ខេត្តត្បូងឃ្មុំ៖ ព្រឹកថ្ងៃព្រហស្បតិ៍ ទី២៧ ខែវិច្ឆិកា ឆ្នាំ២០២៥ លោកជំទាវ ឱសថការី លី គឹមអេង រដ្ឋលេខាធិការក្រសួងសុខាភិបាល និងជាក្រុមការងារទទួលបន្ទុកជួយពង្រឹងគុណភាពសេវាមណ្ឌលសុខភាព នៅក្នុងខេត្តចំនួន៧ (ស្វាយរៀង ព្រៃវែង ត្បូងឃ្មុំ ក្រចេះ ស្ទឹងត្រែង មណ្ឌលគិរី និងរតនគិរី) បានអញ្ជើញចូលរួមជាអធិបតី ក្នុងកិច្ចប្រជុំពិនិត្យ និងវាយតម្លៃសមិទ្ធផលការងារវិស័យសុខាភិបាល ប្រចាំឆមាសទី២ ឆ្នាំ២០២៥ និងលើកទិសដៅបន្ត សម្រាប់ឆ្នាំ២០២៦ នៅមន្ទីរសុខាភិបាលនៃរដ្ឋបាលខេត្តត្បូងឃ្មុំ។
ឆ្លៀតក្នុងឱកាសនេះ លោកជំទាវរដ្ឋលេខាធិការ បានចែករំលែកបទពិសោធន៍នៃការចុះពង្រឹងគុណភាពសេវាមណ្ឌលសុខភាព បញ្ហាប្រឈម និងដំណោះស្រាយ ដែលកើតមានឡើងនៅក្នុងខេត្តត្បូងឃ្មុំ។
កិច្ចប្រជុំនេះ មានការអញ្ជើញចូលរួមពីឯកឧត្តមវេជ្ជបណ្ឌិត កែវ វណ្ណៈ ប្រធានមន្ទីរសុខាភិបាល នៃរដ្ឋបាលខេត្តត្បូងឃ្មុំ លោក លោកស្រី អនុប្រធានមន្ទីរសុខាភិបាល ប្រធានការិយាល័យ ប្រធាន អនុប្រធានការិយាល័យស្រុកប្រតិបត្តិទាំង៧ ប្រធាន អនុប្រធានមន្ទីរពេទ្យបង្អែក តំណាងអង្គការដៃគូរ ប្រធានមណ្ឌលសុខភាពទាំង៧៥ និងមន្រ្តីសុខាភិបាល សរុបចំនួន ១២៩រូប។
