រាជធានីភ្នំពេញ៖ នាព្រឹកថ្ងៃសុក្រ ១៣រោច ខែអាសាឍ ឆ្នាំរោង ឆស័ក ព.ស.២៥៦៨ ត្រូវនឹងថ្ងៃទី២ ខែសីហា ឆ្នាំ២០២៤ ឯកឧត្តមវេជ្ជបណ្ឌិត ម៉ី សំបូរ រដ្ឋលេខាធិការប្រចាំការក្រសួងសុខាភិបាល ជាតំណាងដ៏ខ្ពង់ខ្ពស់ ឯកឧត្តមសាស្រ្តាចារ្យ ឈាង រ៉ា រដ្ឋមន្រ្តីក្រសួងសុខាភិបាល រួមជាមួយថ្នាក់ដឹកនាំ មន្រ្តីរាជការក្រសួងសុខាភិបាល បានអញ្ជើញចូលរួមដាក់កម្រងផ្កា និងគោរពវិញ្ញាណក្ខន្ធសព ឧត្តមសេនីយ៍ត្រី ស៊ុន ផល្លា មេបញ្ជាការរងកងហោះហើរឧទ្ធម្ភាគចក្រ និងជាគ្រូបង្វឹកឧទ្ធម្ភាគចក្រ និងវរសេនីយ៍ទោ ខេង ឆៃយុទ្ធ អាកាសយានិកឧទ្ធម្ភាគចក្រ នៃទីបញ្ជាការដ្ឋានកងទ័ពជើងអាកាស ដែលបានពលីនៅក្នុងបេសកកម្មហ្វឹកហ្វឺនហោះហើរ ដោយជួបឧបទ្ទវហេតុធ្លាក់ឧទ្ធម្ភាគចក្រក្នុងពេលកំពុងហ្វឹកហាត់ ត្រង់ចំណុចភូមិសាស្ត្រខ្នងភ្នំយ៉ាវយ៉ៃ ស្ថិតនៅឃុំថ្មដា ស្រុកវាលវែង ខេត្តពោធិ៍សាត់ កាលពីថ្ងៃទី១២ ខែកក្កដា ឆ្នាំ២០២៤។
ក្នុងឱកាសប្រកបដោយសមានទុក្ខដ៏ក្រៀមក្រំនេះ ក្នុងនាមក្រសួងសុខាភិបាល សូមចូលរួមរំលែកមរណទុក្ខ និងសោកស្តាយស្រណោះអាឡោះអាល័យ ចំពោះមរណភាពរបស់អាកាសយានិករបស់យើងនាពេលនេះ គឺជាការបាត់បង់ធនធានដ៏សំខាន់នៃកងយោធពលខេមរភូមិន្ទ និងការបាត់បង់យុទ្ធមិត្តដ៏អង់អាចក្លាហាន ជាពិសេសការបាត់បង់ ស្វាមី ឪពុក កូន បងប្អូន ជាទីគោរពស្រឡាញ់របស់ក្រុមគ្រួសារ និងសូមឧទ្ទិសបួងសួងដល់ដួងវិញ្ញាណក្ខន្ធ ឧត្តមសេនីយ៍ត្រី ស៊ុន ផល្លានិងវរសេនីយ៍ទោ ខេង ឆៃយុទ្ធ បានទៅកាន់សុគតិភព កុំបីឃ្លៀងឃ្លាតឡើយ។
