ខេត្តសៀមរាប៖ ចាប់ពីថ្ងៃទី១០ ដល់ថ្ងៃទី១៣ ខែមិនា ឆ្នាំ២០២៦ លោកជំទាវវេជ្ជបណ្ឌិត ចាន់ សុខា អនុរដ្ឋលេខាធិការក្រសួងសុខាភិបាល បានចុះពិនិត្យស្ថានភាពសេវាសុខាភិបាល ថ្នាក់មណ្ឌលសុខភាព ក្នុងខេត្តសៀមរាប ដើម្បីជំរុញការកែលម្អគុណភាពសេវានៅតាមមណ្ឌលសុខភាព នៃព្រះរាជាណាចក្រកម្ពុជា ។
ការចុះពិនិត្យនេះបានផ្តោតទៅលើចំណុចសំខាន់មួយចំនួនរួមមាន៖
១. ហេដ្ឋារចនាសម្ព័ន្ធ បរិស្ថានក្នុង និងនៅជុំវិញមណ្ឌលសុខភាព
២. ការលើកកម្ពស់គុណភាព សុវត្ថិភាពអ្នកជំងឺ
៣. ការគ្រប់គ្រងធនធានមនុស្ស
៤. ការធ្វើបដិសណ្ឋារកិច្ចក្នុងការបម្រើសេវាថែទាំអ្នកជំងឺ
៥. ការបណ្តុះបណ្តាលបន្ថែមលើបច្ចេកទេស និងប្រព័ន្ធឌីជីថល
៦. ការគ្រប់គ្រងឱសថ និងសម្ភារៈបរិក្ខារពេទ្យ
៧. ការបំពេញការងារ និងប្រចាំការ ២៤ម៉ោង/២៤ម៉ោង ៧ថ្ងៃ/១សប្តាហ៍
៨. ការជំរុញថែទាំសុខភាពបឋម (BFC-BIG) នៅតាមមូលដ្ឋានសុខភាពសាធារណៈ និងនៅក្នុងសហគមន៍។
ឆ្លៀតក្នុងឱកាសនោះដែរ លោកជំទាវអនុរដ្ឋលេខាធិការ បាននាំនូវការផ្តាំផ្ញើរសួរសុខទុក្ខពី ឯកឧត្តមសាស្ត្រាចារ្យរដ្ឋមន្ត្រី ព្រមទាំងថ្លែងអំណរគុណដល់មន្ត្រីសុខាភិបាលទាំងអស់ ដែលបានខិតខំបំពេញការងារបម្រើសេវាថែទាំ និងព្យាបាលជំងឺជូនប្រជាពលរដ្ឋ ក្នុងមូលដ្ឋានបានល្អប្រសើរ។
គួរបញ្ជាក់ផងដែរថា ការចុះពិនិត្យនោះ ក៏មានការចូលរួមសម្របសម្រួលពីមន្ត្រីមន្ទីរសុខាភិបាល នៃរដ្ឋបាលខេត្តសៀមរាប។
