រាជធានីភ្នំពេញ៖ ព្រឹកថ្ងៃសុក្រ ទី១៩ ខែធ្នូ ឆ្នាំ២០២៥ លោកជំទាវសាស្រ្តាចារ្យ អុឹម សិទ្ធិការ្យ រដ្ឋលេខាធិការក្រសួងសុខាភិបាល បានដឹកនាំបេីកកិច្ចប្រជុំបូកសរុបលទ្ធផលការងារក្នុងឆ្នាំ២០២៥ និងលើកទិសដៅយុទ្ធសាស្ត្រឆ្នាំ២០២៦-២០៣០ សម្រាប់ក្រុមប្រឹក្សាគណៈគិលានុបដ្ឋាកជាតិអាណត្តិទី៣ តាមរយៈប្រព័ន្ធនិម្មិត ZOOM។
សម្រាប់គោលបំណងនៃកិច្ចប្រជុំខាងលេីគឺមានដូចជា៖
១. ពិនិត្យ និងវាយតម្លៃលទ្ធផលការងារក្នុងឆ្នាំ២០២៥ របស់ក្រុមប្រឹក្សាគណៈគិលានុបដ្ឋាកជាតិ អាណត្តិទី៣
២. កំណត់ទិសដៅយុទ្ធសាស្ត្រសម្រាប់ឆ្នាំ២០២៦-២០៣០
៣. ទទួលបានការគាំទ្រ និងមតិផ្ដាំផ្ញើពីថ្នាក់ដឹកនាំក្រសួងសុខាភិបាល
៤. ពង្រឹងការសហការរវាងក្រុមប្រឹក្សាគណៈគិលានុបដ្ឋាក និងក្រសួងសុខាភិបាល។
ជាកិច្ចចូលរួមដំបូង ឯកឧត្តមសាស្ត្រាចារ្យ ឡឹម តារា រដ្ឋលេខាធិការក្រសួងសុខាភិបាល និងជាប្រធានក្រុមប្រឹក្សាគណៈគ្រូពេទ្យជាតិកម្ពុជា បានមានប្រសាសន៍ថា ការអភិវឌ្ឍវិស័យសុខាភិបាលពឹងផ្អែកយ៉ាងខ្លាំងលើធនធានមនុស្ស ដែលត្រូវមានសមត្ថភាព និងឯកសារបញ្ជាក់ច្បាស់លាស់ (សញ្ញាបត្រ) ជាគុណវុឌ្ឍិព្រមទាំងត្រូវមានសីលធម៌ គុណធម៌ ការទទួលខុសត្រូវ និងការគោរពតាមដែនកំណត់វិជ្ជាជីវៈ។
ឯកឧត្តមសាស្ត្រាចារ្យ ក៏បានលើកឡើងអំពីតួនាទីសំខាន់របស់គណៈវិជ្ជាជីវៈ ដែលរួមមាន ការអប់រំ និងបណ្តុះបណ្តាល ការត្រួតពិនិត្យសមត្ថភាពនៅកន្លែងធ្វើការ និងការជួយលើកស្ទួយការអភិវឌ្ឍវិជ្ជាជីវៈឱ្យមានគុណភាព។
ជាកិច្ចបន្ទាប់ ឯកឧត្តមសាស្ត្រាចារ្យ កុយ វ៉ាន់នី រដ្ឋលេខាធិការក្រសួងសុខាភិបាល បានបញ្ជាក់ពីភាពខុសគ្នារវាង គណៈវិជ្ជាជីវៈ និង សមាគម ដោយយេីងត្រូវដឹងថាសមាគមមានតួនាទីលើកស្ទួយសមត្ថភាពវិជ្ជាជីវៈ ខណៈដែលគណៈវិជ្ជាជីវៈមានតួនាទីកំណត់ស្តង់ដារ និងការពារប្រយោជន៍សាធារណៈ ស្របតាមច្បាប់។ ឯកឧត្តមសាស្ត្រាចារ្យបានបន្ថែមថា ការអនុវត្តការថែទាំប្រកបដោយក្រមសីលធម៌ខ្ពស់ មិនអាចពឹងផ្អែកលើការដាក់ទណ្ឌកម្មតែប៉ុណ្ណោះទេ ប៉ុន្តែត្រូវមានប្រព័ន្ធអប់រំ និងបណ្ដុះបណ្ដាលមួយដែលមានស្តង់ដាផងដែរ ហើយដើម្បីឱ្យគណៈវិជ្ជាជីវៈមានភាពរីកចម្រើន ត្រូវអនុវត្តដោយស្មើភាព មានភាពមិនលំអៀង មានភាពដឹកនាំល្អ (Leadership) មានសុចរិតភាពប្រព័ន្ធ (System Integrity) និងមានការប្រុងប្រយ័ត្នជានិច្ចក្នុងការបំពេញភារកិច្ច។
ជាមួយការប្រកាសបេីកអង្គប្រជុំ លោកជំទាវសាស្ត្រាចារ្យរដ្ឋលេខាធិការ បានផ្តល់អនុសាសន៍ ក្រុមការងារគណៈវិជ្ជាជីវៈទាំងអស់ ត្រូវផ្តោតលើការបណ្តុះបណ្តាលជាបន្តបន្ទាប់ ការធ្វើជាគំរូល្អក្នុងការដឹកនាំ មានយុត្តិធម៌ មានសមត្ថភាព ចំណេះដឹង និងបន្តអភិវឌ្ឍខ្លួនជានិច្ច រួមទាំងការផ្តល់នូវចំនុចដែលត្រូវអនុវត្តដូចខាងក្រោម៖
១) នៅគ្រប់មន្ទីរពេទ្យជាតិ មន្ទីរពេទ្យបង្អែកខេត្តក្រុងនិងស្រុក មណ្ឌលសុខភាព ត្រូវរៀបចំកម្រិតរបស់គិលានុបដ្ឋាក-ឆ្មប ជាបីកម្រិត ទៅតាមសមត្ថភាព ចំនេះដឹង អតីតភាពការងារ និងការឆ្លងកាត់នៃវគ្គបណ្តុះបណ្តាលផ្សេងៗ ដោយបានយកវគ្គនោះមកធ្វេីការបណ្តុះបណ្តាលបន្ត ដល់សហភាតរ: ជាមួយលទ្ធផលផងដែរ
២) ស្របតាមការសង្កេតជាចំនុចមិនទាន់បានល្អប្រសេីរនោះគឺការប្រាស្រ័យទាក់ទង និងសូមស្នេីរអោយលោក ជា សុភក្រ្តមុនីរ័ត្ន រៀបចំក្រុមការងារក្នុងការធ្វេីបទបង្ហាញអំពី Patient Center Care ដែលមានសារៈសំខាន់ណាស់សម្រាប់គិលានុបដ្ឋាក-ឆ្មប ក្នុងការបម្រើការងារប្រចាំថ្ងៃ ជាមួយនឹងគុណភាពនៃការថែទាំ និងសុវត្ថិភាពរបស់អ្នកជំងឺ។
ក្នុងឱកាសនេះផងដែរ លោកជំទាវបានកោតសរសើរ និងថ្លែងអំណរគុណយ៉ាងជ្រាលជ្រៅដល់ក្រុមការងារទាំងអស់ ដែលបានខិតខំប្រឹងប្រែងអនុវត្តភារកិច្ចរហូតដល់ទទួលបានលទ្ធផលជាផ្លែផ្កា និងអាចរៀបចំអង្គប្រជុំដ៏មានសារៈសំខាន់នេះ ដែលមានតម្លៃយ៉ាងខ្លាំងសម្រាប់ការអភិវឌ្ឍវិជ្ជាជីវៈគិលានុបដ្ឋាក និងវិស័យសុខាភិបាលជាតិ។
កិច្ចប្រជុំនេះ មានការអញ្ជេីញចូលរួមពីឯកឧត្តមសាស្ត្រាចារ្យ លោកជំទាវ ជារដ្ឋលេខាធិការនិងអនុរដ្ឋលេខាធិការក្រសួងសុខាភិបាល ប្រធាន អនុប្រធាន តំណាងគណៈវិជ្ជាជិវៈទាំងប្រាំព្រមទាំងប្រធាន អនុប្រធាន និងសមាជិកក្រុមប្រឹក្សាគណៈគិលានុបដ្ឋាកតាមសាខាទាំង ២៥ ខេត្ត-ក្រុង ប្រធានថែទាំទូទាំងប្រទេសតាមរយៈប្រព័ន្ធនិម្មិត ZOOM សរុបចំនួន ៣០០រូប។
