រាជធានីភ្នំពេញ៖ នារសៀលថ្ងៃសុក្រ ទី១១ ខែកក្កដា ឆ្នាំ២០២៥ ដោយទទួលបានការអនុញ្ញាតដ៏ខ្ពង់ខ្ពស់ពី ឯកឧត្តមសាស្ត្រាចារ្យ ឈាង រ៉ា រដ្ឋមន្ត្រីក្រសួងសុខាភិបាល លោកជំទាវសាស្ត្រាចារ្យ អ៊ឹម សិទ្ធិការ្យ រដ្ឋលេខាធិការក្រសួងសុខាភិបាល បានអញ្ជើញជាអធិបតីភាព ក្នុងពិធីបិទវគ្គបណ្តុះបណ្តាល គ្រូបង្គោលស្តីពីការពិនិត្យមរណភាពមាតា និង ទារក ជុំវិញកំណើត និងការឆ្លើយតបសម្រាប់មន្ទីរពេទ្យជាតិ ចំនួន០៦ ដែលមានរយៈពេល៥ថ្ងៃ ពីថ្ងៃទី០៧ ដល់ថ្ងៃទី១១ ខែកក្កដា ឆ្នាំ២០២៥ នៅមន្ទីរពេទ្យព្រះអង្គឌួង បានបញ្ចប់ដោយជោគេជ័យ។ វគ្គបណ្តុះបណ្តាលនេះបានរៀបចំឡើងដោយគណ:កម្មការពិនិត្យមរណភាពមាតា និង ទារក ជុំវិញកំណើត និងការឆ្លើយតបថ្នាក់ជាតិ និងមានការឧបត្ថម្ភដោយ អង្គការ UNFPA។
លោកជំទាវសាស្ត្រាចារ្យរដ្ឋលេខាធិការ បានសំដែងនូវមោទនភាព និងអបអរសាទរចំពោះលទ្ធផលសមត្ថភាពរបស់សិក្ខាកាមបង្ហាញថាការយល់ដឹងពីការងារពិនិត្យស្រាវជ្រាវមរណភាពមាតា និងទារក ជុំវិញកំណើត និងការឆ្លើយតប (MPDSR) ជាមធ្យមកើនឡើង៦៦%មុនវគ្គ ទៅ ៩០% ក្រោយវគ្គបណ្តុះបណ្តាល។
ក្នុងឱកាសនៃការបិទវគ្គបណ្តុះបណ្តាលនេះផងដែរ លោកជំទាវសាស្រ្តាចារ្យរដ្ឋលេខាធិការ ក៏បានផ្តល់អនុសាសន៍ និងផ្តាំផ្ញើរដល់សមាជិក សមាជិការរបស់ គណកម្មការពិនិត្យមរណភាពមាតា និងទារក ជុំវិញកំណើត និងការឆ្លើយតប ថ្នាក់មន្ទីរពេទ្យជាតិដែលបានសិក្សារយះពេល៥ថ្ងៃនេះថា៖ ១) យកចំណេះដឹងទាំងនេះដើម្បីជួយបណ្តុះបណ្តាលបន្តដល់បុគ្គលិកដែលពាក់ព័ន្ធក្នុងមន្ទីរពេទ្យរបស់ខ្លួន និងប្រើប្រាស់លិខិតវេជ្ជសាស្រ្តមូលហេតុមរណភាព [MCCD] កត្តារួមចំណែកនៃការពន្យាពេលទាំង៣ [Modifiable contributing factors] និងផែនការឆ្លើយតប ២) ត្រៀមរៀបចំផែនការបណ្តុះបណ្តាលដល់មន្ទីរពេទ្យសម្ព័ន្ធមេត្រីនៅពេលខាងមុខ។ សម្រាប់គ្រូបង្គោលថ្នាក់ជាតិ បន្តរៀបចំបណ្តុះបណ្តាលសម្រាប់គណៈកម្មការ MPDSR ថ្នាក់ខេត្ត ដោយសហការជាមួយមន្ទីរពេទ្យថ្នាក់ជាតិ។
ជាទីបញ្ចប់លោកជំទាវសាស្ត្រាចារ្យរដ្ឋលេខាធិការ ក៏បានស្នើសុំដល់ UNFPA WHO និងដៃគូអភិវឌ្ឍន៍ផ្សេងៗទៀត បន្តគាំទ្រផែនការបណ្តុះបណ្តាលដល់ថ្នាក់ខេត្ត និងនៅមូលដ្ឋានសុខាភិបាល ដើម្បីធានាបាននូវប្រសិទ្ធភាព គាំទ្រឱ្យបង្កើតប្រព័ន្ធគ្រប់គ្រង MPDSR និងពង្រឹងសមត្ថភាពមន្រ្តីសុខាភិបាលអំពីការគ្រប់គ្រងការធ្លាក់ឈាមក្រោយសម្រាល។ លោកជំទាវសាស្ត្រាចារ្យ បានថ្លែងអំណរគុណដល់ អង្គការ UNFPA WHO ដែលតែងតែជួយក្រសួងសុខាភិបាលលើការងារជាច្រើន ដែលទាក់ទងនឹងសុខភាពមាតា និងទារក និងសុខភាពផ្លូវភេទ ជាពិសេសថ្លែងអំណរគុណចំពោះមន្ទីរពេទ្យព្រះអង្គឌួងដែលបានផ្តល់ទីតាំងបណ្តុះបណ្តាលយ៉ាងសមរម្យ និងចូលរួមរៀបចំបានយ៉ាងល្អ។
វគ្គបណ្តុះបណ្តាលនេះ មានការចូលរួមពីមន្ទីរពេទ្យចំនួន៦ ជាសាស្ត្រាចារ្យ វេជ្ជបណ្ឌិត និងឆ្មប (ជាអនុប្រធានមន្ទីរពេទ្យ ប្រធានបច្ចេកទេស ប្រធានផ្នែកសម្ភព ប្រធានផ្នែកទារក ប្រធានផ្នែកសណ្តំ-សង្គ្រោះបន្ទាន់, នាយសាលសម្ភព និងនាយសាសផ្នែកទារក) មកពីមន្ទីរពេទ្យកាល់ម៉ែត មន្ទីរពេទ្យខ្មែរ-សូវៀត មន្ទីរពេទ្យគន្ធបុប្ផា មន្ទីរពេទ្យជ័យវរ្ម័នទី៧ មន្ទីរពេទ្យជាតិតេជោសន្តិភាព និងមន្ទីរពេទ្យកុមារជាតិ សរុបចំនួន៣៣រូប។
