រាជធានីភ្នំពេញ៖ ព្រឹកថ្ងៃព្រហស្បតិ៍ ទី២៦ ខែកុម្ភៈ ឆ្នាំ២០២៦ នៅទីស្តីការក្រសួងសុខាភិបាល លោកជំទាវវេជ្ជបណ្ឌិត យក់ សម្បត្តិ រដ្ឋលេខាធិការ និងជានាយកគម្រោងមូលនិធិសកល នៃក្រសួងសុខាភិបាល បានទទួលជួបពិភាក្សាជាមួយ លោកស្រីវេជ្ជ Khin Zarlie Aye ប្រធានក្រុមទីប្រឹក្សាបច្ចេកទេស ដើម្បីធ្វើការបង្ហាញជូនសង្ខេបចំនុចសំខាន់ៗ ស្តីពីលទ្ធផលការពិនិត្យឡើងវិញ នៃការអនុវត្តកម្មវិធីអេដស៍ និងអាទិភាពសម្រាប់រៀបចំផែនការយុទ្ធសាស្រ្តបង្ការ ថែទាំ និងព្យាបាលរយៈពេល ឆ្នាំ២០២៦-២០៣០ ។
ជំនួបពិភាក្សានេះ បានផ្តោតលើចំនុចសំខាន់ៗ ដូចខាងក្រោម៖
-ការទទួលបានជោគជ័យ នៃការឆ្លើយតបនឹងមេរោគអេដស៍ ដោយសម្រេចបាន ៩២ ១០០ ៩៨ ធៀបនឹងគោលដៅ ៩៥ ៩៥ ៩៥
-អត្រាគ្របដណ្តប់លើសេវាបង្ការបាន ៩៣% នៃក្រុមប្រជាជនគន្លឹះ ហើយក្រុមប្រជាជនគន្លឹះទទួលបានសេវាបង្ការកើនឡើងពី ៥០% នៅឆ្នាំ ២០២១ ដល់ ៩៥% នៅឆ្នាំ ២០២៥
-អត្រាឆ្លងថ្មីនៃមេរោគអេដស៍បានថយចុះ ៤៥% គិតចាប់ពីឆ្នាំ ២០១០
-យុទ្ធសាស្ត្រផ្តោតលើការដោះស្រាយបញ្ហារើសអើង និងម៉ាក់ងាយក្នុងការទទួលបានសេវាថែទាំ និងព្យាបាលនៅតាមមូលដ្ឋានសុខាភិបាល និងកិច្ចសហការជាមួយសេវាឯកជន
-ប្រព័ន្ធព័ត៌មានសុខាភិបាល ធានាឱ្យការផ្សាភ្ជាប់គ្នាជាមួយព៌ត៌មានសេវាថែទាំ និងព្យាបាលជំងឺអេដស៍
-ការកៀរគរធនធាន ដើម្បីគាំទ្រនិរន្តភាព នៃកម្មវិធីឆ្លើយតបនឹងមេរោគអេដស៍ នៅកម្ពុជា។
លោកជំទាវរដ្ឋលេខាធិការ បានផ្តល់អនុសាសន៍បន្ថែមមួយចំនួនទៀត រួមមាន៖ ១)ត្រូវពិចារណាលើការធ្វើសហរណកម្មសេវាបង្ការ ថែទាំ និងព្យាបាលជំងឺអេដស៍ទៅក្នុងសេវាសុខាភិបាល (PHC, MPA, CPA) និង ២)ត្រូវធ្វើ Costing ផែនការយុទ្ធសាស្ត្របង្ការ ថែទាំ និងព្យាបាលជំងឺអេដស៍ ឆ្នាំ ២០២៦-២០៣០ ។
កិច្ចពិភាក្សា មានការអញ្ជើញចូលរួមពី ឯកឧត្តមវេជ្ជបណ្ឌិត ម៉ៅ តាន់អ៊ាង អនុរដ្ឋលេខាធិការក្រសួងសុខាភិបាល ឯកឧត្តមវេជ្ជបណ្ឌិត ហុក គឹមចេង អគ្គនាយកបច្ចេសទេសសុខាភិបាល លោកសាស្រ្តាចារ្យជំនួយ អ៊ុក វិជ្ជា ប្រធានមជ្ឈមណ្ឌលជាតិប្រយុទ្ធនឹងជំងឺអេដស៍ សើស្បែក និងកាមរោគ ព្រមទាំង លោកវេជ្ជ Ben Zinner ប្រធានអង្គការ CHAI ជាមួយសហការី។
