រាជធានីភ្នំពេញ៖ នាថ្ងៃទី១២ ខែធ្នូ ឆ្នាំ២០២៤ ដោយមានការអនុញ្ញាតដ៏ខ្ពង់ខ្ពស់ពី ឯកឧត្តមសាស្ត្រាចារ្យ ឈាង រ៉ា រដ្ឋមន្ដ្រីក្រសួងសុខាភិបាល ឯកឧត្តមវេជ្ជបណ្ឌិត ស៊ិក ប៊ុណ្ណា រដ្ឋលេខាធិការក្រសួងសុខាភិបាល បានទៅចូលរួមក្នុងពិធីសម្ពោធដាក់ឱ្យដំណើរការជាផ្លូវការ មន្ទីរពិសោធន៍ជាតិ វិទ្យាសាស្ត្រ បច្ចេកវិទ្យា និងនវានុវត្តន៍ ជាគ្រឹះស្ថានសាធារណៈរដ្ឋបាល ដែលស្ថិតនៅលើផ្លូវជាតិលេខ២ ភូមិព្រែកតានូ សង្កាត់ចាក់អង្រែលើ ខណ្ឌមានជ័យ រាជធានីភ្នំពេញ។ អង្គពិធីប្រព្រឹត្តទៅក្រោមអធិបតីភាព ឯកឧត្តម ហែម វណ្ណឌី រដ្ឋមន្ដ្រីក្រសួងឧស្សាហកម្ម បច្ចេកវិទ្យា និងនវានុវត្តន៍ មានការចូលរួមពី ឯកឧត្តម លោកជំទាវ តំណាងក្រសួងស្ថាប័នពាក់ព័ន្ធ តំណាងស្ថានទូត និងតំណាងអង្គការអន្តរជាតិមួយចំនួន។

កម្មវិធីរៀបចំឡើងក្នុងគោលបំណង បង្ហាញពីតួនាទី និងសមត្ថភាពរបស់មន្ទីរពិសោធន៍ ជាមួយនឹងស្តង់ដាអន្តរជាតិកំរិតខ្ពស់ ISO/IEC 17025 ដែលនឹងបន្តរួមចំណែកសម្រួលដល់ធុរកិច្ច និងកាត់បន្ថយឱ្យបានជាអតិបរិមានូវការបញ្ជូនការធ្វើតេស្តវិភាគផលិតផលនៅក្រៅប្រទេស។ មន្ទីរពិសោធន៍បានធ្វើទំនើបកម្មមួយទៀតគឺបញ្ចូលថ្នាលផ្ទៀងផ្ទាត់ឯកសារ verify.gov.kh ដើម្បីបង្កើនទំនុកចិត្ត និងភាពជឿជាក់លើលទ្ធផលតេស្តវិភាគដែលងាយស្រួលក្នុងការផ្ទៀងផ្ទាត់ភាពត្រឹមត្រូវ។