ថ្ងៃទី ១៧ ខែ មិថុនា ឆ្នាំ ២០២៦
ពីប្រទេសបារាំង៖ នាថ្ងៃទី១៦ ខែមិថុនា ឆ្នាំ២០២៦ ចាប់ពីវេលាម៉ោង ៧:០០នាទីយប់ លោកជំទាវវេជ្ជបណ្ឌិត យក់ សម្បត្តិ រដ្ឋលេខាធិការក្រសួងសុខាភិបាល និងជាប្រធានគណៈកម្មការអន្តរក្រសួងសម្រាប់សម្របសម្រួលសុខភាពតែមួយ (IMCC) បានដឹកនាំក្រុមការងារគណៈកម្មការអន្តរក្រសួងចូលរួមកិច្ចប្រជុំលេីកទីមួយ ដែលមានសមាសភាពមកពី ក្រសួងសុខាភិបាល កសិកម្ម រុក្ខាប្រមាញ់និងនេសាទ និងបរិស្ថាន ចូលរួមតាមប្រព័ន្ធនិមិ្មត (Video Conference) ។
កិច្ចប្រជុំនេះបានរៀបចំឡើងដោយរដ្ឋាភិបាលនៃសាធារណរដ្ឋបារាំង ដែលដឹកនាំកិច្ចប្រជុំដោយ Ambassador Benoît Faraco, (France's Ambassador for Climate Change Negotiations, Decarbonized Energy, and Climate Risk Prevention) ក្នុងគោលបំណងពិភាក្សាលើ ៣ចំនុចដូចខាងក្រោម៖
១) ជំហានបន្តបន្ទាប់ និងសមិទ្ធផលសំខាន់ៗ ដែលនឹងត្រូវអនុវត្តរបស់ប្រទេសដែលជាដៃគូសម្ព័ន្ធភាព
២) សេចក្តីព្រាងផែនការសកម្មភាព សម្រាប់ One Health & Beyond initiative
៣) ការផ្លាស់ប្តូរមតិយោបល់ និងពិភាក្សាអំពីវិស័យដែលអាចធ្វើកិច្ចសហប្រតិបត្តិការ និងសម្របសម្រួលរួមគ្នានាពេលអនាគត
នៅក្នុងកិច្ចពិភាក្សាតុមូល (Roundtable Discussion) លោកជំទាវវេជ្ជបណ្ឌិត យក់ សម្បត្តិ ជាតំណាងប្រទេសកម្ពុជា បានអញ្ជើញឡើងមានមតិយោបល់ ដើម្បីឆ្លើយតបទៅនឹងសំណួរគន្លឹះ ស្តីពីមូលហេតុនៃការចូលរួមជាប្រទេសដៃគូសម្ព័ន្ធភាព អាទិភាពការងារ និងគោលដៅរយៈពេល ១២ខែខាងមុខ របស់ប្រទេសដែលជាដៃគូសម្ព័ន្ធភាព។
កិច្ចប្រជុំនេះមានការចូលរួមពីបណ្តាប្រទេសដែលជាដៃគូសម្ព័ន្ធភាព សរុបចំនួន ១៤ ប្រទេស រួមមាន៖ អាមេនី បុតស្វាណា ប្រេស៊ីល កម្ពុជា កុងហ្គោ ស៊ីប្រុស អេហ្ស៊ីប បារាំង កេនយ៉ា ម៉ិកស៊ិក សិង្ហបុរី ថៃ ទុយនេស៊ី និងអេមីរ៉ាតអារ៉ាប់រួម។
