សាធារណរដ្ឋឆែក៖ ចាប់ពីថ្ងៃទី៦ ដល់ថ្ងៃទី១០ ខែតុលា ឆ្នាំ២០២៥ ឯកឧត្តមវេជ្ជបណ្ឌិត ស៊ុង វិនត: រដ្ឋលេខាធិការក្រសួងសុខាភិបាល បានដឹកនាំគណៈប្រតិភូក្រសួងសុខាភិបាល ធ្វើទស្សនកិច្ចសិក្សា នៅសាធារណរដ្ឋឆែក ដេីម្បីស្វែងយល់បន្ថែមពីបច្ចេកវិទ្យាវេជ្ជសាស្ត្រ និងសុខាភិបាលឌីជីថល ព្រមទាំងពង្រឹងនិ ងពង្រីកកិច្ចសហប្រតិបត្តិការ លេីវិស័យសុខាភិបាល នៃប្រទេសទាំងពីរ។
ក្នុងដំណេីរបេសកកម្មរយ:ពេល ៤ថ្ងៃនេះ គណៈប្រតិភូបានជួបជាមួយ តំណាងក្រសួងការបរទេស ទីភ្នាក់ងារអភិវឌ្ឍន៍
នៃសាធារណរដ្ឋឆែក វិទ្យាស្ថានជាតិប្រព័ន្ធព័ត៌មានសុខាភិបាល មន្ទីរពេទ្យឯកទេសសុខភាពមាតា ទារក និងកុមារ Podoli មជ្ឈមណ្ឌលធ្វេីត្រាប់ (Simulation Center) នៃសាកលវិទ្យាល័យ Charles ព្រមទាំងទស្សនារោងចក្រ LINET ដែលជាក្រុមហ៊ុនផលិតគ្រែមន្ទីរពេទ្យ កម្រិតស្តង់ដារពិភពលោក រួមទាំងគ្រែ ICU និងក្រុមហ៊ុនបណ្តាញគ្រប់គ្រងបច្ចេកវិទ្យាព័ត៌មានវិទ្យា Cesnet។
ក្នុងដំណេីរទស្សនកិច្ចនេះ គណ:ប្រតិភូបានសិក្សាស្វែងយល់បន្ថែមពីបច្ចេកវិទ្យាវេជ្ជសាស្រ្តថ្មីៗ ការផ្លាស់ប្តូរបទពិសោធន៍ នៃការគាំពារសុខាភាពមាតា ទារក និងកុមារ ជាពិសេសការកាត់បន្ថយអត្រាមរណ:ភាពមាតា ទារក និងកុមារ ការគ្រប់គ្រងការប្រេីប្រាស់សម្ភារបរិក្ខារពេទ្យ ការអភិវឌ្ឍប្រព័ន្ធវិស័យសុខាភិបាលឌីជីថល។
លេីសពីនេះ ក្រសួងការបរទេស ទីភ្នាក់ងារអភិវឌ្ឍឆែក និងស្ថាប័នពាក់ព័ន្ធទាំងអស់ នៃសមភាគីឆែក បានប្តេជ្ញាក្នុងការបន្តពង្រឹង ពង្រីកការគាំទ្រវិស័យសុខាភិបាល នៅកម្ពុជា។
សូមបញ្ជាក់ផងដែរថា ទស្សនកិច្ចសិក្សានេះមានការចូលរួម ពីឯកឧត្តមវេជ្ជបណ្ឌិត ញឹប អង្គារបុស្ស នាយកមន្ទីរពេទ្យកុមារជាតិ លោក សុខ សំណាង ប្រធាននាយកដ្ឋានសុខាភិបាលឌីជីថល តំណាងមជ្ឈមណ្ឌលជាតិគាំពារមាតា និងទារក មន្ទីរពេទ្យហ្លួងម៉ែ និងមន្ទីរពេទ្យកាល់ម៉ែត្រ។
