រាជធានីភ្នំពេញ៖ នាព្រឹកថ្ងៃចន្ទ ១០កើត ខែស្រាពណ៍ ឆ្នាំម្សាញ់ សប្តស័ក ព.ស.២៥៦៩ ត្រូវនឹងថ្ងៃទី៤ ខែសីហា ឆ្នាំ២០២៥ លោកជំទាវវេជ្ជបណ្ឌិត យក់ សម្បត្តិ រដ្ឋលេខាធិការក្រសួងសុខាភិបាល និងជានាយកគម្រោងលើកកម្ពស់គុណភាព និងសមធម៌សុខាភិបាល ដំណាក់កាលទី២ (H-EQIP 2) បានដឹកនាំកិច្ចប្រជុំពិភាក្សាលើកទី៣ ដើម្បីពិនិត្យ និងវាយតម្លៃសម្រេច អំពីវីដេអូគំនូរមានចលនា (Video Animation) ទាក់ទងនឹងជំងឺមិនឆ្លង នៃគម្រោង H-EQIP 2 ។
គោលបំណង នៃកិច្ចប្រជុំគឺ ដើម្បីពិនិត្យ និងវាយតម្លៃទៅលើផលិតផលចុងក្រោយ (Final Product) របស់ក្រុមហ៊ុនទទួលអនុវត្តការងារផលិតវីដេអូទាក់ទងនឹងជំងឺមិនឆ្លង រួមមានជំងឺទឹកនោមផ្អែម ជំងឺឡើងសម្ពាធឈាម និងជំងឺមហារីកមាត់ស្បូន។
ជារួមការវាយតម្លៃឃើញថា លទ្ធផលទទួលបានទៅតាមការគ្រោងទុក។ ក្នុងនេះដែរ លោកជំទាវនាយកគម្រោង ក៏បានផ្តល់អនុសាសន៍ណែនាំ សូមក្រុមការងារនៃនាយកដ្ឋានការពារសុខភាព និងមជ្ឈមណ្ឌលជាតិលើកកំពស់សុខភាព បន្តសហការជាមួយក្រុមហ៊ុនបន្ថែមទៀត ដើម្បីឱ្យវីដេអូកាន់តែមានលក្ខណៈប្រសើរឡើង និងគ្រប់ជ្រុងជ្រោយថែមទៀត។
កិច្ចប្រជុំនេះ មានការអញ្ជើញចូលរួមពី លោកអគ្គនាយករងរដ្ឋបាល និងហិរញ្ញវត្ថុ លោកស្រីអគ្គនាយករងបច្ចេកទេសសុខាភិបាល លោកអនុប្រធាននាយកដ្ឋានការពារសុខភាព លោកស្រីអនុប្រធានមជ្ឈមណ្ឌលជាតិលើកកំពស់សុខភាព និងលោក លោកស្រី តំណាងនាយកដ្ឋានការពារសុខភាព នៃក្រសួងសុខាភិបាល និងក្រុមហ៊ុនទីប្រឹក្សាផ្តល់សេវាកម្ម។
