ថ្ងៃទី ០៣ ខែ តុលា ឆ្នាំ ២០២៦
រាជធានីភ្នំពេញ៖ នាព្រឹកថ្ងៃសុក្រ ទី២ ខែតុលា ឆ្នាំ២០២៦ នៅសណ្ឋាគាររ៉េស៊ីដង់សុខាភ្នំពេញ លោកជំទាវវេជ្ជបណ្ឌិត យក់ សម្បត្តិ រដ្ឋលេខាធិការក្រសួងសុខាភិបាល និងជាប្រធានអនុគណៈកម្មការទី៧ បានដឹកនាំក្រុមការងារក្រសួងសុខាភិបាល ចូលរួមក្នុងកិច្ចប្រជុំដែលរៀបចំដោយ ក្រសួងការបរទេស និងសហប្រតិបត្តិការអន្តរជាតិ ដើម្បីផ្សព្វផ្សាយការត្រៀមលក្ខណៈ របស់កម្ពុជាសម្រាប់កិច្ចប្រជុំកំពូលហ្វ្រង់កូហ្វូនីលើកទី២០ ដែលព្រះរាជាណាចក្រកម្ពុជាធ្វើជាម្ចាស់ផ្ទះរៀបចំកិច្ចប្រជុំកំពូលលក្ខណៈអន្តរជាតិ និងប្រវត្តិសាស្ត្រ។
ក្នុងឱកាសនោះ ឯកឧត្តមវេជ្ជបណ្ឌិត ហុក គីមចេង អគ្គនាយកបច្ចេកទេសសុខាភិបាល បានធ្វើបទបង្ហាញជូនអង្គទូត និងមន្ត្រីពាក់ព័ន្ធ អំពីនីតិវិធីដែលកម្ពុជាបានរៀបចំសម្រាប់ការត្រួតពិនិត្យ និងគ្រប់គ្រងហានិភ័យជំងឺឆ្លងនៅច្រកចូលប្រទេស ជាពិសេសសម្រាប់អ្នកដំណើរមកពីតំបន់ដែលមានហានិភ័យជំងឺអេបូឡា។
បទបង្ហាញបានផ្តោតសំខាន់លើការពង្រឹងប្រព័ន្ធ តាមដាន និងឃ្លាំមើលជំងឺ ការរកឃើញករណីសង្ស័យឱ្យបានឆាប់រហ័ស ការរាយការណ៍ និងការឆ្លើយតបជាបន្ទាន់ ការអនុវត្តវិធានការបង្ការ និងគ្រប់គ្រងការឆ្លងមេរោគ (IPC) ព្រមទាំងការរៀបចំសមត្ថភាព និងធនធានចាំបាច់សម្រាប់ការគ្រប់គ្រងករណីជំងឺឆ្លង។
ក្រសួងសុខាភិបាល បានបញ្ជាក់អំពីសារៈសំខាន់នៃ កិច្ចសហការអន្តរជាតិ និងការសម្របសម្រួលជាមួយភាគីពាក់ព័ន្ធ ក្នុងការត្រៀមលក្ខណៈ បង្ការ ការរកឃើញ និងឆ្លើយតបចំពោះជំងឺឆ្លងប្រកបដោយប្រសិទ្ធភាព និងទាន់ពេលវេលា។
ក្រសួងសុខាភិបាលនឹងបន្តពង្រឹងសមត្ថភាព និងប្រព័ន្ធសុខាភិបាល ក្នុងការត្រៀមលក្ខណៈ និងឆ្លើយតបចំពោះជំងឺឆ្លង និងហានិភ័យសុខភាពសាធារណៈ ស្របតាមគោលការណ៍បច្ចេកទេស និងបទដ្ឋានសុខាភិបាលអន្តរជាតិ ដើម្បីការពារសុខភាព និងសុវត្ថិភាពរបស់ប្រជាពលរដ្ឋ និងចូលរួមធានាសន្តិសុខសុខភាពរបស់ព្រះរាជាណាចក្រកម្ពុជា។
