រសៀលថ្ងៃអង្គារ ១១ រោច ខែមិគសិរ ឆ្នាំម្សាញ់ សប្តស័ក ព.ស.២៥៦៩ ត្រូវនឹងថ្ងៃទី ១៦ ខែ ធ្នូ ឆ្នាំ២០២៥ ចាប់ពីម៉ោង ២:០០នាទីរសៀល ដោយមានការអនុញ្ញាតិពី ឯកឧត្តមសាស្ត្រាចារ្យរដ្ឋមន្រ្តី ឈាង រ៉ា ឯកឧត្តមសាស្រ្តាចារ្យ កុយ វ៉ាន់នី រដ្ឋលេខាធិការក្រសួងសុខាភិបាល បានដឹកនាំវគ្គភាពអ្នកដឹកនាំ និងនវានុវត្តន៍ ដែលមានមន្រ្តីសុខាភិបាលគ្រប់ឋានានុក្រមក្រោមឱវាទក្រសួងសុខាភិបាល ចូលរួមតាមប្រព័ន្ធ វីដេអូសន្និសីទ(Zoom) សរុបចំនួន ២៨៥៦នាក់។
ជាកិច្ចចាប់ផ្តើម ឯកឧត្តមសាស្រ្តាចារ្យ បានចែករំលែកពីរបៀបដឹកនាំ និងគ្រប់គ្រងការងារថែទាំ និងព្យាបាលជំងឺ នៅក្នុងពេលដែលមានចម្បាំងឈ្លានពាន។ ឯកឧត្តមបានសង្កត់ធ្ងន់ថា នៅក្នុងស្ថានភាពដូចពេលនេះ បុគ្គលិកសុខាភិបាលទាំងអស់ ត្រូវតែរួបរួមគ្នា (Unity of the spirit) ទាំងកំលាំងកាយនិងកំលាំងចិត្ត ដើម្បីបម្រើសេវា និងដើម្បីទប់ទល់ជាមួយនឹងសង្គ្រាមចិត្តសាស្រ្ត ដែលសត្រូវបានប្រើប្រាស់ ក្នុងគ្រប់រូបភាពដើម្បីបំបែកបំបាក់ស្មារតីរបស់ប្រជាជនយើង។ នៅចំពោះមុខឧបសគ្គបែបនេះ បុគ្គលិកសុខាភិបាលទាំងអស់ ត្រូវផ្តោតលើតួនាទីសំខាន់ៗ ចំនួន៤គឺ (១) បំពេញឱ្យបាននូវមុខងារសំខាន់របស់វិស័យសុខាភិបាល គឺជាការបម្រើសេវាថែទាំ និងព្យាបាលដល់ប្រជាជនដោយមិនរើសមុខ (២) តំកល់ភាពខ្ពស់បំផុត នៃជីវិតអ្នកជំងឺដែលត្រូវសង្គ្រោះ (៣) រក្សាការពារសុវត្ថិភាពបុគ្គលិកសុខាភិបាលឱ្យអស់លទ្ធភាព ដើម្បីផ្តល់ឱកាសជូនបុគ្គលិកសុខាភិបាលអាចជួយអ្នកជំងឺ និងអ្នករបួស និង(៤) ការដឹកនាំការងារសុខាភិបាល ត្រូវធ្វើឡើងតាមខ្សែបន្ទាត់គណនេយ្យភាពតែមួយ និងច្បាស់លាស់។
ជាកិច្ចបន្ត ឯកឧត្តមសាស្ត្រាចារ្យក៏បានលើកយក ការងាររក្សាសុវត្ថិភាពរបស់មន្រ្តីសុខាភិបាល ក្នុងពេលចម្បាំងប្រដាប់អាវុធមកធ្វើការបកស្រាយលម្អិត និងបន្តផ្តល់ការណែនាំពីគន្លឺះនៃការដឹកនាំអង្គភាព ក្នុងពេលមានសង្រ្គាម ដែលតម្រូវឱ្យអ្នកដឹកនាំម្នាក់ៗ ត្រូវយកចិត្តទុកដាក់លើការងារសម្របសម្រួលជាមួយភាគីផ្សេងៗ ការរក្សាសាមគ្គីភាពជាមួយអាជ្ញាធរគ្រប់លំដាប់ថ្នាក់ ការគ្រប់គ្រង និងការប្រើប្រាស់ធនធានឱ្យចំគោលដៅ និងដោយសន្សំសំចៃ និងផ្តល់របាយការណ៍ ដែលច្បាស់ជូនថ្នាក់ដឹកនាំខាងលើបានដឹង និងផ្តល់ធាតុចូលបន្ថែម។
មុននឹងបញ្ជប់វគ្គ ក្រុមការងារមន្ទីរពេទ្យមិត្តភាពកម្ពុជា-ចិន ព្រះកុសមៈ បានធ្វើបទបង្ហាញពីការបង្កើនសេវាសម្រាកពេទ្យ របស់ខ្លួន និងបានចែករំលែកបទពិសោធន៍ នៃការបង្កើនការខិតខំប្រឹងប្រែង របស់បុគ្គលិក និងការបង្កើនគុណភាពសេវា។
ជាចុងបញ្ចប់ ឯកឧត្តមសាស្រ្តាចារ្យរដ្ឋលេខាធិការ បានផ្តល់ការណែនាំជូនមន្ទីរពេទ្យសាធារណៈទាំងអស់ ធានាឱ្យបាននូវគុណភាព នៃសេវាសម្រាប់ប្រជាជនគ្រប់រូប និងបាន ផ្តាំផ្ញើរថ្នាក់ដឹកនាំអង្គភាពទាំងអស់ ដឹកនាំបុគ្គលិកសុខាភិបាល ដោយឈរលើគោលគំនិតនៃការផ្តល់តម្លៃខ្ពស់បំផុតលើក្រមសីលធម៌ ដែលប្រការនេះនឹងទាក់ទាញផ្តល់ជាលទ្ធភាព ផលប្រយោជន៍អភិវឌ្ឍន៍ផ្សេងៗទៀតយ៉ាងច្រើនជូនដល់សង្គម អង្គភាព និង បុគ្គលិកសុខាភិបាល នាពេលអនាគត។
