«សាស្ត្រាចារ្យ ឈាង រ៉ា បញ្ជាក់ពី បំណងរឹងមាំរបស់កម្ពុជា ក្នុងការចែករំលែកបទពិសោធន៍ និងបន្តសហការជិតស្និទ្ធជាមួយអង្គការសុខភាពពិភពលោកWHO ដើម្បីបញ្ចប់ជំងឺរបេង និងលើកកម្ពស់សុខុមាលភាពសាធារណៈ»
ឯកឧត្តមសាស្រ្តាចារ្យរដ្ឋមន្ត្រីក្រសួងសុខាភិបាល បានអនុញ្ញាតឱ្យ លោកស្រីវេជ្ជបណ្ឌិត Mariana Trias នាយកអង្គការសុខភាពពិភពលោក (WHO) ប្រចាំកម្ពុជា ចូលជួបពិភាក្សាការងារពាក់ព័ន្ធនឹងការរៀបចំ ទិវាប្រយុទ្ធប្រឆាំងជំងឺរបេងពិភពលោក២០២៦ និងកម្មវិធី World TB Day Online Talk Show ដែលនឹងប្រារព្ធនៅថ្ងៃទី១៨ ខែមីនា ឆ្នាំ២០២៦ ក្រោមប្រធានបទ « Yes! We Can End Tuberculosis »។
ភាគីទាំងពីរបានលើកសរសើរចំពោះជោគជ័យរបស់កម្ពុជា និងបានរំលឹកពីកិច្ចខិតខំជាមួយគ្នា និងជាមួយគ្រប់ដៃគូអភិវឌ្ឍជាតិ និងអន្តរជាតិដែលនៅតែបន្តនៅស្វិតស្វាញជាមួយកម្ពុជា ក្នុងការប្រយុទ្ធប្រឆាំងជំងឺរបេង ដែលរហូត WHO ទទួលស្គាល់ថា កម្ពុជាជាគំរូល្អលើពិភពលោក។
ក្នុងឱកាសនេះ ក៏បានពិភាក្សាអំពីវឌ្ឍនភាពដ៏ច្រើនគួរកត់សម្គាល់អំពីសុខាភិបាលកម្ពុជា និងតួនាទីរបស់សុខាភិបាលក្នុងបណ្តាញប្រទេសនិយាយភាសាបារាំង (Francophonie) ជាពិសេសក្នុងបរិបទរៀបចំកិច្ចប្រជុំកំពូល Francophonie ដែលនឹងប្រារព្ធនៅភ្នំពេញនាឆ្នាំនេះ។ ភាគីទាំងពីរក៏បានលើកឡើងបន្ថែមពីសារៈសំខាន់នៃការចូលរួមរបស់កម្ពុជា ក្នុងកិច្ចប្រជុំកំពូល One Health ពិភពលោក ដែលនឹងប្រារព្ធនៅទីក្រុង Lyon ប្រទេសបារាំង ក្នុងខែមេសាខាងមុខ។
រាជធានីភ្នំពេញ៖ នាព្រឹកថ្ងៃទី១២ ខែមីនា ឆ្នាំ២០២៦
