ទីក្រុងហុងកុង៖ ដោយទទួលបានការអនុញ្ញាតដ៏ខ្ពង់ខ្ពស់ពី ឯកឧត្តមសាស្ត្រាចារ្យ ឈាង រ៉ា រដ្ឋមន្ត្រីក្រសួងសុខាភិបាល លោកជំទាវវេជ្ជបណ្ឌិត យក់​ សម្បត្តិ​ រដ្ឋលេខាធិការក្រសួងសុខាភិ​បាល បានដឹកនាំគណៈប្រតិភូ​ អមដោយ​ ឯកឧត្ដមវេជ្ជបណ្ឌិត ស៊ុង វិនតៈ រដ្ឋលេខាធិការក្រសួងសុខាភិបាល ឯកឧត្តមសាស្ត្រាចារ្យ ងី ម៉េង ទីប្រឹក្សាក្រសួងសុខាភិបាល នាយកមន្ទីរពេទ្យមិត្តភាពខ្មែរ-សូវៀត និងជាប្រធានកម្មវិធីជាតិសុខភាពភ្នែក និងមន្ត្រីសម្របសម្រួលនៃនាយកដ្ឋានសហប្រតិបត្តិការអន្តរជាតិ​ ទៅចូលរួមកម្មវិធីម្ហូបអាហារខ្មែរ​ ដេីម្បីសប្បុរសធម៌​ (GX Foundation Khmer Cuisine Charity) នៅទីក្រុងហុងកុង តំបន់រដ្ឋបាលពិសេសនៃ​សាធារណរដ្ឋប្រជាមានិតចិន​ ចាប់ពីថ្ងៃទី២ ដល់ថ្ងៃទី៤ ខែធ្នូ ឆ្នាំ២០២៤។ 

កម្មវិធីនេះត្រូវបានរៀបចំឡេីង​ដោយមូលនិធិ​ GX ក្នុងគោលបំណងកៀគរមូលនិធិសម្រាប់ជួយគម្រោងលុបបំបាត់ភាពពិការភ្នែកដោយជំងឺភ្នែកឡេីងបាយនៅកម្ពុជា​ និងគម្រោងគ្រប់គ្រងជំងឺគ្រុនឈាមផង​ និងដេីម្បីផ្សព្វផ្សាយជំរុញលេីកកម្ពស់កម្ពុជាជាគោលដៅទេសចរណ៍ផង​ ដែលមានការអញ្ជេីញចូលរួមពី​ ឯកឧត្តម​ ហួត​ ហាក់​ រដ្ឋមន្រ្តីក្រសួង​ទេសចរណ៍​ និងអគ្គកុងស៊ុលកម្ពុជាប្រចាំទីក្រុងហុងកុង។ 

ក្នុងអំឡុងពេលបេសកកម្​មនេះ​ គណៈប្រតិភូក្រសួង​សុខាភិបាល ក៏បានអញ្ជេីញទៅ​ទស្សនកិច្ចស្វែងយល់ពីការគ្រប់គ្រងជំងឺ​ ប្រព័ន្ធសុខាភិបាលហុងកុងនៅមជ្ឈមណ្ឌលការពារសុខភាពទីក្រុងហុងកុង មន្ទីរពេទ្យភ្នែកទីក្រុងហុងកុង​ និងស្នាក់ការកណ្តាលរបស់មូលនិធិ GX។ គណ:ប្រតិភូបានបានស្វែងយល់បន្ថែមពីការធ្វេីនវានុវត្តន៍ប្រព័ន្ធសុខាភិបាល​ បបច្ចេកវិទ្យាទំនើបនៃការព្យាបាលភ្នែក នៅមន្ទីរពេទ្យភ្នែកទីក្រុងហុងកុង។ គណប្រតិភូក៏បានស្តាប់របាយការណ៍វឌ្ឍនភាព​ នៃការអនុវត្តគម្រោងលុបបំបាត់ភាពពិការភ្នែកដោយជំងឺភ្នែកឡេីងបាយនៅកម្ពុជា​ និងគម្រោងគ្រប់គ្រងជំងឺគ្រុនឈាម​ ព្រមទាំងបានពិភាក្សាអំពីការបន្តពង្រីកគម្រោងទាំង២នេះ​ ទៅខេត្តផ្សេងទៀត​ ដែលគម្រោងនេះនឹងចូលរួមចំណែកឈានឆ្ពោះទៅការសម្រេចបាននូវការគ្របដណ្ដប់សុខភាពជាសាកលនៅកម្ពុជានាឆ្នាំ២០៣៥​ ជាពិសេស​ ដេីម្បីសម្រេចឱ្យបានជ្រុងមួយ​ ស្តីពីការលេីកកម្ពស់សុខុមាលភាពរបស់ប្រជាពលរដ្ឋ​ នៃយុទ្ធសាស្ត្របញ្ចកោណ​ ដំណាក់កាលទី១​ ក្រោមការដឹកនាំដ៏ស្បាហាប់​ និងរស់រវេីក​ ប្រកបដោយគតិបណ្ឌិត​ របស់​ សម្តេចមហាបវរធិបតី​ ហ៊ុន​ ម៉ាណែត​ នាយករដ្ឋមន្រ្តីនៃព្រះរាជាណាចក្រកម្ពុជា។