ថ្ងៃទី១៦ ខែមករា ឆ្នាំ២០២៦ លោកជំទាវឱសថការី លី គឹមអេង រដ្ឋលេខាធិការក្រសួងសុខាភិបាល និងជាក្រុមការងារទទួលបន្ទុកជួយពង្រឹងគុណភាពសេវាមណ្ឌលសុខភាពនៅក្នុងខេត្តចំនួន៧ (ខេត្តស្វាយរៀង ព្រៃវែង ត្បូងឃ្មុំ ក្រចេះ ស្ទឹងត្រែង រតនគិរី មណ្ឌលគិរិ) បានអញ្ជើញដឹកនាំកិច្ចប្រជុំស្តីពី លទ្ធផលការងារកែលម្អគុណភាពសេវាមណ្ឌលសុខភាពក្នុងឆ្នាំ២០២៥ និងផែនការសកម្មភាពពង្រឹងគុណភាពសេវាមណ្ឌលសុខភាពឆ្នាំ២០២៦ សម្រាប់ខេត្តទាំង១៣ (ខេត្តស្វាយរៀង ព្រៃវែង ត្បូងឃ្មុំ ក្រចេះ ស្ទឹងត្រែង រតនគិរី មណ្ឌលគិរិ កំពង់ចាម កំពង់ធំ សៀមរាប បន្ទាយមានជ័យ ព្រះវិហារ និងខេត្តឧត្តរមានជ័យ) តាមរយៈប្រព័ន្ធនិម្មិត Zoom meeting។
កិច្ចប្រជុំនេះមានគោលបំណង៖
១) ពិនិត្យទៅលើលទ្ធផលកែលម្អគុណភាពសេវាសំខាន់ៗ ធៀបនឹងផែនការឆ្នាំ២០២៥
២) ផែនការសកម្មភាពពង្រឹងគុណភាពសេវានៅតាមមណ្ឌលសុខភាពបន្តសម្រាប់ឆ្នាំ២០២៦
៣) បញ្ហាប្រឈម ផ្សេងៗ ដែលខេត្តទាំង១៣មាន និងស្វែងរកដំណោះស្រាយ។
កិច្ចប្រជុំនេះ មានការអញ្ជើញចូលរួមពី ឯកឧត្តម លោកជំទាវ ជាអភិបាលរងខេត្តទាំង១៣ ដែលទទួលបន្ទុកវិស័យសុខាភិបាល ប្រធានមន្ទីរសុខាភិបាលខេត្ត លោក លោកស្រី ជាមន្ត្រីការិយាល័យសុខាភិបាលស្រុកប្រតិបត្តិ និងប្រធានមណ្ឌលសុខភាពក្នុងខេត្តទាំង១៣ សរុប ៧៤រូប។
