រសៀលថ្ងៃចន្ទ ទី២៣ ខែកុម្ភៈ ឆ្នាំ២០២៦ លោកជំទាវសាស្ត្រាចារ្យ អ៊ឹម សិទ្ធិការ្យ រដ្ឋលេខាធិការក្រសួងសុខាភិបាល បានអញ្ជើញជាអធិបតីក្នុងពិធីបើកវគ្គបណ្តុះបណ្តាលស្តីពីការពង្រឹង ការកែលម្អគុណភាព នៃការថែទាំ និងសុវត្ថិភាពអ្នកជំងឺ សម្រាប់គិលានុបដ្ឋាក និងឆ្មប នៅមន្ទីរពេទ្យបង្អែក រាជធានី ខេត្ត តាមរយៈប្រព័ន្ធនិម្មិត Zoom។
វគ្គបណ្តុះបណ្តាលនេះមានគោលបំណងដូចខាងក្រោម៖
១. បណ្តះបណ្តាល SBAR ដល់គិលានុបដ្ឋាក និងឆ្មប ដើម្បីពង្រឹង និងជម្រុញការថែទាំឲ្យកាន់តែប្រសើរ
២. ពង្រឹងសមត្ថភាពបច្ចេកទេសនៃការថែទាំទៅតាមលក្ខណៈវិទ្យាសាស្ត្រ និងចំគោលដៅ
៣. ពង្រឹងគុណភាព ចំណេះដឹងដល់ប្រធានថែទាំនៅតាមមន្ទីរពេទ្យទូទាំងប្រទេស ដើម្បីសុវត្ថិភាពអ្នកជំងឺ
៤. ចំណុចអាទិភាពសំខាន់ៗ នៃការថែទាំដែលនឹងត្រូវអនុវត្តជាបន្តក្នុងវិស័យសុខាភិបាល ស្របតាមគោលនយោបាយថែទាំរបស់ក្រសួងសុខាភិបាល និងគោលនយោបាយរាជរដ្ឋាភិបាល។
ឆ្លៀតក្នុងឱកាសនោះ លោកជំទាវសាស្ត្រាចារ្យបានផ្តល់អនុសាសន៍ណែនាំដូចខាងក្រោម៖
១) មន្ទីរពេទ្យទាំងអស់ត្រូវអនុវត្តការផ្ទេរព័ត៌មានតាមរយៈ SBAR (២) ប្រធានថែទាំត្រូវជ្រើសរើសមន្រ្តីបង្គោលតាមដានការអនុវត្ត SBAR (៣) រៀបចំរូបភាព SBAR បិទតាមកន្លែងថែទាំជំងឺ (៤) ការធ្វើ M&E ជាប្រចាំខែ ប្រចាំត្រីមាស លើ SBAR។
លោកជំទាវសាស្ត្រាចារ្យក៏បានផ្តាំផ្ញើរដល់សិក្ខាកាម ត្រូវយកចិត្តទុកដាក់ លើចំណុចសំខាន់ៗនៃមេរៀន ដែលសុទ្ធសឹងតែមានសារៈប្រយោជន៍ ជួយដល់ការអភិវឌ្ឍវិស័យសុខាភិបាល។
សូមបញ្ជាក់ថា វគ្គបណ្តុះបណ្តាលនេះ មានការអញ្ជើញពី ឯកឧត្តម លោកជំទាវ លោក លោកស្រី ជាប្រធានថែទាំ និងមន្ត្រីរាជការ នៅតាមមន្ទីរពេទ្យជាតិ មន្ទីរពេទ្យបង្អែករាជធានី ខេត្ត ស្រុក ដែលមានវេជ្ជបណ្ឌិត ៤៧រូប គិលានុបដ្ឋាក ៣៥៨រូប និងឆ្មប ១៤៤រូប សរុបចំនួន ៥៤៩រូប។
