រាជធានីភ្នំពេញ៖ ថ្ងៃអង្គារ ទី២០ ខែមករា ឆ្នាំ២០២៦ លោកជំទាវសាស្ត្រាចារ្យ អ៊ឹម សិទ្ធិការ្យ រដ្ឋលេខាធិការក្រសួងសុខាភិបាល និងជាប្រធានគណៈកម្មការ MPDSR ជាតិ បានអញ្ជើញដឹកនាំកិច្ចប្រជុំស្តីពី ការពិនិត្យ និងពិភាក្សាលើករណីមរណភាពមាតា នៅមន្ទីរពេទ្យបង្អែករាជធានីភ្នំពេញ ជាមួយគណៈកម្មការ MPDSR ជាតិ ក៏ដូចជាគណៈកម្មការ MPDSR ថ្នាក់មន្ទីរពេទ្យកាល់ម៉ែត។
ជាកិច្ចចាប់ផ្តើម អង្គប្រជុំបានរំលឹកឡើងវិញនូវក្រមសីលធ៌មសម្រាប់ប្រជុំរបស់គណៈកម្មការMPDSR ដោយសង្កត់ធ្វន់លើ វប្បធម៍នៃការមិនស្តីបន្ទោសគ្នា (No Blame Culture) ប៉ុន្តែប្រកាន់ភ្ជាប់នូវការទទួលខុសត្រូវខ្ពស់ ឬគណនេយ្យភាព (Accountability)។
កិច្ចប្រជុំនេះបានពិនិត្យ និងពិភាក្សាកែលំអរគុណភាពសេវាសុខភាពមាតា និងទារកក្រោមមន្ទីរសុខាភិបាលរាជធានីភ្នំពេញ ដោយផ្តោតលើទម្រង់ការណ៍កំណត់មូលហេតុនៃការស្លាប់ (MCCD) និងទម្រង់ការយឺតយ៉ាវទាំង៣ (3 Delays)។ បន្ថែមពីនេះ ក៏មានការពិភាក្សាអំពីប្រសិទ្ធភាពក្នុងការអនុវត្តការងារ ក្នុងការជួយស្រ្តី ក៏ដូចជាក្នុងការពិនិត្យមរណភាពមាតា និងទារក ជុំវិញកំណើត និងការឆ្លើយតប និងដើម្បីឈានទៅដល់ការរៀបចំផែនការលើកកម្ពស់គុណភាពសេវាសម្ពពកាន់តែមានប្រសិទ្ធភាពខ្ពស់។
លោកជំទាវសាស្រ្តាចារ្យ ប្រធានអង្គប្រជុំ បានបន្តក្រើនរំលឹកពីសារសំខាន់នៃការងារ MPDSR ដែលជាការងារគន្លឹះ និងជាអាទិភាពចម្បងរបស់ក្រសួងសុខាភិបាល ក៏ដូចជារាជរដ្ឋាភិបាល។ លោកជំទាវសាស្រ្តាចារ្យ ក៏បានជូននូវអនុសាសន៍គន្លឹះចំនួន៥ រួមមាន៖ (១) មូលហេតុចម្បងនៃមរណភាពមាតា គឺការធ្លាក់ឈាមក្រោយសម្រាល (២) ភាពយឺតយ៉ាវចម្បងដែលបានរកឃើញគឺ ភាពយឺតយ៉ាវទី៣ (Delay 3) រឺការយឺតយ៉ាវក្នុងការផ្តល់សេវាដែលសមស្រប (៣) មូលហេតុចម្បងនៃមរណភាពទារកជុំវិញកំណើត គឺការស្លាប់ទារកមុនពេលសម្រាល (Antepartum stillbirth) (៤) គន្លឹះជោគជ័យចម្បងគឺ កិច្ចសហការណ៍រវាងបុគ្គលិកសុខាភិបាលទាំងអស់ដែលពាក់ព័ន្ធ (ផ្នែកសម្ភព ផ្នែកប្រពោធនកម្មទារក ផ្នែកសង្គ្រោះបន្ទាន់ និងផ្នែកថ្នាំសណ្តំ) និង(៥) ថ្នាក់ដឹកនាំ (Leader) ដើរតួនាទីយ៉ាងសំខាន់ក្នុងការកំនត់ភាពជោគជ័យនៃការពិនិត្យមរណភាពមាតា និងទារក ជុំវិញកំណើតនិង ការឆ្លើយតប និងការលើកកម្ពស់គុណភាពសេវាសម្ពពកាន់តែមានប្រសិទ្ធភាពខ្ពស់។
កិច្ចប្រជុំនេះ រៀបចំដោយគណៈកម្មការពិនិត្យមរណភាពមាតា និងទារកជុំវិញកំណើត និងការឆ្លើយតបថ្នាក់ជាតិ ដោយមានការចូលរួមពី ឯកឧត្តមសាស្ត្រាចារ្យ លោកជំទាវសាស្ត្រាចារ្យ លោក លោកស្រីជាគណៈកម្មការជាតិពិនិត្យមរណភាពមាតា និងទារកជុំវិញកំណើត និងការឆ្លើយតបជាតិ គណៈកម្មការមន្ទីរពេទ្យកាល់ម៉ែត និងអង្គការមូលនិធិសហប្រជាជាតិសម្រាប់ប្រជាជន UNFPA សរុបចំនួន ៥៧រូប។
