ខេត្តស្វាយរៀង៖ ចាប់ពីថ្ងៃទី៨ ដល់ថ្ងៃទី១០ ខែតុលា ឆ្នាំ២០២៥ លោកជំទាវឱសថការី លី គឹមអេង រដ្ឋលេខាធិការ និងឯកឧត្តមវេជ្ជបណ្ឌិត ឈរ កក្កដា អនុរដ្ឋលេខាធិការ នៃក្រសួងសុខាភិបាល បានចុះពិនិត្យស្ថានភាព វឌ្ឍនភាពការងារ នៅតាមមណ្ឌលសុខភាពក្នុងខេត្តស្វាយរៀង ដើម្បីជំរុញការកែលម្អគុណភាពសេវា កាន់តែប្រសើរ។
ការចុះត្រួតពិនិត្យនេះផ្តោតទៅលើចំណុចសំខាន់ៗ មួយចំនួនរួមមាន៖
១) ការជំរុញបង្កើនការថែទាំសុខភាពបឋម (PHC-BIF) នៅតាមមូលដ្ឋានសុខាភិបាល និងនៅក្នុងសហគមន៍
២) ហេដ្ឋារចនាសម្ព័ន្ធ បរិស្ថានក្នុង និងជុំវិញមណ្ឌលសុខភាព
៣) ការលើកកម្ពស់គុណភាព សុវត្ថិភាពអ្នកជំងឺ
៤) បដិសណ្ឋារកិច្ច ក្នុងការបម្រើសេវាថែទាំជូនអ្នកជំងឺ
៥) ការគ្រប់គ្រង និងអភិវឌ្ឍធនធានមនុស្ស
៦) ការបណ្តុះបណ្តាលបន្ថែមលើបច្ចេកទេស និងបច្ចេកវិទ្យាឌីជីថល
៧) ការគ្រប់គ្រងឱសថ និងសម្ភារបរិក្ខារ
៨) ការបំពេញការងារ និងប្រចាំការ ២៤ម៉ោង/៧ថ្ងៃ។
បេសកកម្មនេះ មានការសម្របសម្រួល និងអមដំណើរដោយ ឯកឧត្តមវេជ្ជបណ្ឌិត គុជ ស៊ីថា ប្រធានមន្ទីរសុខាភិបាល នៃរដ្ឋបាលខេត្តស្វាយរៀង អនុប្រធានមន្ទីរសុខាភិបាល ប្រធាន និងអនុប្រធានការិយាល័យស្រុកប្រតិបត្តិ និងមន្រ្តីសុខាភិបាល នៃរដ្ឋបាលខេត្តស្វាយរៀង។
