រាជធានីភ្នំពេញ៖ នៅថ្ងៃអង្គារ ១០កើត ខែមិគសិរ ឆ្នាំរោង ឆស័ក ព.ស.២៥៦៨ ត្រូវនឹងថ្ងៃទី១០ ខែធ្នូ ឆ្នាំ២០២៤ ដោយទទួលបាននូវការអនុញ្ញាតដ៏ខ្ពង់ខ្ពស់ពី ឯកឧត្តមសាស្ត្រាចារ្យ ឈាង រ៉ា រដ្ឋមន្ត្រីក្រសួងសុខាភិបាល ឯកឧត្តមសាស្ត្រាចារ្យ កុយ វ៉ាន់នី  រដ្ឋលេខាធិការក្រសួងសុខាភិបាល បានអញ្ជើញជាអធិបតីក្នុងពិធីបើក “សន្និសីទបណ្តាញប៉ាស្ទ័រស្តីពីជំងឺគ្រុនផ្តាសាយបក្សី” ដែលរៀបចំដោយវិទ្យាស្ថានប៉ាស្ទ័រកម្ពុជា។

សន្និសីទនេះ រៀបចំឡើងក្នុងគោលបំណង៖

-  ជំរុញកិច្ចសហការរវាងអ្នកវិទ្យាសាស្ត្ររបស់បណ្តាញវិទ្យាស្ថានប៉ាស្ទ័រក្នុងការស្រាវជ្រាវ  តាមដាន និងការឆ្លើយតប នៅអាស៊ីប៉ាស៊ីហ្វិក ជាមួយអ្នកជំនាញដើម្បីបង្កើនបណ្តាញនិងឱកាសស្រាវជ្រាវរួមគ្នា

-  ពិភាក្សាអំពីបញ្ហាប្រឈមដែលកំពុងបន្ត ដូចជាការផ្តល់មូលនិធិ ការពិចារណាអំពីក្រមសីលធម៌ ការចែករំលែកទិន្នន័យ និងតម្រូវការសម្រាប់ការចុះសម្រុងគ្នា

-  ការរៀបចំផែនការយុទ្ធសាស្រ្ត៖បង្កើតផែនទីបង្ហាញផ្លូវរួមគ្នាដែលបង្ហាញពីអាទិភាពជាយុទ្ធសាស្រ្តសម្រាប់ការស្រាវជ្រាវ និងការឆ្លើយតបសម្រាប់ឆ្នាំខាងមុខ។ ផែនទីបង្ហាញផ្លូវនេះដែលនឹងបម្រើជាកម្លាំងណែនាំសម្រាប់បណ្តាញប៉ាស្ទ័រ និងអ្នកពាក់ព័ន្ធដែលពាក់ព័ន្ធក្នុងការប្រយុទ្ធប្រឆាំងនឹងជំងឺផ្តាសាយប្កសីក្នុងតំបន់ រួមទាំងការកំណត់អត្តសញ្ញាណអាទិភាពនៃការស្រាវជ្រាវសំខាន់ៗ ការបង្កើនប្រព័ន្ធឃ្លាំមើល ការកសាងសមត្ថភាព និងការលើកកម្ពស់កិច្ចសហប្រតិបត្តិការ នឹងស្វែងរកការលើកកម្ពស់ការធ្វើអន្តរាគមន៍ផ្នែកសុខភាពសាធារណៈ/សុខភាពសត្វប្រកបដោយភាពច្នៃប្រឌិត ស្វែងរកយុទ្ធសាស្រ្តផ្តល់មូលនិធិប្រកបដោយនិរន្តរភាព និងបង្កើតរង្វាស់លទ្ធផលដើម្បីវាស់ស្ទង់ភាពជោគជ័យ។ 

សន្និសីទនេះមានការអញ្ជើញចូលរួម សរុបចំនួន ៦៩នាក់ដែលមានតំណាងមកពីនាយកដ្ឋានប្រយុទ្ធនិងជំងឺឆ្លង នៃក្រសួងសុខាភិបាល អគ្គនាយកដ្ឋានសុខភាពសត្វ និងផលិតកម្មសត្វ  រដ្ឋបាលព្រៃឈើ នៃក្រសួងកសិកម្ម រុក្ខាប្រមាញ់ និងនេសាទ ក្រសួងបរិស្ថាន តំណាងពីប៉ាស្ទ័រពីប្រទេសកម្ពុជា វៀតណាម ហុងកុង ឡាវ កូរ៉េ ញ៉ូកាឡេដូនៀ អ៊ីរ៉ង់ សិង្ហបុរី អង្គការសុខភាពពិភពលោក អូស្ត្រាលី កម្ពុជា បារាំង និងសហរដ្ឋអាមេរិច។

ឯកឧត្តមសាស្ត្រាចារ្យក៏បានបញ្ជាក់ផងដែរថា ជំងឺផ្តាសាយបក្សី A(H5N1) ត្រូវបានគេរកឃើញជាលើកដំបូងនៅក្នុងប្រទេសកម្ពុជាលើបក្សីព្រៃក្នុងខែធ្នូ ឆ្នាំ២០០៣។ ហើយចាប់តាំងពីឆ្នាំ២០០៤ រហូតដល់បច្ចុប្បន្ន មានករណីលើមនុស្ស សរុបចំនួន ៧២នាក់ ក្នុងនោះមាន៤៣នាក់បានបាត់បង់ជីវិតក្នុងរយៈពេលពីរទសវត្សរ៍ កន្លងមកនេះ។ ចាប់ពីឆ្នាំ ២០១៥ ដល់ឆ្នាំ ២០២២ យើងមិនមានជំងឺផ្តាសាយបក្សីលើមនុស្ស ប៉ុន្តែការកើតឡើងវិញនៃករណីនៅឆ្នាំ២០២៣ ឆ្នាំ២០២៤ បានរំឭកយើងអំពីតម្រូវការសម្រាប់ការប្រុងប្រយ័ត្នជានិច្ច។បទពិសោធន៍ទាំងនេះបានបញ្ជាក់ពីសារៈសំខាន់នៃការឆ្លើយតបដ៏រឹងមាំ និងសម្របសម្រួល។ 

ក្នុងនោះប្រទេសកម្ពុជាបានប្រកាន់យកនូវវិធីសាស្រ្ត One Health ដោយទទួលស្គាល់ថាសុខភាពមនុស្ស សត្វ និងបរិស្ថានមានទំនាក់ទំនងគ្នាយ៉ាងស៊ីជម្រៅ។ តាមរយៈកិច្ចសហការយ៉ាងជិតស្និទ្ធរវាងក្រសួងសុខាភិបាល ក្រសួងកសិកម្ម រុក្ខាប្រមាញ់ និងនេសាទ និងក្រសួងបរិស្ថាន យើងបានពង្រឹងការរកឃើញទាន់ពេលវេលា បង្កើនការយល់ដឹង និងបង្កើតយុទ្ធសាស្ត្រឆ្លើយតបប្រកបដោយប្រសិទ្ធភាពបន្ថែមទៀត។