ថ្ងៃទី ១៦ ខែ សីហា ឆ្នាំ ២០២៦
ខេត្តបាត់ដំបង៖ ថ្ងៃទី១៣ ខែសីហា ឆ្នាំ២០២៦ ក្រុមការងារតាមដានវឌ្ឍនភាពនៃការគ្រប់គ្រងជំងឺគ្រុនឈាមនៃក្រសួងសុខាភិបាលតាមបណ្តារាជធានី ខេត្ត ដឹកនាំដោយឯកឧត្ដមឱសថការី អ៊ូ វិភព រដ្ឋលេខាធិការ និងឯកឧត្ដមសាស្ត្រាចារ្យរង ហេង សុទ្ធី អនុរដ្ឋលេខាធិការ បានអញ្ជើញជាអធិបតីក្នុងពិធីបើក វគ្គបណ្តុះបណ្តាលស្តីពី ការគ្រប់គ្រង ព្យាបាល និងថែទាំជំងឺគ្រុនឈាម ដើម្បីឆ្លើយតបនឹងការកើនឡើងនៃជំងឺគ្រុនឈាម ដោយសហការជាមួយមន្ទីរពេទ្យជ័យវរ្ម័នទី៧។
គោលបំណងសំខាន់នៃវគ្គបណ្ដុះបណ្ដាលនេះគឺ ដើម្បីធ្វើវិក្រឹតការ ចែករំលែកបទពិសោធន៍ ជំនាញបច្ចេកទេស និងវិធានការព្យាបាលថ្មីៗ ដើម្បីធានាបាននូវការធ្វើរោគវិនិច្ឆ័យជំងឺគ្រុនឈាមបានឆាប់រហ័ស ត្រឹមត្រូវ និងការព្យាបាលប្រកបដោយប្រសិទ្ធភាពខ្ពស់។
ព្រឹកថ្ងៃទី១៣ ខែសីហា ឆ្នាំ២០២៦ ថ្នាក់ដឹកនាំទាំងពីររូបបានជួបសំណេះសំណាលក្នុងពិធីបើកបើកវគ្គបណ្តុះបណ្តាល ដោយផ្តល់នូវអនុសាសន៍ដល់សិក្ខាកាមឱ្យយកចិត្តទុកដាក់ក្នុងការរៀនសូត្រពីសាស្រ្តាចារ្យ ដែលជាអ្នកឯកទេសនៃជំងឺគ្រុនឈាម ក្នុងគោលបំណងពង្រឹងសមត្ថភាពក្នុងការក្លាយជាគ្រូបង្គោលជាប្រចាំមន្ទីរពេទ្យរបស់ខ្លួន សម្រាប់ការបណ្តុះបណ្តាលបន្ត ទៅដល់សហការីជាគ្រូពេទ្យ ជាគិលានុបដ្ឋាកនៅពេលបន្តបន្ទាប់ទៀត។
បន្ទាប់ពីពិធីបើកវគ្គរួច ថ្នាក់ដឹកនាំ បានអញ្ជើញចុះអភិបាលពិនិត្យការថែទាំ និងព្យាបាលអ្នកជំងឺគ្រុនឈាមនៅមន្ទីរពេទ្យបង្អែកខេត្តបាត់ដំបង មន្ទីរពេទ្យបង្អែកស្រុកថ្មគោល មណ្ឌលសុខភាពជ្រៃ រដ្ឋបាលឃុំជ្រៃ និងចុះតាមខ្នងផ្ទះមេីលតាមពាងទឹករបស់អ្នកភូមិមួយចំនួន ដេីម្បីអប់រំពីការដាក់ថ្នាំអាបែតបន្ថែម។
រសៀលថ្ងៃទី១៣ ខែសីហា ឆ្នាំ២០២៦ ក៏បានជួបពិភាក្សាការងារជាមួយតំណាងមន្ទីរសុខាភិបាលខេត្ត តំណាងការិយាល័យស្រុកប្រតិបត្តិ និងមន្ទីរពេទ្យនានាទូទាំងខេត្ត ដែលផ្តោតលើ៖
-ការងារគ្រប់គ្រង និងបំបាត់ជម្រកមូសដែលជាភ្នាក់ងារចម្លងជំងឺគ្រុនឈាម។
-ការងារគ្រប់គ្រង បែងចែកអ្នកជំងឺសម្រាកពេទ្យ ជាពិសេសអ្នកជំងឹគ្រុនឈាម ដែលកំពុងតែមានចំនួនច្រើន ឱ្យសមស្រប ប្រកបដោយលក្ខណៈបច្ចេកទេស ដើម្បីការថែទាំ ព្យាបាលនិងតាមដានជំងឺប្រកបដោយប្រសិទ្ធភាព គុណភាព និងសុវត្ថិភាព។
-ការងារបញ្ជូនអ្នកជំងឺទៅមន្ទីរពេទ្យដែលមានកម្រិតខ្ពស់ជាង ឱ្យទាន់ពេលវេលា តាមបទដ្ឋានបច្ចេកទេស និងប្រកបដោយសុវត្ថិភាព។
សូមបញ្ជាក់ផងដែរថា វគ្គបណ្ដុះបណ្ដាលនេះមានការចូលរួមយ៉ាងយកចិត្តទុកដាក់ពី លោក លោកស្រី ជាវេជ្ជបណ្ឌិត គ្រូពេទ្យព្យាបាល និងគិលានុបដ្ឋាក មកពីគ្រប់មន្ទីរពេទ្យសាធារណៈ និងឯកជន នៃខេត្តបាត់ដំបង។
