រាជធានីភ្នំពេញ៖ នាព្រឹកថ្ងៃពុធ ១០រោច ខែពិសាខ ឆ្នាំម្សាញ់ សប្តស័ក ព.ស.២៥៦៩ ត្រូវនឹងថ្ងៃទី២១ ខែឧសភា ឆ្នាំ២០២៥ នៅទីស្ដីការក្រសួងសុខាភិបាល ដោយទទួលបានការអនុញ្ញាតដ៏ខ្ពង់ខ្ពស់ពី ឯកឧត្តមសាស្ត្រាចារ្យ ឈាង រ៉ា រដ្ឋមន្ត្រីក្រសួងសុខាភិបាល ឯកឧត្តមវេជ្ជបណ្ឌិត ង៉ូវ កាង រដ្ឋលេខាធិការក្រសួងសុខាភិបាល បានទទួលជួបពិភាក្សាការងារជាមួយ លោកស្រី Sarah Gasquard ភារធារីស្ដីទីនៃស្ថានឯកអគ្គរាជទូតបែលហ្សិកប្រចាំព្រះរាជាណាចក្រកម្ពុជា និងគណៈប្រតិភូពីភ្នាក់ងារវិនិយោគ (AWEX) និងក្រុមហ៊ុន ECOSTERYL ស្ដីពីកិច្ចសហប្រតិបត្តិការលើការវិនិយោគគម្រោងគ្រប់គ្រង និងកែច្នៃសំណល់វេជ្ជសាស្ត្រ។
ជាកិច្ចចាប់ផ្តើម ឯកឧត្តមរដ្ឋលេខាធិការ បានស្វាគមន៍ លោកស្រីភារធារីស្ដីទី Sarah Gasquard និងគណៈប្រតិភូដែលបានចូលជួបសម្ដែងការគួរសម និងពិភាក្សាការងារនៅពេលនេះ។ លោកស្រី ភារ ធារី ស្ដីទី Sarah Gasquard បានវាយតម្លៃខ្ពស់ទៅលើវឌ្ឍនភាព និងការរីកចម្រើនយ៉ាងឆាប់រហ័សនៃវិស័យសុខាភិបាលនៅកម្ពុជា។
ឯកឧត្តមរដ្ឋលេខាធិការ បានថ្លែងអំណរគុណដល់ក្រុមហ៊ុន ECOSTERYL ដែលមានបំណងមកវិនិយោគក្នុងការគ្រប់គ្រង និងកែច្នៃសំណល់វេជ្ជសាស្ត្រ និងបានអនុញ្ញាតឱ្យខាងក្រុមហ៊ុនបង្ហាញអំពីគោលបំណង។ បន្ទាប់ពីបានស្ដាប់គោលបំណងរបស់ភាគីក្រុមហ៊ុនរួចមកឯកឧត្តមរដ្ឋលេខាធិការបានជូនជាយោបល់ឱ្យក្រុមហ៊ុនជួបពិភាក្សាការងារជាមួយក្រុមការងារបច្ចេកទេសដែលមាននាយកដ្ឋានមន្ទីរពេទ្យ នាយកដ្ឋានទំនាក់ទំនងអន្តរជាតិ និងនាយកដ្ឋានពាក់ព័ន្ធមួយចំនួនទៀតដើម្បីរៀបចំកំណត់ជាផែនការគម្រោងជាក់លាក់ និងដាក់ជូនឯកឧត្តមសាស្ត្រាចារ្យរដ្ឋមន្ត្រីក្រសួងសុខាភិបាលពិនិត្យនិងផ្ដល់យោបល់មុននឹងឈានទៅដល់ការដាក់ដំណើរការគម្រោង។
លោកស្រី ភារ ធារី ស្ដីទី Sarah Gasquard
និងគណៈប្រតិភូ បានថ្លែងអំណរគុណទៅដល់ឯកឧត្តមសាស្ត្រាចារ្យរដ្ឋមន្ត្រី និងថ្នាក់ដឹកនាំក្រសួងសុខាភិបាលដែលបានផ្ដល់ការអនុញ្ញាតឱ្យចូលជួបសម្ដែងការគួរសមនិងពិភាក្សាការងារ ហើយក្រុមហ៊ុននឹងបន្តការពិភាក្សាតាមការណែនាំរបស់ក្រសួងសុខាភិបាលក្នុងការរៀបចំជាផែនការគម្រោងជាក់លាក់ ដើម្បីសុំការផ្ដល់យោបល់ពីក្រសួងសុខាភិបាលនៅពេលខាងមុខ។
