ថ្ងៃទី ០៣ ខែ កក្កដា ឆ្នាំ ២០២៦
សាធារណរដ្ឋប្រជាធិបតេយ្យប្រជាមានិតឡាវ៖ ចាប់ពីថ្ងៃទី៣០ ខែមិថុនា ដល់ថ្ងៃទី១ ខែកក្កដា ឆ្នាំ២០២៦ ឯកឧត្តមវេជ្ជបណ្ឌិត ឡូ វាសនាគិរី រដ្ឋលេខាធិការក្រសួងសុខាភិបាល បានដឹកនាំក្រុមការងារ ចូលរួមកិច្ចប្រជុំប្រចាំឆ្នាំ នៃក្រុមការងារសហប្រតិបត្តិការ សុខាភិបាលក្នុងមហាអនុតំបន់ទន្លេមេគង្គ (Greater Mekong Subregion Working Group on Health Cooperation – GMS WGHC Annual Meeting) ដែលបានប្រព្រឹត្តទៅនៅ ខេត្តហ្លួងព្រះបាង សាធារណរដ្ឋប្រជាធិបតេយ្យប្រជាមានិតឡាវ។
កិច្ចប្រជុំមានគោលបំណងពិនិត្យវឌ្ឍនភាពនៃការអនុវត្ត យុទ្ធសាស្ត្រកិច្ចសហប្រតិបត្តិការសុខាភិបាល ក្នុងមហាអនុតំបន់ទន្លេមេគង្គ ឆ្នាំ២០២៤–២០៣០ (GMS Health Cooperation Strategy 2024–2030) ពិភាក្សាអំពីអាទិភាពថ្មីៗ សម្រាប់កិច្ចសហប្រតិបត្តិការក្នុងតំបន់ និងកំណត់ទិសដៅសកម្មភាព សម្រាប់ឆ្នាំ សម្រាប់រៀបចំក្របខណ្ឌវិនិយោគក្នុងតំបន់ សម្រាប់ឆ្នាំ២០២៧–២០២៩ សំដៅពង្រឹង សន្តិសុខសុខភាព ការអភិវឌ្ឍប្រព័ន្ធសុខាភិបាល និងការលើក កម្ពស់សុខុមាលភាពរបស់ប្រជាជន ក្នុងមហាអនុតំបន់ទន្លេមេគង្គ។
កិច្ចប្រជុំនេះត្រូវបានរៀបចំឡើងក្រោមការគាំទ្ររបស់ធនាគារអភិវឌ្ឍន៍អាស៊ី (ADB) ក្នុងក្របខណ្ឌគម្រោង Technical Assistance 10466-REG: Strengthening Regional Health Cooperation in the Greater Mekong Subregion – Phase 2 ដោយមានការចូលរួមពីតំណាងក្រសួងសុខាភិបាល នៃបណ្តាប្រទេសសមាជិកអនុតំបន់មហាទន្លេមេគង្គ រួមមាន ព្រះរាជាណាចក្រកម្ពុជា សាធារណរដ្ឋប្រជា ធិបតេយ្យប្រជាមានិតឡាវ ព្រះរាជាណាចក្រថៃ សាធារណរដ្ឋសង្គមនិយមវៀតណាម សាធារណរដ្ឋសហភាពមីយ៉ាន់ម៉ា និងសាធារណរដ្ឋប្រជាមានិតចិន ព្រមទាំងតំណាងធនាគារអភិវឌ្ឍន៍អាស៊ី (ADB) អង្គការអន្តរជាតិ និងដៃគូអភិវឌ្ឍន៍ពាក់ព័ន្ធ។
