ថ្ងៃទី ២៩ ខែ មិថុនា ឆ្នាំ ២០២៦
រដ្ឋមន្រ្តីសុខាភិបាល៖ «កិច្ចប្រជុំពហុជំនាញមិនមែនគ្រាន់តែជាការផ្លាស់ប្តូរយោបល់ផ្នែកវេជ្ជសាស្ត្រនោះទេ ការជួបជុំនេះឆ្លុះបញ្ចាំងពីគុណភាពនៃការគ្រប់គ្រងមន្ទីរពេទ្យ ដោយផ្អែកលើការស្តាប់ ការគោរពគ្នាក្នុងជំនាញវិទ្យាសាស្ត្រ និងការទទួលខុសត្រូវរួមគ្នា ដែលអនុញ្ញាតឱ្យយើងផ្តល់ជូនអ្នកជំងឺនូវការថែទាំសង្រ្គោះព្យាបាល ដែលមានសុវត្ថិភាព ប្រសិទ្ធភាព និងមនុស្សធម៌កាន់តែប្រសើ។»
នាព្រឹកថ្ងៃចន្ទ ទី២៩ ខែមិថុនា ឆ្នាំ២០២៦ ឯកឧត្តមសាស្រ្តាចារ្យ ឈាង រ៉ា រដ្ឋមន្រ្តីក្រសួងសុខាភិបាល បានឆ្លៀតអញ្ជើញចូលរួមក្នុងកិច្ចប្រជុំបច្ចេកទេសពហុជំនាញ នៃការពិនិត្យវឌ្ឍនភាពការងារប្រចាំថ្ងៃ ក្នុងការបម្រើសេវាពិនិត្យ ព្យាបាល ថែទាំ និងបានផ្តល់អនុសាសន៍ណែនាំសំខាន់ៗដល់ថ្នាក់ដឹកនាំមន្ទីរពេទ្យ គ្រូពេទ្យ បុគ្គលិក និងមន្រ្តីរាជការ នៅមន្ទីរពេទ្យមិត្តភាពខ្មែរ-សូវៀត ដើម្បីធ្វើយ៉ាងណាពង្រឹងសមត្ថភាព កសាងទំនុកចិត្ត ធ្វើរោគវិនិច័្ឆយ ព្យាបាល ជូនប្រជាពលរដ្ឋ។
