ខេត្តកំពង់ធំ៖ ថ្ងៃទី១៥ ខែកញ្ញា ឆ្នាំ២០២៥ ឯកឧត្តមសាស្រ្តាចារ្យ សុខ ជួរ ទីប្រឹក្សាក្រសួងសុខាភិបាល និងជាអគ្គនាយករងបច្ចេកទេសសុខាភិបាល បានអញ្ជើញចូលរួមជាអធិបតីភព ក្នុងពិធីបើវគ្គបណ្តុះបណ្តាលស្តីពី សេវាសង្គ្រោះបឋម សង្គ្រោះបន្ទាន់ និងនីតិវិធីស្តង់ដាប្រព័ន្ធបញ្ជូនអ្នកជំងឺ ។
ថ្លែងក្នុងឱកាសបើកវគ្គបណ្តុះបណ្តាលនេះ ឯកឧត្តមសាស្រ្តាចារ្យ សុខ ជួរ បានផ្តល់អនុសាសន៍សំខាន់ៗ មួយចំនួន៖
១) ពង្រឹងធនធានមនុស្ស ផ្នែកសេវាសង្គ្រោះបឋម សង្គ្រោះបន្ទាន់ និងការបញ្ជូន ដេីម្បីឱ្យផ្នែកទាំងនេះកាន់តែប្រសេីរឡេីង ស្របតាមគោលនយោបាយគន្លឹះរបស់រាជរដ្ឋាភិបាលក្នុងការអភិវឌ្ឍន៍វិស័យសុខាភិបាល
២) បង្កេីតស្តង់ដាសង្គ្រោះតាមក្បូន ឬពិធីសារយោងលេី Evidence Base-Medicine
៣) ធ្វើទំនេីបកម្មសម្ភារ បរិក្ខារ និងប្រព័ន្ធបញ្ជូនដោយមានបទដ្ឋានត្រឹមត្រូវ
៤) គ្រូពេទ្យត្រូវធ្វេីការ សហការជាក្រុម ពិភាក្សា និងចែករំលែកព័ត៌មាន ដេីម្បីសុវត្ថិភាព ប្រសិទ្ធភាពក្នុងការព្យាបាលអ្នកជំងឺ។
វគ្គបណ្តុះបណ្តាលនេះ មានរយៈពេលចំនួន៥ថ្ងៃ ចាប់ពីថ្ងៃទី១៥ ដល់ថ្ងៃទី១៩ ខែកញ្ញា ឆ្នាំ២០២៥ ដោយធ្វើបទបង្ហាញជាទ្រឹស្ដីចំនួន៣ថ្ងៃ ការអនុវត្តលេីម៉ានីកាំង និងការចុះអនុវត្តផ្ទាល់ នៅផ្នែកសង្រ្គោះបន្ទាន់ និងជាមួយរថយន្តគិលានសង្គ្រោះ នៅក្នុងមន្ទីរពេទ្យខេត្តកំពង់ធំ ចំនួន២ថ្ងៃ មានការដឹកនាំដោយគ្រូឧទ្ទេសថ្នាក់ជាតិ មកពី មន្ទីរពេទ្យកាល់ម៉ែត មន្ទីរពេទ្យព្រះអង្គឌួង មន្ទីរពេទ្យជាតិតេជោសន្តិភាព និងក្រុមការងារសម្របសម្រួលពីការិយាល័យគិលានុបដ្ឋាក និងឆ្មប នៃនាយកដ្ឋានមន្ទីរពេទ្យក្រសួងសុខាភិបាល។
សូមបញ្ជាក់ថា សិក្ខាកាមចូលរួមផ្ទាល់ជា អនុប្រធានមន្ទីរពេទ្យបង្អែករាជធានី ខេត្ត ស្រុក ប្រធានបច្ចេកទេស លោក លោកស្រីវេជ្ជបណ្ឌិត លោក លោកស្រីពី ផ្នែកសង្គ្រោះបន្ទាន់ ផ្នែកសម្ភព និងរោគស្ត្រី ផ្នែកជំងឺកុមារ ផ្នែកជំងឺទូទៅ ដែលអញ្ជើញមកពីខេត្តមណ្ឌលគីរី រាជធានីភ្នំពេញ និងខេត្តកំពង់ធំ សរុបចំនួន ៤៤រូប ។
