ទីក្រុងណាឌី សាធារណរដ្ឋហ្វ៊ីជី៖ នាថ្ងៃអាទិត្យ ១២រោច ខែអស្សុជ ឆ្នាំម្សាញ់ សប្តស័ក ព.ស.២៥៦៩ ត្រូវនឹងថ្ងៃទី១៩ ខែតុលា ឆ្នាំ២០២៥ ឯកឧត្តមសាស្ត្រាចារ្យ ឈាង រ៉ា រដ្ឋមន្ត្រីក្រសួងសុខាភិបាល នៃព្រះរាជាណាចក្រកម្ពុជា និងប្រតិភូសុខាភិបាល បានអញ្ជើញចូលរួមក្នុងពិធី ស្វាគមន៏ប្រពៃណី ប្រជាជនហ្វ៊ីជី ដែលរៀបចំដោយ រដ្ឋាភិបាលនៃសាធារណរដ្ឋហ្វ៊ីជី ដើម្បីទទួលស្វាគមន៍ប្រតិភូរដ្ឋជាសមាជិកតំបន់ប៉ាសុីហ្វិកខាងលិច ដែលចូលរួមក្នុងសម័យប្រជុំលើកទី៧៦ របស់អង្គការសុខភាពពិភពលោកប្រចាំតំបន់ប៉ាស៊ីហ្វិកខាងលិច (Regional Committee for the Western Pacific) ដែលនឹងប្រព្រឹត្តទៅចាប់ពីថ្ងៃទី២០ ដល់ថ្ងៃទី២៤ ខែតុលា ឆ្នាំ២០២៥ នៅទីក្រុងណាឌី (Nadi) នៃសាធារណរដ្ឋហ្វ៊ីជី។
ពិធីស្វាគមន៍នេះ មានឈ្មោះជាភាសាហ្វ៊ីជីថា “Veiqaraqaravi Vakavanua” ដែលជាពិធីបុរាណសំខាន់មួយក្នុងវប្បធម៌ iTaukei ដែលត្រូវបានអនុវត្តសម្រាប់ការស្វាគមន៍ភ្ញៀវជាតិ និងអន្តរជាតិ។
ពិធីនេះបានបង្កើនស្មារតីសហការ និងការគោរពវប្បធម៌ក្នុងតំបន់ប៉ាស៊ីហ្វិកខាងលិច និងជាផ្នែកមួយនៃការចាប់ផ្តើមសម័យប្រជុំប្រចាំឆ្នាំដ៏មានសារសំខាន់នេះ។
