រាជធានីភ្នំពេញ៖ នាព្រឹកថ្ងៃសុក្រ ៨រោច ខែអាសាឍ ឆ្នាំម្សាញ់ ឆស័ក ព.ស.២៥៦៩ ត្រូវនឹងថ្ងៃទី១៨ ខែកក្កដា ឆ្នាំ២០២៥ វេលាម៉ោង ៩:០០នាទី លោកជំទាវវេជ្ជបណ្ឌិត យក់ សម្បត្តិ រដ្ឋលេខាធិការ និងជានាយកគម្រោងមូលនិធិសកល នៃក្រសួងសុខាភិបាល បានដឹកនាំកិច្ចប្រជុំពិនិត្យ និងពិភាក្សាលើវឌ្ឍនភាពការងាររបស់កម្មវិធីជាតិប្រយុទ្ធនឹងជំងឺរបេង។
គោលបំណងនៃអង្គប្រជុំ៖
១- ពិនិត្យវឌ្ឍនភាព នៃការរៀបចំកែលំអហេដ្ឋារចនាសម្ព័ន្ធអង្គភាព ការគ្រប់គ្រងបុគ្គលិក ការងារគ្រប់គ្រងឱសថបរិក្ខារ និងការផ្តល់សេវាពិនិត្យព្យាបាលអ្នកជំងឺ។
២- ពិនិត្យវឌ្ឍនភាព នៃគម្រោងមូលនិធិសកលសម្រាប់ការងាររបេង។
៣- ដោះស្រាយបញ្ហាប្រឈម ដែលពាក់ព័ន្ធនឹងការអនុវត្តកិច្ចសន្យាគម្រោងមូលនិធិសកល និងជំរុញការអនុវត្តឱ្យមានប្រសិទ្ធភាព និងភាពជោគជ័យ តាមកាលកំណត់ក្នុងសូចនាករសំខាន់ៗ។
កិច្ចប្រជុំនេះ មានការអញ្ជើញចូលរួមពី ឯកឧត្តមវេជ្ជបណ្ឌិត ម៉ៅ តាន់អ៊ាង អនុរដ្ឋលេខាធិការ នៃក្រសួងសុខាភិបាល លោកវេជ្ជបណ្ឌិត ហ៊ួត ចាន់យុដា ប្រធានមជ្ឈមណ្ឌលជាតិកំចាត់រោគរបេង និងហង់សិន ថ្នាក់ដឹកនាំ និងមន្ត្រីពាក់ព័ន្ធគម្រោងមូលនិធិសកលក្រសួងសុខាភិបាល (MOH-LIT) រួមនឹងមន្ត្រីពាក់ព័ន្ធរបស់មជ្ឈមណ្ឌលជាតិកំចាត់រោគរបេង និងហង់សិន។
ចុងបញ្ចប់នៃកិច្ចប្រជុំ លោកជំទាវរដ្ឋលេខាធិការ និងជាប្រធានអង្គប្រជុំ បានធ្វើការបូកសរុប និងថ្លែងការកោតសរសើរដល់កិច្ចខិតខំប្រឹងប្រែងអនុវត្តការងាររបស់ថ្នាក់ដឹកនាំ និងមន្ត្រីទាំងអស់របស់មជ្ឈមណ្ឌលជាតិកំចាត់រោគរបេង និងហង់សិន ដែលទទួលបានលទ្ធផលគួរជាទីមោទនៈនេះ។ ទន្ទឹមនឹងនេះ លោកជំទារដ្ឋលេខាធិការ ក៏បានផ្តល់ជាមតិណែនាំផងដែរ ដល់ថ្នាក់ដឹកនាំ និងមន្ត្រីទាំងអស់របស់មជ្ឈមណ្ឌលជាតិ ត្រូវបន្តកិច្ចខិតខំប្រឹងប្រែងបន្ថែមទៀត ព្រមទាំងធ្វើការសហការគ្នាឱ្យល្អ ដោយគោរពអនុវត្តការងារទៅតាមឋានានុក្រម ព្រមទាំងបន្តប្រាស្រ័យទំនាក់ទំនងការងារល្អជាប្រចាំជាមួយក្រសួងសុខាភិបាល ក៏ដូចជាអង្គការដៃគូ។
