេត្ត ព្រមទាំងឯកឧត្តមអភិបាលនៃគណ:អភិបាលខេត្ត ក៏បានអញ្ជើញជួបសំណេះសំណាល និងពាំនាំការសួរសុខទុក្ខពីសំណាក់ ឯកឧត្តមកិត្តិទេសាភិបាលបណ្ឌិត ហ៊ុន ម៉ាណែត នាយករដ្ឋមន្រ្តីនៃព្រះរាជាណាចក្រកម្ពុជា ដល់ថ្នាក់ដឹកនាំ មន្រ្តីរាជការ បុគ្គលិកសុខាភិបាលខេត្តបន្ទាយមានជ័យ នៅសាលាខេត្តបន្ទាយមានជ័យ។ ឯកឧត្តមសាស្ដ្រាចារ្យរដ្ឋមន្រ្តី ក៏បានផ្តល់អនុសាសន៍គន្លឹះសំខាន់ៗ ក្នុងការប្រតិបត្តិឱ្យទទួលបានជោគជ័យ និងថ្លែងអំណរគុណ ព្រមទាំងកោតសរសើរដល់មន្ដ្រីសុខាភិបាលគ្រប់លំដាប់ថ្នាក់ ដែលបានខិតខំបំពេញការងារបម្រើសេវាសុខភាពជូនប្រជាពលរដ្ឋប្រកបដោយស្មារតីទទួលខុសត្រូវ និងក្រមសីលធម៌វិជ្ជាជីវ:ខ្ពស់។
ជាចុងក្រោយ ឯកឧត្តមសាស្រ្តាចារ្យរដ្ឋមន្រ្តី មានសង្ឃឹមយ៉ាងមុតមាំថា ដោយមានសហការគាំទ្រពីអាជ្ញាធរមូលដ្ឋាន មន្រ្តីសុខាភិបាល នឹងចូលរួមអនុវត្តគោលនយោបាយយុទ្ធសាស្រ្តបញ្ចកោណរបស់រាជរដ្ឋាភិបាលអាណត្តិទី៧នេះ ឱ្យទទួលបានជោគជ័យ។

ក្នុងដំណើរទស្សនកិច្ចនេះ ក៏មានការអញ្ជើញចូលរួមអមដំណើរដោយ ឯកឧត្តម លោកជំទាវ រដ្ឋលេខាធិការក្រសួងសុខាភិបាល ឯកឧត្តមទីប្រឹក្សាឯកឧត្តមកិត្តិទេសាភិបាលបណ្ឌិត ហ៊ុន ម៉ាណែត នាយករដ្ឋមន្រ្តីនៃព្រះរាជាណាចក្រកម្ពុជា និងជាអគ្គនាយករងមន្ទីរពេទ្យកាល់ម៉ែត ក្រុមប្រឹក្សាខេត្តបន្ទាយមានជ័យ អភិបាលនៃគណ:អភិបាលខេត្តបន្ទាយមានជ័យ អគ្គនាយកបច្ចេកទេសសុខាភិបាល និងលោក លោកស្រី ប្រធានមន្ទីរសុខាភិបាលនៃរដ្ឋបាលខេត្តបន្ទាយមានជ័យ និងក្រុមការងារបច្ចេកទេស ព្រមទាំងអាជ្ញាធរមូលដ្ឋានគ្រប់លំដាប់ថ្នាក់។

ខេត្តពោធិ៍សាត់៖ នាថ្ងៃសៅរ៍ ១០កើត ខែស្រាពណ៍ ឆ្នាំថោះ បញ្ចស័ក ព.ស.២៥៦៧ ត្រូវនឹងថ្ងៃទី២៦ ខែសីហា ឆ្នាំ២០២៣ ឯកឧត្តមសាស្រ្តាចារ្យ ឈាង រ៉ា រដ្ឋមន្រ្តីក្រសួងសុខាភិបាល ដឹកនាំប្រតិភូក្រសួង និងក្រុមការងារបច្ចេកទេសក្រសួងសុខាភិបាល បានបន្តអញ្ជើញចុះពិនិត្យការផ្តល់សេវាសុខភាពជូនប្រជាពលរដ្ឋ និងពិនិត្យហេដ្ឋារចនាសម្ព័ន្ធមូលដ្ឋានសាធារណៈសុខាភិបាល រូមមានមណ្ឌលសុខភាពសំរោង មន្ទីរពេទ្យបង្អែកស្រុកភ្នំក្រវ៉ាញ និងមន្ទីរពេទ្យបង្អែកខេត្តពោធិ៍សាត់ ក្នុងគោលបំណងពិនិត្យវឌ្ឍនភាពវិស័យសុខាភិបាល រួមទាំងបញ្ហាប្រឈមនានា ដេីម្បីជំរុញសេវាថែទាំសុខភាពនៅក្នុងខេត្ដនេះ ឱ្យកាន់តែធានាបាននូវគុណភាព សុវត្ថិភាព ប្រសិទ្ធភាព ស័ក្តិសិទ្ធភាព និងសមធម៌ ដើម្បីឆ្លើយតបទៅនឹងយុទ្ធសាស្រ្តបញ្ចកោណ ដំណាក់កាលទី១ របស់រាជរដ្ឋាភិបាលអណត្តិទី៧ ជំរុញបង្ខិតសេវាថែទាំសុខភាព ឱ្យបានកាន់តែគៀកប្រជាពលរដ្ឋ។

ក្នុងឱកាសនោះដែរ ឯកឧត្តមសាស្រ្តាចារ្យរដ្ឋមន្រ្តី បានអញ្ជើញចុះពិនិត្យមណ្ឌលសុខភាពសំរោង ដែលជាមណ្ឌលសុខភាពជាប់ចំណាត់ថ្នាក់លេខ១ ទូទាំងខេត្តពោធិ៍សាត់ នឹងជាបេក្ខភាពត្រៀមប្រឡងអង្គភាពផ្តល់សេវាសាធារណៈគំរូនៅក្នុងវិស័យសុខាភិបាលពីគណ:កម្មការវាយតម្លៃអង្គភាពផ្តល់សេវាសាធារណ:ថ្នាក់ជាតិ ដេីម្បីសិក្សាស្វែងយល់ពីការរៀបចំ ហេដ្ឋារចនាសម្ព័ន្ធ និងដំណេីរ ការប្រេីប្រាស់ សេវាសុខភាពសាធារណៈ ក្នុងគោលបំណងពង្រឹង និងពង្រីកមូលដ្ឋានសាធារណៈ ជូនប្រជាពលរដ្ឋប្រកបដោយគុណភាព និងសុវត្ថិភាព។

ជាចុងក្រោយ ឯកឧត្តមសាស្ដ្រាចារ្យរដ្ឋមន្រ្តី បានថ្លែងអំណរគុណ និងកោតសរសើរដល់មន្ដ្រីសុខាភិបាលគ្រប់លំដាប់ថ្នាក់ ដែលបានខិតខំបំពេញការងារបម្រើសេវាសុខភាពជូនប្រជាពលរដ្ឋប្រកបដោយស្មារតីទទួលខុសត្រូវ និងក្រមសីលធម៌វិជ្ជាជីវ:ខ្ពស់។

ក្នុងដំណើរទស្សនកិច្ចនេះ ក៏មានការអញ្ជើញចូលរួមអមដំណើរដោយ ឯកឧត្តម លោកជំទាវ រដ្ឋលេខាធិការក្រសួងសុខាភិបាល អគ្គនាយកបច្ចេកទេសសុខាភិបាល អភិបាលរងនៃគណ:អភិបាល ខេត្តពោធិ៍សាត់ និងលោកអភិបាលនៃគណៈអភិបាលស្រុកភ្នំក្រវ៉ាញ ប្រធានមន្ទីរសុខាភិបាល នៃរដ្ឋបាលខេត្តពោធិ៍សាត់ និងក្រុមការងារបច្ចេកទេស ព្រមទាំងអាជ្ញាធរមូលដ្ឋានគ្រប់លំដាប់ថ្នាក់។

ខេត្តកំពង់ឆ្នាំង៖ នៅព្រឹកថ្ងៃសុក្រ ៩កើត ខែស្រាពណ៍ ឆ្នាំថោះ បញ្ចស័ក ព.ស.២៥៦៧ ត្រូវនឹងថ្ងៃទី២៤ ខែសីហា ឆ្នាំ២០២៣ ឯកឧត្តមសាស្រ្តាចារ្យ ឈាង រ៉ា រដ្ឋមន្រ្តីក្រសួងសុខាភិបាល បានដឹកនាំប្រតិភូក្រសួង និងក្រុមការងារបច្ចេកទេសក្រសួងសុខាភិបាល អញ្ជើញចុះពិនិត្យការផ្តល់សេវាសុខាភិបាលសាធារណៈជូនប្រជាពលរដ្ឋ និងពិនិត្យហេដ្ឋារចនាសម្ព័ន្ធសុខាភិបាល នៅមន្ទីរពេទ្យបង្អែកកំពង់ត្រឡាច មណ្ឌលសុខភាពសាលាលេខប្រាំ មណ្ឌលសុខភាពតាជេស និងមន្ទីរពេទ្យបង្អែកខេត្តកំពង់ឆ្នាំង ដើម្បីពិនិត្យលទ្ធភាព ជម្រុញសេវាថែទាំសុខភាពឱ្យកាន់តែខិតជិតប្រជាពលរដ្ឋ ប្រកបដោយគុណភាព សុវត្ថិភាព ប្រសិទ្ធភាព ស័ក្តិសិទ្ធភាព និងសមធម៌។

នារសៀលថ្ងៃដដែល ឯកឧត្តមសាស្រ្តាចារ្យរដ្ឋមន្រ្តីក្រសួងសុខាភិបាល បានអញ្ជើញជួបសំណេះសំណាល និងសួរសុខទុក្ខ ថ្នាក់ដឹកនាំ និងមន្រ្តីរាជការ នៃមន្ទីរសុខាភិបាលនៃរដ្ឋបាលខេត្តកំពង់ឆ្នាំង ដែលរៀបចំឡើងនៅមន្ទីរសុខាភិបាលនៃរដ្ឋបាលខេត្តកំពង់ឆ្នាំង។ ក្នុងឱកាសនោះដែរ ឯកឧត្តមសាស្រ្តាចារ្យរដ្ឋមន្រ្តី បានសំដែងនូវការអរគុណ និងកោតសរសើរ ដល់ថា្នក់ដឹកនាំ និងមន្រ្តីរាជការ បុគ្គលិកសុខាភិបាល ជាពិសេសក្នុងអំឡុងពេលនៃការឆ្លងរាតត្បាតនៃជំងឺកូវីដ-១៩ និងការធានាបាននូវនិរន្តរ៍ភាពនៃការផ្តល់សេវាសុខាភិបាលជាសារវ័ន្ត។ ឯកឧត្តម សាស្រ្តាចារ្យ រដ្ឋមន្រ្តី ក៏បាន ជម្រុញ និងលេីកទឹកចិត្ត ថា្នក់ដឹកនាំ មន្រ្តីរាជការ និងបុគ្គលិកសុខាភិបាល ក្នុងការធានាឱ្យការផ្តល់សេវាថែទាំសុខភាពជូនប្រជាពលរដ្ឋនៅក្នុងមូលដ្ឋានរបស់ខ្លួន ដោយជម្រុញលេីកកម្ពស់គុណភាព សុវត្ថិភាព ប្រសិទ្ធភាព ស័ក្តិសិទ្ធភាព និងសមធម៌ ឱ្យកាន់តែល្អប្រសេីរឡេីង និងគ្រ ប់ជ្រុងជ្រោយថែមទៀត។

ក្នុងដំណើរទស្សនកិច្ចនេះ ក៏មានការអញ្ជើញចូលរួមអមដំណើរដោយ ឯកឧត្តម លោកជំទាវ រដ្ឋលេខាធិការក្រសួងសុខាភិបាល អភិបាលរងនៃគណ:អភិបាលខេត្តកំពង់ឆ្នាំង អគ្គនាយកបច្ចេកទេសសុខាភិបាល និងក្រុមការងារបច្ចេកទេស ព្រមទាំងប្រធានមន្ទីរសុខាភិបាល នៃរដ្ឋបាលខេត្តកំពង់ឆ្នាំងផងដែរ។

ប្រឡងជ្រើសរើសបេក្ខជនចូលបម្រើការងារក្នុងក្របខណ្ឌសុខាភិបាលសម្រាប់ឆ្នាំ២០២២

បង្កាន់ដៃទទួលពាក្យសម្រាប់ មន្ត្រីរាជការ Application Form-For-Official

បង្កាន់ដៃទទួលពាក្យសម្រាប់ និស្សិត Application Form-For-Student

(ញូដេលី)៖​ ការចូលរួមប្រយុទ្ធប្រឆាំងឱសថក្លែងក្លាយនិងអន់គុណភាព​ និងប្រេីប្រាស់បច្ចេកវិទ្យាវេជ្ជសាស្ត្រ​ត្រឹមត្រូវ​ ដេីម្បីឆ្ពោះទៅរកសុខភាពជាសាកល​ និងពង្រឹងការផ្តល់សេវាសុខាភិបាលប្រកបដោយប្រសិទ្ធិភាពខ្ពស់នៅតំបន់អាស៊ី​៖

នាថ្ងៃុពុធ​ ៣រោច ខែអស្សុជ ឆ្នាំកុរ ព.ស.២៥៦៣ ត្រូវនឹងថ្ងៃទី១៦​ ខែតុលា ឆ្នាំ២០១៩ លោកជំទាវវេជ្ជបណ្ឌិត ឱ វណ្ណឌីន រដ្ឋលេខាធិការក្រសួងសុខាភិបាល និងជាអ្នកនាំពាក្យក្រសួងសុខាភិបាល​នៃព្រះរាជាណាចក្រកម្ពុជា បានដឹកនាំគណៈប្រតិភូក្រសួងសុខាភិបាល អញ្ជើញចូលរួមកិច្ចប្រជុំអន្តរជាតិស្តីអំពី​ “Asia Health 2019” នៅទីក្រុងញូដេលី​(New Delhi) ប្រទេសឥណ្ឌា​ ដែលមានអ្នកចូលរួមជាថ្នាក់ដឹកនាំ មន្ត្រីជំនាញ សាស្ត្រាចារ្យ អ្នកស្រាវជ្រាវវិទ្យាសាស្ត្រសុខភាព ក្រុមហ៊ុនឱសថ​និងបរិក្ខាពេទ្យ​ មន្ទីរពេទ្យឯកជននៅឥណ្ឌា​ និងធុរកិច្ចឯកជនអន្តរជាតិផ្នែកបច្ចេកវិទ្យាវេជ្ជសាស្ត្រ​ សរុបចំនួនប្រមាណ១៧០នាក់។

ក្នុងពេលស្នាក់នៅ​ និងបំពេញបេសកកម្មដែលមានរយៈពេលពីថ្ងៃទី១៦​ ដល់ទី១៩​ ខែតុលា ឆ្នាំ២០១៩ លោកជំទាវវេជ្ជបណ្ឌិត ឱ វណ្ណឌីន រដ្ឋលេខាធិការក្រសួងសុខាភិបាល បានទទួលនូវការស្នេីសុំពីអង្គប្រជុំផ្តល់ជាកិត្តិយសអញ្ជេីញថ្លែងសន្ទរកថាគន្លឹះនៅក្នុងពិធីបេីកកិច្ចប្រជុំ​ “ASIA Health 2019” រួមជាមួយឯកឧត្តមវេជ្ជបណ្ឌិត​ ហាស​ វ៉ាដហាន់​ (H.E. Dr. Harsh Vardhan, Honorable Minister of Health and Family Welfare) រដ្ឋមន្ត្រីក្រសួងសុខាភិបាលនិងសុខមាលភាពគ្រួសារនៃសាធារណ:រដ្ឋឥណ្ឌា​។ ក្នុងសន្ទរកថាដ៏មានខ្លឹមសារនេះ​ លោកជំទាវបានលេីកឡេីងពីការរយកចិត្តទុកដាក់ខ្ពស់បំផុតរបស់សម្តេចអគ្គមហាសេនាបតីតេជោ​ ហ៊ុន​ សែន​ នាយករដ្ឋមន្ត្រីនៃព្រះរាជាណាចក្រកម្ពុជាលើសុខភាពប្រជាជនកម្ពុជាទូទៅ​ និងបានគោរពថ្លែងអំណរគុណយ៉ាងជ្រាលជ្រៅដោយមិនអាចបំភ្លេចបានជូនចំពោះសម្តេចតេជោនាយករដ្ឋមន្ត្រី​ ក្នុងការសង្គ្រោះនិងកសាងប្រទេសកម្ពុជាជាពិសេសការជួយគាំទ្ររបស់សម្តេចលេីការកសាងវិស័យសុខាភិបាលតាំងពីបាតដៃទទេ​ ព្រមទាំងការរក្សាបាននូវសុខសន្តិភាព​ ស្ថេរភាព​នយោបាយ និងការអភិវឌ្ឍន៌ប្រទេសបានរីកចម្រេីនដូចសព្វថ្ងៃនេះ។ លោកជំទាវ​ បានលើកពីកិច្ចខិតខំប្រឹងប្រែងក្នុងវិស័យសុខាភិបាល​ ក្នុងការអភិវឌ្ឍហិដ្ឋារចនាសម្ព័ន្ធរូបវ័ន្ត​ និងបណ្តុះបណ្តាលធនធានមនុស្ស​ ដេីម្បីផ្តល់សេវាសុខភាពជូនប្រជាជនកម្ពុជា​ កិច្ចខិតខំប្រយុទ្ធនឹងជំងឺឆ្លង​ផងនិងឆ្លេីយតបបញ្ហាជំងឺមិនឆ្លងផង​ ព្រមទាំងការអនុវត្តន៌គោលនយោបាយគាំពារសុខភាពសង្គម​ឈ្ពោះទៅរកសុខភាពជាសាកល​ និងបានស្នើសុំឲ្យមានកិច្ចសហការ-សហប្រតិបត្តិការបន្ថែមទៀតពីក្រសួងសុខាភិបាលឥណ្ឌានិងពីដៃគូសុខាភិបាលទាំងរដ្ឋនិងឯកជន​នៅឥណ្ឌានេះ លេីផ្នែកបច្ចេកវិទ្យាពេទ្យ​ ព្រមទាំងការបណ្តុះបណ្តាលសម្រាប់ការអភិវឌ្ឍធនធានមនុស្សលេីបច្ចេកវិទ្យាពិនិត្យនិងព្យាបាលជំងឺ​ផងដែរ។

ទន្ទឹមនឹងនោះ​ លោកជំទាវរដ្ឋលេខាធិការ​ បានជម្រាបជូនអង្គប្រជុំបន្ថែមថា៖​ គំនិតផ្តួចផ្តេីមដ៏ខ្ពង់ខ្ពស់របស់សម្តេចតេជោ​នាយករដ្ឋមន្ត្រីកម្ពុជា​ លេីការប្រយុទ្ធប្រឆាំងឱសថក្លែងក្លាយនិងអន់គុណភាព​ ដែលសម្តេចបានថ្លែងសន្ទរកថាបេីកកិច្ចប្រជុំថ្នាក់មហាអនុតំបន់ទន្លេមេកុងនាខែវិឆ្ឆិកា​ ឆ្នាំ២០១៨​ កន្លងទៅ​ បានក្លាយទៅជាប្រធានបទវិប្បស្សនានៃកិច្ចប្រជុំលេីកទី១៤​ រដ្ឋមន្ត្រីសុខាភិបាលអាស៊ាន​ នាខែសីហា​ ឆ្នាំ២០១៩​ ហេីយរដ្ឋមន្ត្រីសុខាភិបាលអាស៊ានទាំង១០​ បានគាំទ្រគំនិតផ្តួចផ្តេីមរបស់សម្តេចតេជោទាំងស្រុង​ ដោយបានឯកភាពគ្នាចេញសេចក្តីប្រកាសរួម​និងបានដាក់បញ្ចូលប្រធានបទប្រយុទ្ធប្រឆាំងឱសថក្លែងក្លាយនិងអន់គុណភាពក្នុងសេចក្តីប្រកាសរួមនេះ​ ដោយគូសបញ្ជាក់ពីការប្តេជ្ញាចិត្តរួមគ្នាក្នុងការប្រយុទ្ធប្រឆាំងឱសថក្លែងក្លាយនិងអន់គុណភាពក្នុងតំបន់និងក្នុងប្រទេស​។ លោកជំទាវរដ្ឋលេខាអិការ​ បានជម្រាបនិងស្វាគមន៌ដល់ភ្ញៀវអន្តជាតិទាំងអស់អញ្ជេីញចូលរួមវេទិកាអន្តរជាតិអាស៊ី-អឺរ៉ុប​ ស្តីពីការប្រយុទ្ធប្រឆាំងឱសថក្លែងក្លាយនិងអន់គុណភាព​ នៅពាក់កណ្តាលឆ្នាំ២០២០​ នៅខេត្តសៀមរាប​ ប្រទេសកម្ពុជា​ ដែលលទ្ធផលបានពីវេទិកាដ៏មានសារសំខាន់នេះ​ នឹងដាក់បញ្ចូលទៅក្នុងកិច្ចប្រជុំ​កំពូលអាស៊ី-អឺរ៉ុបលេីកទី១៣​ (13th ASIA-Europe Summit) ដែលនឹងត្រូវរៀបចំដឹកនាំកិច្ចប្រជុំដោយសម្តេចតេជោនាយករដ្ឋមន្ត្រីកម្ពុជា​ នាឆ្នាំ២០២០ខាងមុខនេះ។ លេីសពីនេះ​ លោកជំទាវរដ្ឋលេខាធិការក្រសួងសុខាភិបាល​ បានអំពាវនាវឲ្យមានការខិតខំរួមគ្នាក្នុងការប្រយុទ្ធប្រឆាំងឱសថក្លែងក្លាយនិងអន់គុណភាព​ ដេីម្បីឆ្ពោះទៅរកសុខភាពជាសាកលនិងពង្រឹងការផ្តល់សេវាប្រកបដោយប្រសិទ្ធិភាពនៅតំបន់អាស៊ី​យេីងនេះ ជាពិសេសសុំឲ្យមានការចូលរួមយ៉ាងសកម្មពីវិស័យឯកជនដែលធ្វេីធុរកិច្ចផ្នែកឱសថនិងសម្ភារ:បរិក្ខាពេទ្យនៃប្រទេសឥណ្ឌា​ លេីកិច្ចការដ៏សំខាន់នេះផងដែរ។

គួរកត់សម្គាល់ថា នៅក្នុងបទអន្តរាគមន៍ថ្លែងនៅក្នុងកិច្ចប្រជុំដ៏មានសារសំខាន់ខាងលើនេះ លោកជំទាវរដ្ឋលេខាធិការបានបង្ហាញពីស្ថានភាពនៃបន្ទុកជំងឺមិនឆ្លងនៅកម្ពុជា និងកិច្ចខិតខំប្រឹងប្រែងអនុវត្តផែនការយុទ្ធសាស្ត្រសុខាភិបាលជាតិ ​២០១៦-២០២០​ និងផែនការសកម្មភាពពហុវិស័យជាតិ ស្តីពីការការពារនិងការប្រយុទ្ធនឹងជំងឺ មិនឆ្លង ឆ្នាំ២០១៨-២០២៧ របស់ក្រសួងសុខាភិបាល​ផងដែរ​ និងបានលេីកឡេីងថា​ វិស័យសុខាភិបាល ជាវិស័យមួយដែលសម្រេចបាននូវគោលដៅអភិវឌ្ឍន៍សហស្សវត្ស ដែលបានដាក់ចេញដោយរាជរដ្ឋាភិបាលកម្ពុជា និងនៅថ្នាក់សកល (MDGs 4, 5 and 6) មុនកាលកំណត់​ ក្រោមការដឹកនាំរបស់ឯកឧត្តមសាស្ត្រាចារ្យ ម៉ម ប៊ុនហេង រដ្ឋមន្ត្រីក្រសួងសុខាភិបាល និងមន្រ្តីក្រោមឱវាទទាំងអស់។ លោកជំទាវរដ្ឋលេខាធិការ ក៏បានវាយតម្លៃខ្ពស់លើការអភិវឌ្ឍន៍និងទំនាក់ទំនងល្អរវាង ឥណ្ឌានិងកម្ពុជា ក្រោមកិច្ចសហប្រតិបត្តិការ ក្នុងវិស័យ​ ដែលផ្តល់អត្ថប្រយោជន៍ជាក់ស្តែងជូនដល់ប្រជាជននៃប្រទេសទាំងពីរ ជាពិសេសលើការកសាងធនធានមនុស្ស និងបច្ចេកវិទ្យាសុខាភិបាល។ លោកជំទាវរដ្ឋលេខាធិការនិងគណៈប្រតិភូ ក៏បានពិនិត្យមេីលនិងស្វែងយល់បន្ថែមទៀតនូវបច្ចេកវិទ្យាវេជ្ជសាស្ត្រទំនេីបពីការតាំងពិព័ណសម្ភារ:បរិក្ខាពេទ្យនានានៅឯកិច្ចប្រជុំខាងលេីនេះផងដែរ។

ព័ត៌មានទទួលបានពីគណ:ប្រតិភូនៅទីក្រុងញូដេលីនៃប្រទេសឥណ្ឌា។

ថ្លែងនៅក្នុងសន្និសីទសារព័ត៌មាន ស្តីពីប្រទេសកម្ពុជាបានសម្រេចគោលដៅជាតិ និងតំបន់ប៉ាស៊ីហ្វិកខាងលិចក្នុងការប្រយុទ្ធនឹងជំងឺរលាកថ្លើមប្រភេទបេ លើកុមារ នៅទីស្តីការក្រសួងសុខាភិបាល នារសៀលថ្ងៃសុក្រ ១០ រោច ខែជេស្ឋ ឆ្នាំច សំរឺទ្ធិស័ក ព.ស. ២៥៦២ ត្រូវនឹងថ្ថ្ងៃទី០៨ ខែមិថុនា ឆ្នាំ២០១៨ ឯកឧត្តមសាស្រ្តាចារ្យ ម៉ម ប៊ុនហេង រដ្ឋមន្រ្តីក្រសួងសុខាភិបាល (ដោយមានការចូលរួមពីសំនាក់លោកវេជ្ជបណ្ឌិត Liu Yunguo តំណាងអង្គការសុខភាពពិភពលោក ប្រចាំនៅកម្ពុជា និងលោកស្រី Natascha Paddison នាយិការងអង្គការយូនីសេហ្វ ប្រចាំនៅកម្ពុជា លោកជំទាវវេជ្ជបណ្ឌិត ឱ វណ្ណឌីន អគ្គនាយកបច្ចេកទេសសុខាភិបាល លោកស្រីសាស្ត្រាចារ្យ ទុង រដ្ឋាវី ប្រធានមជ្ឍមណ្ឌលជាតិគាំពារមាតានិងទារក និងឯកឧត្តម លោកជំទាវជាថ្នាក់ដឹកនាំក្រសួងសុខាភិបាល មន្ត្រី បុគ្គលិកសុខាភិបាល ព្រមទាំងដៃគូអភិវឌ្ឍសុខាភិបាល) បានប្រកាសថា “​ប្រទេសកម្ពុជា ត្រូវបានអង្គការសុខភាពពិភពលោក ទទួលស្គាល់ថាជាប្រទេសបានសម្រេច គោលដៅជាតិ និងតំបន់ប៉ាស៊ីហ្វិកខាងលិចក្នុងការប្រយុទ្ធនឹងជំងឺរលាកថ្លើមប្រភេទបេ លើកុមារ’ ដែលសមិទ្ធិផលដ៏គួរឲ្យមោទនៈនេះ គឺបានមកពីការគាំទ្រសព្វបែបយ៉ាង និងការយកចិត្តទុកដាក់ខ្ពស់លើសុខភាពមាតា ទារកនិងកុមារ ព្រមទាំងប្រជាជនទូទៅ របស់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា និងសម្តេចកិត្តិព្រឹទ្ធបណ្ឌិត ប៊ុនរ៉ានី ហ៊ុនសែន។ ឯកឧត្តមរដ្ឋមន្ត្រី ក៏បានបន្តទៀតថា ៖ នៅមុនឆ្នាំ២០០៥ មុនពេលបញ្ចូលវ៉ាក់សាំងការពារជំងឺរលាកថ្លើមប្រភេទបេ ទៅក្នុងកម្មវិធី ផ្តល់ថ្នាំបង្ការនៅកម្ពុជាមានការឆ្លងរាលដាលជំងឺរលាកថ្លើមប្រភេទបេ ជាច្រើន។ តាមការប៉ាន់ស្មាន របស់អង្គការសុខភាពពិភពលោក និងតាមការអង្កេតជាច្រើនបានបង្ហាញថា អត្រាផ្ទុកវីរុសរលាកថ្លើម ប្រភេទបេ ក្នុងចំណោមប្រជាជនទូទៅមានប្រមាណចន្លោះពី៥% ទៅ ១០%។
នៅឆ្នាំ២០០៦ ការអង្កេតមួយធ្វើឡើងដោយវិទ្យាស្ថានជាតិសុខភាពសាធារណៈ កម្មវិធីជាតិផ្តល់ថ្នាំបង្ការ និងមានការគាំទ្រដោយអង្គការសុខភាពពិភពលោក និងអង្គការ PATH នៅទូទាំង ប្រទេសទៅលើកុមារអាយុក្រោម៥ឆ្នាំ។ លទ្ធផលបានបង្ហាញថា ប្រេវ៉ាឡង់នៃជំងឺរលាកថ្លើមប្រភេទបេ លើកុមារមាន ៣.៥%។ នៅឆ្នាំ២០១១ ការអង្កេតមួយបានធ្វើឡើងដោយសាកលវិទ្យាល័យវិទ្យាសាស្ត្រសុខាភិបាល និងគាំទ្រដោយអង្គការសុខភាពពិភពលោក ទៅលើកុមារអាយុ៥ឆ្នាំ នៅក្នុងរាជធានីភ្នំពេញ-ខេត្ត ក្រចេះ និងរតនគីរី។ លទ្ធផលបានបង្ហាញថា ប្រេវ៉ាឡង់នៃជំងឺរលាកថ្លើមប្រភេទបេលើកុមារមានភាពខុសប្លែកគ្នាទៅតាមរាជធានី-ខេត្ត ដោយនៅរាជធានីភ្នំពេញប្រេវ៉ាឡង់នៃជំងឺរលាកថ្លើមប្រភេទបេ លើកុមារមានត្រឹមតែ ០.៣៣% នៅខេត្តក្រចេះមាន ១.៤១% និងនៅខេត្តរតនគីរី មានរហូតដល់ ៣.៤៥%។

ក្រោមការដឹកនាំដ៏ឈ្លាសវៃ និងប្រកបដោយគតិបណ្ឌិតរបស់ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា ប្រទេសកម្ពុជាបានប្រឹងប្រែងយ៉ាងខ្លាំងក្នុងការកាត់បន្ថយការចម្លងវីរុសរលាកថ្លើមប្រភេទបេ តាមរយៈការបញ្ចូលវ៉ាក់សាំងការពារជំងឺរលាកថ្លើមប្រភេទបេ ទៅក្នុងកម្មវិធីជាតិផ្តល់ថ្នាំបង្ការនៅទូទាំងប្រទេសនាឆ្នាំ២០០៥។ ចាប់ពីពេលនោះមក វ៉ាក់សាំងការពារជំងឺរលាកថ្លើមប្រភេទបេ ត្រូវបានផ្តល់ដល់ទារកចាប់ពីពេលកើត (ក្នុងអំឡុងពេល២៤ម៉ោង) និងផ្តល់ជាបន្តបន្ទាប់ចំនួន៣ដូសបន្ថែមទៀត នៅពេលទារកមានអាយុ ៦ សប្តាហ៍ ១០សប្តាហ៍ និង១៤សប្តាហ៍។ ការផ្តល់ថ្នាំបង្ការជំងឺដល់ទារក និងកុមារ ជាសកម្មភាពអទិភាពចម្បងដែលមន្ត្រី បុគ្គលិកសុខាភិបាលទាំងអស់គ្រប់ជាន់ថ្នាក់អនុវត្តយ៉ាងសកម្មដោយមានការគាំទ្រពីអង្គការដៃគូអភិវឌ្ឍន៍ និងមានការចូលរួមពីសហគមន៍ និងអជ្ញាធរមូលដ្ឋាន។ ជាលទ្ធផល អត្រាគ្របដណ្តប់នៃការផ្តល់ថ្នាំបង្ការជំងឺរលាកថ្លើមប្រភេទបេ មានការកើនឡើងគួរឱ្យកត់សំគាល់ ដោយអត្រាគ្របដណ្តប់នៃការផ្តល់ថ្នាំបង្ការនៅពេល២៤ម៉ោង ក្រោយកើតកើនពី២៤% នៅឆ្នាំ២០០៥ ដល់ ៧១% នៅឆ្នាំ២០១០ និង៨៤% នៅឆ្នាំ២០១៧។ ឯអត្រាគ្របដណ្តប់នៃការផ្តល់ថ្នាំបង្ការ៣ដូសទៀត កើនពី៨៣% នៅឆ្នាំ២០០៥ ដល់៩២% នៅឆ្នាំ២០១០ និង៩៨% នៅឆ្នាំ២០១៧។

ផ្អែកតាមលទ្ធផលនេះ អង្គការសុខភាពពិភពលោកបានស្នើឱ្យមានការអង្កេតស្រាវជ្រាវម្តងទៀត ដើម្បីវាយតម្លៃប្រេវ៉ាឡង់ជំងឺរលាកថ្លើមប្រភេទបេលើកុមារនៅកម្ពុជា ធៀបទៅនឹងគោលដៅ តំបន់របស់អង្គការសុខភាពពិភពលោក ដែលបានកំណត់កាត់បន្ថយប្រេវ៉ាឡង់ជំងឺរលាកថ្លើមប្រភេទ បេ ក្នុងចំណោមកុមារឱ្យនៅតិចជាង១% នៅឆ្នាំ២០១៧។ ការអង្កេតត្រូវបានធ្វើឡើងដោយសាកល វិទ្យាល័យហ៊ីរ៉ូស៊ីម៉ា អង្គការសុខភាពពិភពលោក US-CDC និងសាកលវិទ្យាល័យវិទ្យាសាស្ត្រសុខាភិបាល។ ជាលទ្ធផល ប្រេវ៉ាឡង់ជំងឺរលាកថ្លើមប្រភេទបេ លើកុមារមានត្រឹមតែ ០.៥៦% ប៉ុណ្ណោះ។
លទ្ធផលដែលបានពីការអង្កេតនេះ ត្រូវបានពិនិត្យដោយក្រុមការងារវាយតម្លៃឯករាជ្យមួយ (Regional Independent Verification Panel) ដឹកនាំដោយលោកវេជ្ជបណ្ឌិត John Ward នាយកកម្មវិធីលុបបំបាត់ជំងឺរលាកថ្លើមដោយវីរុស/ក្រុមការងារសុខភាពសកល លោកវេជ្ជបណ្ឌិត Jong-Hyun Kim សាស្ត្រាចារ្យនៅសាកលវិទ្យាល័យកាតូលិកកូរ៉េ និងលោកវេជ្ជបណ្ឌិត Mark Kane ទីប្រឹក្សាបច្ចេកទេសផ្នែកវ៉ាក់សាំងរបស់អង្គការសុខភាពពិភពលោក។
ក្រុមការងារវាយតម្លៃនេះបានធ្វើការសន្និដ្ឋានថា ប្រទេសកម្ពុជាបានសម្រេចគោលដៅជាតិ និងគោលដៅតំបន់ប៉ាស៊ីហ្វិកខាងលិច ក្នុងការប្រយុទ្ធនឹងជំងឺរលាកថ្លើមប្រភេទបេ លើកុមារ។
ខ្ញុំសូមថ្លែងអំណរគុណយ៉ាងជ្រាលជ្រៅជាទីបំផុតជូនចំពោះ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា និងសម្តេចកិតិ្តព្រឹទ្ធបណ្ឌិត ប៊ុន រ៉ានី ហ៊ុនសែន ដែលតែងតែផ្តល់នូវការគាំទ្រសព្វបែបយ៉ាងលើសុខភាពមាតា ទារក និងកុមារ ជាពិសេស និងដល់ប្រជាជនកម្ពុជាទូទៅ និយាយជារួម ដែលធ្វើឲ្យក្រសួងសុខាភិបាលអាចសម្រេចបាននូវសមិទ្ធផលជាច្រើន។ ជាក់ស្តែងថ្ងៃនេះ កម្ពុជាទទួលបាននូវការបញ្ជាក់ពីអង្គការសុខភាពពិភពលោកថា ប្រទេសកម្ពុជាបានសម្រេចតាមគោលដៅប្រយុទ្ធនឹងជំងឺរលាកថ្លើមប្រភេទបេ នៅឆ្នាំ២០១៧នេះ ជាសក្ខីភាពជាក់ស្តែង។
ខ្ញុំក៏សូមថ្លែងអំណរគុណដល់ថ្នាក់ដឹកនាំ មន្ត្រី បុគ្គលិកសុខាភិបាលគ្រប់ជាន់ថ្នាក់ ព្រមទាំងអាជ្ញាធរមូលដ្ឋាន ស្ថាប័នពាក់ព័ន្ធ និងដៃគូអភិវឌ្ឍសុខាភិបាលទាំងអស់ ដែលបានខិតខំធ្វើសកម្មភាព និងផ្តល់ការគាំទ្រលើកម្មវិធីជាតិផ្តល់ថ្នាំបង្ការ ដែលធ្វើឲ្យប្រេសកម្ពុជាសម្រេចបាននូវសមិទ្ធផលនាថ្ងៃនេះ។
ខ្ញុំសូមថ្លែងអំណរគុណជាអនេកដល់មាតា បិតា និងអាណាព្យាបាលទាំងអស់ ដែលបាននាំបុត្រា បុត្រី មកទទួលថ្នាំបង្ការជំងឺរលាកថ្លើមប្រភេទបេ។ ខ្ញុំសូមជំរុញឲ្យមាតា បិតា និងអាណាព្យាបាលទាំងអស់បន្តនាំកូន ចៅមកទទួលថ្នាំបង្ការបន្តទៀតឲ្យបានគ្រប់មុខទៅតាមកម្មវិធីថ្នាក់ជាតិ។

ភ្ជាប់មកជាមួយនេះ នូវសេចក្តីប្រកាសព័ត៌មានស្តីពីប្រទេសកម្ពុជាបានសម្រេចគោលដៅជាតិ និងតំបន់ប៉ាស៊ីហ្វិកខាងលិចក្នុងការប្រយុទ្ធនឹងជំងឺរលាកថ្លើមប្រភេទបេ លើកុមារ របស់ក្រសួងសុខាភិបាលជាភាសាខ្មែរនិងផាសាអង់គ្លេស។

ព័ត៌មានទទួលបានពីអ្នកនាំពាក្យក្រសួងសុខាភិបាលនៃព្រះរាជាណាចក្រកម្ពុជា។

កាលពីថ្ងៃអង្គារ ៣រោច ខែចេត្រ ឆ្នាំរកា នព្វស័ក ព.ស ២៥៦១ ត្រូវនឹងថ្ងៃទី០៣ ខែមេសា ឆ្នាំ ២០១៨ មន្ទីរសុខាភិបាលខេត្តក្រចេះ បានប្រារពពិធីបើកសន្និបាតបូកសរុបការងារសុខាភិបាលខេត្តឆ្នាំ២០១៧ ក្រោមអធិបតីភាពឯកឧត្តម តែ គុយស៊ាង រដ្ធលេខាធិការក្រសួងសុខាភិបាល ដោយមានការអញ្ជើញចូលរួមពីសំណាក់អភិបាល អភិបាលរងក្រុង ស្រុក ប្រធាន អនុប្រធានមន្ទីរអង្គភាពជុំវិញខេត្ត ក្រុមប្រឹក្សាសង្កាត់ តំណាងដៃគូអភិវឌ្ឍ និងថ្នាក់ដឹកនាំ មន្ត្រីរាជការ បុគ្គលិកសុខាភិបាលទូទាំងខេត្តក្រចេះ សរុបចំនួន២៣២នាក់ ។
ក្នុងឱកាសនោះ គណ:អធិបតីក៏បានផ្តល់ប័ណ្ឌសរសើរជូនដល់មន្ត្រីសុខាភិបាលដែលបានខិតខំបំពេញការងារក្នុងឆ្នាំកន្លងមក ចំនួន ១៥០នាក់ផងដែរ។