ថ្ងៃទី ១៥ ខែ តុលា ឆ្នាំ ២០២៦
ខេត្តពោធិ៍សាត់៖ ថ្ងៃទី១៤ ខែតុលា ឆ្នាំ២០២៦ ឯកឧត្តមវេជ្ជបណ្ឌិត សាន់ សាប់អី រដ្ឋលេខាធិការ និងជាប្រធានលេខាធិការដ្ឋានគ្រប់គ្រងគ្រោះមហន្តរាយ ក្រសួងសុខាភិបាល ឯកឧត្តមវេជ្ជបណ្ឌិត ខូយ ឌី អនុរដ្ឋលេខាធិការ រួមទាំងក្រុមការងារគ្រោះមហន្តរាយមន្ទីរ សុខាភិបាលខេត្តពោធិសាត់ និងការិយាល័យស្រុកប្រតបត្តិ ក្រគរ បានចុះពិនិត្យមើលស្ថានភាពទឹកជំនន់ទឹកភ្លៀង ជន់លិចមន្ទីរពេទ្យបង្អែក ស្រុកក្រគរ ខេត្តពោធិ៍សាត់ ដែលប៉ះពាល់ដល់ការបម្រើសេវាមួយចំនួន។
ឯកឧត្តមរដ្ឋលេខាធិការ និងក្រុមការងារបានឱ្យខាងមន្ទីរពេទ្យ ជន្លៀសជញ្ជូនសម្ភារ បរិក្ខារពេទ្យ និងឧបករណ៍ផ្សេងៗ ចេញឱ្យបានទាន់ពេល ដើម្បីកុំឱ្យរងការខូចខាតដោយសារការជន់លិច ព្រមទាំងជន្លៀសអ្នកជំងឺទៅសម្រាកនៅទីតាំង សុវត្ថិភាព ដោយមានការគាំទ្រពីអាជ្ញាធរមូលដ្ឋាន និងបន្តធ្វេីការតាមដានពីស្ថានភាពទឹកជំនន់ ព្រមទាំង បង្កើនការប្រុងប្រយ័ត្នឱ្យបានខ្ពស់បំផុត។
នៅរសៀលថ្ងៃដដែលនេះ ទឹកចាប់ផ្តើមស្រកជាបន្តបន្ទាប់ ឯកឧត្តមវេជ្ជបណ្ឌិត បានដឹកនាំក្រុមការងារ ដែលបានមានការចូលរួមពីថ្នាក់ដឹកនាំ ស្រុក លោកគ្រូអ្នកគ្រូយុវជន កងកំលាំង ប្រមាណ ៥០នាក់ ធ្វើការលាងសំអាត អគារ បាញ់ថ្នាំសម្លាប់មេរោគ និងពិនិត្យប្រព័ន្ធអគ្គីសនីឡើងវិញ ដើម្បីត្រៀមរៀបចំដំណើរការ បម្រើសេវាសុខាភិបាលជូនប្អូនប្រជាពលរដ្ឋឡើងវិញ។
