ថ្ងៃទី ២៨ ខែ តុលា ឆ្នាំ ២០២៦
រាជធានីភ្នំពេញ៖ នៅព្រឹកថ្ងៃពុធ ២រោច ខែអស្សុជ ឆ្នាំមមី អដ្ឋស័ក ព.ស.២៥៧០ ត្រូវនឹងថ្ងៃទី២៨ ខែតុលា ឆ្នាំ២០២៦ ក្រសួងសុខាភិបាលបានរៀបចំកិច្ចប្រជុំលើកទី៤ នៃគណៈកម្មាធិការត្រួតពិនិត្យផលិតផលថ្នាំជក់ ក្រោមអធិបតីភាព ឯកឧត្តមសាស្រ្តាចារ្យ ឈាង រ៉ា រដ្ឋមន្ត្រីក្រសួងសុខាភិបាល និងជាប្រធានគណៈកម្មាធិការត្រួតពិនិត្យផលិតផលថ្នាំជក់ ដើម្បីពិនិត្យវឌ្ឍនភាពការងារត្រួតពិនិត្យផលិតផលថ្នាំជក់ និងពិនិត្យសម្រេចលើសេចក្តីព្រាងផែនការយុទ្ធសាស្ត្រ ស្តីពីការត្រួតពិនិត្យផលិតផលថ្នាំជក់២០២៧–២០៣១។
កិច្ចប្រជុំមានការអញ្ជើញចូលរួមពី អនុប្រធាន និងសមាជិក សមាជិកា នៃគណៈកម្មាធិកាត្រួតពិនិត្យផលិតផលថ្នាំជក់ ដែលអញ្ជើញមកពីក្រសួង ស្ថាប័នពាក់ព័ន្ធ និងរដ្ឋបាលរាជធានី ខេត្តទាំង២៥ ព្រមទាំងតំណាងអង្គភាពពាក់ព័ន្ធ សរុបចំនួន ៨៧រូប។
កិច្ចប្រជុំបង្ហាញពីវឌ្ឍនភាព នៃការងារត្រួតពិនិត្យផលិតផលថ្នាំជក់នៅកម្ពុជា តាមរយៈកិច្ចខិតខំប្រឹងប្រែងរបស់ក្រសួងសុខាភិបាល និងក្រសួង ស្ថាប័នពាក់ព័ន្ធ ក្នុងការចូលរួមពង្រឹងការអនុវត្តច្បាប់ អនុក្រឹត្យ និងប្រកាសនានា ស្តីពីការត្រួតពិនិត្យផលិតផលថ្នាំជក់ ការអប់រំផ្លាស់ប្តូរឥរិយាបថ ការជំរុញសេវាផ្តល់ប្រឹក្សាលះបង់ទម្លាប់ប្រើប្រាស់ផលិតផលថ្នាំជក់ រួមទាំងការបង្ក្រាបផលិតផលថ្នាំខុសច្បាប់និងក្លែងក្លាយ និងបារីអេឡិចត្រូនិក។ លើសពីនេះ អង្គប្រជុំក៏បានពិភាក្សាយ៉ាងផុលផុស ដើម្បីរកដំណោះស្រាយនូវបញ្ហាប្រឈមនានា ក្នុងអំឡុងពេលអនុវត្តការងារត្រួតពិនិត្យផលិតផលថ្នាំជក់កន្លងមក ព្រមទាំងបានបញ្ចប់ការពិនិត្យ និងសម្រេចលើផែនការយុទ្ធសាស្ត្រ ស្តីពីការត្រួតពិនិត្យផលិតផលថ្នាំជក់ ២០២៧-២០៣១ ដោយជោគជ័យផងដែរ។
ឯកឧត្តមសាស្ត្រាចារ្យរដ្ឋមន្ត្រី បានអំពាវនាវដល់ក្រសួង ស្ថាប័នពាក់ព័ន្ធ រដ្ឋបាលរាជធានី ខេត្ត មន្ទីរសុខាភិបាលរាជធានី ខេត្ត ព្រមទាំងភាគីពាក់ព័ន្ធ រួមគ្នាបន្តអនុវត្តការងារត្រួតពិនិត្យផលិតផលថ្នាំជក់បន្ថែមទៀត ពិនិត្យ លើបញ្ហាប្រឈមនៃការអនវុត្តអន្តរាគមន៍កន្លងមក កំណត់នូវអាទិភាព យន្តការ និងកិច្ចសហការឱ្យកាន់តែមានប្រសិទ្ធភាពជាងមុន ដើម្បីការពារមនុស្សជំនាន់នេះ និងជំនាន់ថ្មីពីហានិភ័យ នៃការប្រើប្រាស់ផលិតផលថ្នាំជក់ និងការស្រូបផ្សែងផលិតផលថ្នាំជក់ ដោយ៖
១. រដ្ឋបាលរាជធានី ខេត្ត និងមន្ទីរសុខាភិបាលរាជធានី ខេត្ត ប្រើប្រាស់ផែនការយុទ្ធសាស្ត្រ ស្តីពីការត្រួតពិនិត្យផលិតផលថ្នាំជក់ ២០២៧–២០៣១ ដើម្បីធ្វើផែនការប្រចាំឆ្នាំដោយដាក់បញ្ចូលសកម្មភាពការងារត្រួតពិនិត្យផលិតផលថ្នាំជក់ឱ្យមានប្រសិទ្ធភាព។
២. ជំរុញការតាមដាន និងអនុវត្តជាប្រចាំ នូវការបង្ក្រាបផលិតផលថ្នាំជក់ខុសច្បាប់ និងក្លែងក្លាយ និងបារី អេឡិចត្រូនិក ដោយពង្រឹងកិច្ចសហការរវាងស្ថាប័នមានសមត្ថកិច្ច និងអាជ្ញាធររាជធានី-ខេត្ត ក្នុងការតាមដាន និងចាត់វិធានការបង្ក្រាប ទីតាំងផលិតស្តុកទុក និងចែកចាយផលិតផលថ្នាំជក់ខុសច្បាប់ និងក្លែងក្លាយ និងបារីអេឡិចត្រូនិក។
៣. ក្រសួង ស្ថាប័នពាក់ព័ន្ធ បន្តពង្រឹងការតាមដានការអនុវត្តច្បាប់ និងលិខិតបទដ្ឋានគតិយុត្តស្តីពីការត្រួតពិនិត្យផលិតផលថ្នាំជក់ ជាពិសេសវិធានការហាមឃាត់ការផ្សាយពាណិជ្ជកម្ម ការផ្សព្វផ្សាយលក់ និងការឧបត្ថម្ភកម្មវិធីដោយឧស្សាហកម្មថ្នាំជក់ ការបោះពុម្ពសារព្រមានសុខភាពជារូបភាព និងភាសាខ្មែរលើកញ្ចប់ផលិតផលថ្នាំជក់ និងវិធានការហាមជក់ ឬបង្ហុយផ្សែងថ្នាំជក់នៅកន្លែងធ្វើការ និងកន្លែងសាធារណៈ។
៤. បន្តជំរុញការអប់រំផ្សព្វផ្សាយអំពីផលប៉ះពាល់នៃផលិតផលថ្នាំជក់ និងបារីអេឡិចត្រូនិកឱ្យបានទូលំទូលាយ ជាពិសេសដល់សិស្ស និស្សិត យុវជន មន្ត្រីរាជការ និងប្រជាពលរដ្ឋ បង្កើនការយល់ដឹង និងលើកទឹកចិត្តឱ្យជៀសវាងការចាប់ផ្តើមប្រើប្រាស់ ឬលះបង់ការប្រើប្រាស់។
៥. ពង្រឹងការអនុវត្តបទបញ្ជាលេខ ០២ បប របស់រាជរដ្ឋាភិបាល ស្តីពីការហាមឃាត់ការនាំចូល ការចែកចាយ ការលក់ ការផ្សាយពាណិជ្ជកម្ម ការប្រើប្រាស់ ការកាន់កាប់ ការផលិត និងការស្តុកទុកឧបករណ៍អេឡិចត្រូនិក សារធាតុគីមីសម្រាប់ជក់ និងស៊ីស្សា តាមសមត្ថកិច្ចរបស់ក្រសួង ស្ថាប័ននីមួយៗ ដើម្បីការពារកុមារ និងយុវជនពីផលិតផលដែលបង្កហានិភ័យដល់សុខភាព។
