ខេត្តរតនគិរី៖ ចាប់ពីថ្ងៃទី០៨ ដល់ថ្ងៃទី១០ ខែតុលា ឆ្នាំ២០២៥ ឯកឧត្ដមបណ្ឌិត កែរ រដ្ឋា រដ្ឋលេខាធិការ និងឯកឧត្ដមឱសថការី បាន បុត្តា អនុរដ្ឋលេខាធិការក្រសួងសុខាភិបាល បានអញ្ជើញចុះពង្រឹងគុណភាព នៃការបម្រើសេវាសុខាភិបាល នៅមន្ទីរពេទ្យបង្អែកស្រុកកោះញែក នៃមន្ទីរសុខាភិបាលខេត្តមណ្ឌលគីរី និងមន្ទីរពេទ្យបង្អែកបរកែវ នៃមន្ទីរសុខាភិបាលខេត្តរតនគីរី ។
ឯកឧត្ដមបណ្ឌិតរដ្ឋលេខាធិការ បញ្ជាក់ថា ក្រុមការងារ បានចុះពង្រឹងគុណភាពសេវាមន្ទីរពេទ្យបង្អែកស្រុក ក្នុងមួយឆ្នាំ២ដង នេះជាលើកទី៥ ហើយ ដែលបានចុះមកខេត្តមណ្ឌលគីរី និងខេត្តរតនគីរី។ ឯកឧត្ដមបានកោតសរសើរអំពីការរីកចម្រើនជាបន្តបន្ទាប់របស់មន្ទីរពេទ្យបង្អែកនីមួយៗ។
ឯកឧត្តមបានបន្ថែមថា កម្មវិធីគោលនយោបាយអាទិភាពទាំង៦ វិស័យសុខាភិបាលស្ថិតនៅក្នុងកម្មវិធីទី១ គឺការផ្តល់ការថែទាំសុខភាព ឆ្ពោះទៅការគ្របដណ្ដប់សុខភាពជាសកល អនុវត្តតាមយុទ្ធសាស្ត្រ និងគោលនយោបាយអាទិភាពនេះ ឯកឧត្ដមសាស្ត្រាចារ្យ ឈាង រ៉ា រដ្ឋមន្ត្រីក្រសួងសុខាភិបាល បានរៀបចំក្រុមការងារចុះពង្រឹងគុណភាពសេវាសុខាភិបាល ថ្នាក់មន្ទីរពេទ្យបង្អែកខេត្ត មន្ទីរពេទ្យបង្អែកស្រុក រហូតដល់មណ្ឌលសុខភាព និងបុស្ដិ៍សុខភាព ។
ជាចុងក្រោយ ឯកឧត្តមបណ្ឌិតបានថ្លែង អំណរគុណដល់បុគ្គលិក និងមន្រ្តីសុខាភិបាល គ្រាប់ជាន់ថ្នាក់ទាំងអស់ ដែលបានខិតខំយកចិត្តទុកដាក់ ក្នុងការបម្រើសេវាពិនិត្យ ថែទាំ និងព្យាបាលជូនប្រជាពលរដ្ឋនាមពេលកន្លងមកនេះ និងសូមឱ្យមានការខិតខំបន្តទៀត ដើម្បីឱ្យសេវានៅតាមមូលដ្ឋាន កាន់តែល្អប្រសើរឡើង។
