រាជធានីភ្នំពេញ៖ រសៀលថ្ងៃសុក្រ ទី២៨ ខែវិច្ឆិកា ឆ្នាំ២០២៥ ឯកឧត្តមវេជ្ជបណ្ឌិត នាង ភារិទ្ធ រដ្ឋលេខាធិការ ក្រសួងសុខាភិបាល បានដឹកនាំកិច្ចប្រជុំ ស្តីពីវឌ្ឍនភាព និងការលើកទិសដៅបន្ត របស់មជ្ឈមណ្ឌលជាតិស្រាវជ្រាវវេជ្ជសាស្ត្របូរាណ ដើម្បីតាមដាន និងជំរុញការងារឱ្យកាន់តែមានប្រសិទ្ធភាពបន្ថែមទៀត។
គោលបំណងសំខាន់ៗ នៃកិច្ចប្រជុំរួមមាន៖
១. ការពិនិត្យលើវឌ្ឍនភាពការងារកន្លងមក និងលើកទិសដៅសកម្មភាពការងារបន្ត
២. បញ្ហាប្រឈម និងសំណូមពរនានា។
ក្រោយពីកិច្ចប្រជុំពិភាក្សា អង្គប្រជុំបានឯកភាព និងសម្រេចដូចតទៅ៖
១. សួនរុក្ខជាតិឱសថនៅមជ្ឈមណ្ឌលជាតិ ត្រូវតែរៀបចំសម្រេចឱ្យបាន ១០០% ព្រមទាំងមានស្លាកឈ្មោះអ្នកចូលរួមឧបត្ថមកសាង
២. មជ្ឈមណ្ឌលនឹងរៀបចំ Scenario ដើម្បីប្រមូលព័ត៌មានគ្រូបុរាណ តាមបណ្តាខេត្ត ទូទាំងប្រទេស ដើម្បីផ្ញើរជូនទៅក្រសួងសុខាភិបាល
៣. មជ្ឈមណ្ឌលត្រូវចាត់ចែងគណៈកម្មការទទួលបន្ទុកផែនការ បោះពុម្ភសៀវភៅប្រវត្តិវេជ្ជសាស្រ្តបុរាណកម្ពុជា ថែទាំកូនរុក្ខជាតិឱសថ បណ្តុះបណ្តាល និងសិក្ខាសាលា
៤. មជ្ឈមណ្ឌលត្រូវរៀបចំគម្រោងដាច់ដោយឡែកមួយសម្រាប់ផែនការជួសជុលអគារ នៅសួនរុក្ខជាតិគិរីរម្យ។
កិច្ចប្រជុំនេះ មានការអញ្ជើញចូលរួមពី ថ្នាក់ដឹកនាំ មន្ត្រីរាជការ និងមន្ត្រីជាប់កិច្ចសន្យាទាំងអស់ នៃមជ្ឈមណ្ឌលជាតិស្រាវជ្រាវវេជ្ជសាស្ត្របូរាណ។
