រាជធានីភ្នំពេញ៖ ថ្ងៃសុក្រ ៦កើត ទី ២៩ ខែសីហា ឆ្នាំ២០២៥ លោកជំទាវសាស្ត្រាចារ្យ អ៊ឹម សិទ្ធិការ្យ រដ្ឋលេខាធិការក្រសួងសុខាភិបាល និងជាប្រធានគណៈកម្មការថ្នាក់ជាតិ ពិនិត្យមរណភាពមាតា និងទារកជុំវិញកំណើត និងការឆ្លើយតប បានអញ្ជើញជាអធិបតីភាព ក្នុងពិធីបិទវគ្គបណ្តុះបណ្តាល ស្តីពីការពិនិត្យមរណភាពមាតា និងទារកជុំវិញកំណើត និងការឆ្លើយតបសម្រាប់ថ្នាក់ខេត្ត។
តាមរយៈរបាយការណ៍ នៃវគ្គបណ្តុះបណ្តាលនេះ បង្ហាញថាសិក្ខាកាម ដែលអញ្ជើញមកពីមន្ទីរសុខាភិបាល និងមន្ទីរពេទ្យខេត្តទាំង៥ បានខិតខំ និងចូលរួមយ៉ាងសកម្ម រហូតទទួលបានលទ្ធផលល្អប្រសើរជាទីពេញចិត្ត។ ជាក់ស្តែងលទ្ធផលនៃការវាស់ស្ទង់សមត្ថភាពមុន និងក្រោយការសិក្សាបង្ហាញពីលទ្ធផលល្អគួរជាទីកត់សម្គាល់ ពីពិន្ទុមធ្យម ៦៧% (មុនការសិក្សា) រហូតដល់ ៩៧% (ក្រោយការសិក្សា)។
ក្នុងពិធីបិទវគ្គបណ្តុះបណ្តាលនេះ លោកជំទាវសាស្ត្រាចារ្យ បានផ្តល់នូវអនុសាសន៍ដល់ថ្នាក់ដឹកនាំមន្ទីរសុខាភិបាលខេត្ត ថ្នាក់ដឹកនាំមូលដ្ឋានសុខាភិបាល និងសិក្ខាកាមសំខាន់ៗមួយចំនួនរួមមាន៖ (១) ត្រូវរៀបចំគណកម្មការ MPDSR ថ្នាក់ខេត្ត ថ្នាក់មន្ទីរពេទ្យខេត្ត និងថ្នាក់មន្ទីរពេទ្យស្រុក ដោយអនុលោមតាមពិសារជាតិស្តីពីការពិនិត្យមរណភាពមាតា និងទារកជុំវិញកំណើត និងការឆ្លើយតប (២) ត្រូវយកចំណេះដឹងដែលបានពីសិក្ខាសាលានេះ ទៅបណ្តុះបណ្តាលបន្តដល់បុគ្គលិករបស់ខ្លួន (៣) ពង្រឹងការពិនិត្យរាល់ករណីមរណភាពមាតា និងទារកជុំវិញកំនើតដោយប្រើប្រាស់ទម្រង់ទាំង៣ និងត្រូវផ្ញើមកលេខាធិការដ្ឋានអោយបានមុន៣ម៉ោងក្រោយពីបានបញ្ចូលទិន្នន័យក្នុងប្រព័ន្ធ។ (៤) គណកម្មការ MPDSR ថ្នាក់ខេត្តមានភារកិច្ចពិនិត្យករណីមរណភាពមាតា និងទារកក្នុងតំបន់គ្រប់គ្រងរបស់ខ្លួន ទាំងនៅគ្លីនិក និងនៅសហគមន៍ (៥) ត្រូវលើកកម្ពស់កិច្ចសហការនៃផ្នែកពាក់ព័ន្ធ ដូចជាផ្នែកសម្ភព ផ្នែកទារក ផ្នែកសង្រ្គោះបន្ទាន់/សណ្តំ ដើម្បីវិភាគករណីនិមួយៗ (៦) គ្រូបង្គោលថ្នាក់មន្ទីរពេទ្យជាតិត្រូវបណ្តុះបណ្តាលដល់មន្ទីរពេទ្យសម័្ពនមេត្រី (៧) ត្រូវពង្រឹងគុណភាព ANC ខិតខំកំណត់អោយបាននូវកត្តាប្រឈមរបស់ស្រ្តី (High-risk pregnancy) និងរៀបចំការបញ្ជូនឱ្យចំទិសដៅ និងប្រកបដោយសុវត្ថិភាព។
វគ្គបណ្តុះបណ្តាលនេះ រៀបចំដោយគណៈកម្មការពិនិត្យមរណភាពមាតា និងទារកជុំវិញកំណើត និងការឆ្លើយតបថ្នាក់ជាតិ ដោយមានការឧបត្ថម្ភពីមូលនិធិសហប្រជាជាតិសម្រាប់ប្រជាជន UNFPA និងរដ្ឋាភិបាលអូស្ត្រាលី ក្រោមការសម្របសម្រួលពីឯកឧត្តមសាស្ត្រាចារ្យ លោកជំទាវសាស្ត្រាចារ្យ លោក លោកស្រីជាគណៈកម្មការជាតិពិនិត្យមរណភាពមាតា និងទារកជុំវិញកំណើត និងការឆ្លើយតប ដែលមានសិក្ខាកាមអញ្ជើញចូលរួមដោយផ្ទាល់ចំនួន ៥០រូប និងតាមប្រព័ន្ធនិមិត្ត ចំនួន ២៩៩រូប។
