រាជធានីភ្នំពេញ៖ ព្រឹកថ្ងៃទី២៨ ខែតុលា ឆ្នាំ២០២៥ លោកជំទាវវេជ្ជបណ្ឌិត ប្រាក់ សោភ័ណនារី រដ្ឋលេខាធិការក្រសួងសុខាភិបាល និងជាអនុប្រធានក្រុមប្រឹក្សាជាតិ ស្តីពីអាហារូបត្ថម្ភជាតិ បានធញ្ជើញចូលរួមកិច្ចប្រជុំពិនិត្យ និងកែសម្រួលយុទ្ធសាស្ត្រជាតិ ស្តីពីការបញ្ចូលមីក្រូសារជាតិក្នុងចំណីអាហារឆ្នាំ២០២៥-២០៣០ ដឹកនាំដោយឯកឧត្តម ប៊ិន ត្រឈៃ រដ្ឋមន្ត្រីក្រសួងផែនការ និងជាប្រធានក្រុមប្រឹក្សាជាតិ ស្តីពីអាហារូបត្ថម្ភជាតិ។
យុទ្ធសាស្ត្រនេះ រៀបចំឡើងដើម្បីបញ្ជ្រាបព័ត៌មានអំពីការបញ្ចូលមីក្រូសារជាតិ ក្នុងចំណីអាហារ ទៅក្នុងកិច្ចគាំពារសង្គម កម្មវិធីផ្តល់អាហារតាមសាលារៀន ការត្រៀមលក្ខណៈពេលមានគ្រោះអាសន្ន និងការធ្វើពាណិជ្ជកម្មនានា និងពង្រឹងបរិយាកាសគោលនយោបាយ និងបទប្បញ្ញត្តិ ដើម្បីគាំទ្រឲ្យមានផលរយៈពេលវែង។
ចំណុចស្នូល នៃក្របខ័ណ្ឌយុទ្ធសាស្ត្រនេះមានសសរស្តមចំនួន៧ គឺ៖
១-ពង្រឹងអភិបាលកិច្ច
២-ប្រើប្រាស់យន្តការស្ថាប័ន និងកម្មវិធីគាំពារសង្គម
៣-ផលិតកម្មអាហារ ដែលបញ្ចូលមីក្រូសារជាតិ
៤-បង្កើតបរិយាកាសអំណោយផល និងរចនាសម្ព័ន្ធ លើកទឹកចិត្តធុរះកិច្ច
៥-ក្របខ័ណ្ឌច្បាប់ និងបទប្បញ្ញត្តិ
៦-ការយល់ដឹងរបស់អ្នកប្រើប្រាស់ និងការបង្កើតតម្រូវការ
៧-ការធានាបាននូវហិរញ្ញប្បទាន សម្រាប់ការបញ្ចូលមីក្រូសារជាតិ ក្នុងចំណីអាហារ។
សូមបញ្ជាក់ថា កិច្ចប្រជុំនេះមានការអញ្ជើញចូលរួមពីប្រធាន អនុប្រធាន និងសមាជិក នៃក្រុមប្រឹក្សាជាតិ ស្តីពីអាហារូបត្ថម្ភជាតិ និងដៃគូអភិវឌ្ឍន៍នានា សរុបចំនួន ៦៣រូប។
