រាជធានីភ្នំពេញ៖ ថ្ងៃចន្ទ ១០រោច ខែមិគសិរ ឆ្នាំម្សាញ់ សប្តស័ក ព.ស.២៥៦៩ ត្រូវនឹងថ្ងៃទី១៥ ខែធ្នូ ឆ្នាំ២០២៥ ដោយមានការអនុញ្ញាត្តិពីឯកឧត្តមសាស្រ្តាចារ្យ រដ្ឋមន្រ្តី លោកជំទាវសាស្រ្តាចារ្យ អ៉ឹម សិទ្ធិការ្យ រដ្ឋលេខាធិការក្រសួងសុខាភិបាល ទទួលបន្ទុកផ្នែកជំងឺមហារីកមាត់ស្បូន បានអញ្ជើញជាអធិបតីភាព ក្នុងពិធីបើកវគ្គបណ្តុះបណ្តាលបំប៉នគ្រូបង្គោលថ្នាក់ជាតិ ស្តីពី ការគ្រប់គ្រងព្យាបាលជំងឺមហារីកមាត់ស្បូន ដោយ Colposcopy, Thermal ablation, LEEP និងការផ្តល់ប្រឹក្សា។
វគ្គបណ្តុះបណ្តាលនេះមានរយៈពេល ៣ ថ្ងៃ គឺចាប់ពីថ្ងៃចន្ទ ទី១៥ ដល់ថ្ងៃពុធ ទី១៧ ខែធ្នូ ឆ្នាំ២០២៥ នៅមន្ទីរពេទ្យកាល់ម៉ែត ដែលមានសិក្ខាកាម ជាគ្រូបង្គោលថ្នាក់ជាតិ ចំនួន ១៥ រូប អញ្ជើញមកពីមន្ទីរពេទ្យថ្នាក់ជាតិទាំងបី រួមមាន មន្ទីរពេទ្យកាល់ម៉ែត មន្ទីរពេទ្យមិត្តភាពខ្មែរ-សូវៀត និងមជ្ឈមណ្ឌលជាតិគាំពារមាតា និងទារក នៃក្រសួងសុខាភិបាល។
វគ្គបណ្តុះបណ្តាលនេះ រៀបចំដោយនាយកដ្ឋានការពារសុខភាព នៃក្រសួងសុខាភិបាល និងមន្ទីរពេទ្យកាល់ម៉ែត ក្រោមគម្រោងលើកកម្ពស់គុណភាព និងសមធម៌សុខាភិបាល ដំណាក់កាលទី២ (H-EQIP 2) ដោយមានការគាំទ្រផ្នែកបច្ចេកទេសពីមន្ទីរពេទ្យកាល់ម៉ែត។
វគ្គបណ្តុះបណ្តាលនេះ មានការអញ្ជើញចូលរួមពីឯកឧត្តមសាស្ត្រាចារ្យ លោកជំទាវសាស្ត្រាចារ្យ លោក លោកស្រី តំណាងនាយកដ្ឋានការពារសុខភាព នៃក្រសួងសុខាភិបាល តំណាងមន្ទីរពេទ្យកាល់ម៉ែត តំណាងមន្ទីរពេទ្យមិត្តភាពខ្មែរ-សូវៀត តំណាងសមាគមសម្ភព និងរោគស្ត្រីវិទ្យាកម្ពុជា តំណាងមជ្ឈមណ្ឌលមេត្តាករុណាកម្ពុជា តំណាងមជ្ឈមណ្ឌលជាតិគាំពារមាតា និងទារក តំណាងមជ្ឈមណ្ឌលជាតិប្រយុទ្ធនឹងជំងឺអេដស៍ សើស្បែក និងកាមរោគ និងតំណាងអង្គការ JICA សរុបចំនួន ៣៣ រូប។
