រាជធានីភ្នំពេញ៖ នាព្រឹកថ្ងៃទី១៣ ខែមីនា ឆ្នាំ២០២៦ នៅទីស្ដីការក្រសួងសុខាភិបាល លោកជំទាវវេជ្ជបណ្ឌិត យក់ សម្បត្តិ រដ្ឋលេខាធិការក្រសួងសុខាភិបាល បានទទួលជួបសម្តែងការគួរសម និងពិភាក្សាការងារជាមួយប្រតិភូ នៃមូលនិធិ GX Foundation ដោយលោកស្រីវេជ្ជបណ្ឌិត Grace Poon ដែលទើបទទួលបានការតែងតាំងថ្មី ជាប្រធាន នៃមូលនិធិ GX Foundation ប្រចាំកម្ពុជា។
ជាកិច្ចចាប់ផ្តើម លោកជំទាវរដ្ឋលេខាធិការ បានសម្ដែងនូវការអរគុណយ៉ាងជ្រាលជ្រៅចំពោះការចូលរួមចំណែករបស់មូលនិធិ GX Foundation គាំទ្រវិស័យសុខាភិបាលកម្ពុជានាពេលកន្លងមក ដែលនឹងរួមចំណែកលើកកម្ពស់សុខុមាលភាពប្រជាជនកម្ពុជា តាមរយៈការជួយកម្មវិធីប្រយុទ្ធនឹងជំងឺគ្រុនឈាម និងគម្រោងលុបបំបាត់ពិការភ្នែកដោយជំងឺភ្នែកឡើងបាយនៅខេត្តកំពង់ស្ពឺ។
ក្នុងឱកាសជំនួបនេះ លោក John Chung, Senior Advisor GX Foundation បានជម្រាប លោកជំទាវរដ្ឋលេខាធិការ អំពីកិច្ចសហប្រតិបត្តិការរវាងមូលនិធិ GX Foundation ជាមួយក្រសួងសុខាភិបាលនាពេលកន្លងមក និងបានធ្វើការណែនាំ លោកស្រីវេជ្ជបណ្ឌិត Grace Poon ជាប្រធាន ទើបទទួលបានការតែងតាំងថ្មី នៃមូលនិធិ GX Foundation ប្រចាំកម្ពុជា។
គោលបំណងក្នុងជំនួបនេះ បានពិភាក្សា៖
១) លទ្ធភាពនៃការពង្រីកគម្រោងលុបបំបាត់ជំងឺភ្នែកឡើងបាយនៅខេត្តផ្សេង បន្ទាប់ពីបញ្ចប់នៅខេត្តកំពង់ស្ពឺ
២) ការបន្តពង្រឹងកិច្ចសហប្រតិបត្តិការលើការងារប្រយុទ្ធនឹងជំងឺគ្រុនឈាម
៣) ពិភាក្សាសម្ភារៈអប់រំសុខភាពជំងឺគ្រុនឈាម។
ជំនួបពិភាក្សានេះ មានការអញ្ជើញចូលរួមពី ឯកឧត្តមវេជ្ជបណ្ឌិត ស៊ុង វិនតៈ រដ្ឋលេខាធិការក្រសួងសុខាភិបាល ឯកឧត្តមវេជ្ជបណ្ឌិត ហុក គឹមចេង អគ្គនាយកបច្ចេកទេសសុខាភិបាល លោកអនុប្រធាន នាយកដ្ឋានប្រយុទ្ធនឹងជំងឺឆ្លង មជ្ឈមណ្ឌលជាតិប្រយុទ្ធនឹងជំងឺគ្រុនចាញ់ ប៉ារ៉ាស៊ីតសាស្ត្រ និងបាណកសាស្ត្រ នៃក្រសួងសុខាភិបាល និងលោកអនុប្រធានមន្ទីរសុខាភិបាល នៃរដ្ឋបាលខេត្តកំពង់ស្ពឺ។
