សាធារណរដ្ឋប្រជាមានិតចិន៖ ចាប់ពីថ្ងៃទី២៦ ដល់ថ្ងៃទី៣១ ខែតុលា ឆ្នាំ២០២៥ ឯកឧត្តមវេជ្ជបណ្ឌិត ម៉ឹង វណ្ណារុំ អនុរដ្ឋលេខាធិការ និងលោកវេជ្ជបណ្ឌិត ហ៊ុយ ម៉េងហ៊ត់ អនុប្រធាននាយកដ្ឋានសហប្រតិបត្តិការអន្តរជាតិ នៃក្រសួងសុខាភិបាល បានចូលរួមវេទិកាស្តីពី «ការប្រើប្រាស់បច្ចេកវិទ្យាសុខាភិបាលឌីជីថល ដើម្បីលើកកម្ពស់ការថែទាំសុខភាពបឋម និងឱកាសសហការ រវាងសាធារណរដ្ឋប្រជាមានិតចិន និងប្រទេសសមាជិកអាស៊ាន»។
វេទិកានេះ ត្រូវបានរៀបចំដោយ មជ្ឍមណ្ឌលជាតិ ស្រាវជ្រាវអភិវឌ្ឍន៍សុខាភិបាល នៃសាធារណរដ្ឋប្រជាមានិតចិន ដោយមានការគាំទ្រពីការិយាល័យតំណាងអង្គការសុខភាពពិភពលោក (WHO) នៅសារណរដ្ឋប្រជាមានិតចិន។
វេទិកាខាងលើ មានការចូលរួមពីតំណាងប្រទេសសមាជិកអាស៊ានចំនួន៧ គឺ កម្ពុជា ឥណ្ឌូនេស៊ី ឡាវ ម៉ាឡេស៊ី ហ្វីលីពីន សិង្ហបុរី និងថៃ ប្រធាននាយកដ្ឋានសុខាភិបាលឌីជីថល នៃទីស្នាក់ការកណ្តាលអង្គការសុខភាពពិភពលោក (WHO-HQ) តំណាង WHO ប្រចាំនៅសាធារណរដ្ឋប្រជាមានិតចិន និងអ្នកឯកទេស/ជំនាញ ពីគណៈកម្មាធិការជាតិសុខាភិបាល នៃសាធារណរដ្ឋប្រជាមានិតចិន សាកលវិទ្យាល័យ តំណាងគណៈកម្មាធិការសុខាភិបាល នៃខេត្តមួយចំនួន និងសហគ្រាសបច្ចេកវិទ្យាឌីជីថល (Alibaba, Huawei, and iFLYTEK)។
