រាជធានីភ្នំពេញ៖ ដោយទទួលបានការអនុញ្ញាតដ៏ខ្ពង់ខ្ពស់ពី ឯកឧត្តមសាស្ត្រាចារ្យ ឈាង រ៉ា រដ្ឋមន្ត្រីក្រសួងសុខាភិបាល នាព្រឹកថ្ងៃអង្គារ ១០រោច ខែអាសាឍ ឆ្នាំរោង ឆស័ក ព.ស.២៥៦៨ ត្រូវនឹងថ្ងៃទី៣០ ខែកក្កដា ឆ្នាំ២០២៤ ឯកឧត្តមវេជ្ជបណ្ឌិត ម៉ៅ តាន់អ៊ាង អនុរដ្ឋលេខាធិការក្រសួងសុខាភិបាល បានចូលរួមក្នុង វេទិកាសុវត្ថិភាពលើប្រព័ន្ធអនឡាញ (Online Safety Forum) ក្រោមប្រធានបទ “ទាំងអស់គ្នាឆ្ពោះទៅសុវត្ថិភាពលើអ៊ីនធឺណិត” ដែលរៀបចំដោយ ក្រសួងប្រៃសណីយ៍ និងទូរគមនាគមន៍ សហការជាក្រុមហ៊ុន Smart Axiata រួមជាមួយភាគីពាក់ព័ន្ធ។
អង្គវេទិកានេះ មានបំណងដើម្បីលើកកម្ពស់ការយល់ដឹងដល់ប្រជាជនកម្ពុជា អំពីហានិភ័យដែលកំពុងកើតមានលើប្រព័ន្ធអនឡាញ និងចែករំលែកចំណេះដឹងពីបច្ចុប្បន្នភាពបច្ចេកវិទ្យាបញ្ញាសិប្បនិម្មិត កិច្ចការពារកុមារតាមប្រព័ន្ធអនឡាញ ប្រព័ន្ធរាយការណ៍ ព្រមទាំងសមត្ថភាពឌីជីថល។
ពិធីបើកអង្គវេទិកាបានប្រព្រឹត្តទៅក្រោមអធិបតីភាពដ៏ខ្ពង់ខ្ពស់ ឯកឧត្តម ជុន វ៉ាត រដ្ឋលេខាធិការ ក្រសួងប្រៃសណីយ៍ និងទូរគមនាគមន៍ ដែលឯកឧត្តមបានថ្លែងសុន្ទរកថាបើក ប្រកបដោយខ្លឹមសារ និងអត្ថន័យជូនដល់អង្គវេទិកា ជាពិសេស ឯកឧត្តមបានសង្កត់ធ្ងន់លើ (១)សារសំខាន់របស់អង្គវេទិកា ក្នុងការពិភាក្សាស្វែងយល់អំពីបញ្ហាគ្រោះថ្នាក់ហានិភ័យជាក់ជាក់ ដែលបានកើតឡើងនៅកម្ពុជា និងដំណោះស្រាយរួមគ្នារវាងអ្នកពាក់ព័ន្ធទាំងអស់ (២) យន្តការសហការជាមួយគ្រប់ភាគីពាក់ព័ន្ធ ដើម្បីដោះស្រាយបញ្ហាគ្រោះថ្នាក់លើប្រព័ន្ធអនឡាញប្រកបជោគជ័យ និងប្រសិទ្ធភាព និង (៣) ការងារមួយចំនួនដែលក្រសួងប្រៃសណីយ៍ និងទូរគមនាគមន៍ កំពុងរៀបចំ ដែលមានដូចជាការតាត់តែងសេចក្តីព្រាងច្បាប់មួយចំនួន ដើម្បីរក្សាសន្តិសុខអនឡាញ និងការពារសុវត្ថិភាព សម្រាប់អ្នកប្រើប្រាស់ និងដោះស្រាយបញ្ហាលើប្រព័ន្ធអនឡាញជាដើម។
គួរកត់សម្គាល់ថា អង្គវេទិកានេះ មានការអញ្ជើញចូលរួមយ៉ាងកុះករ ពី ឯកឧត្តម លោកជំទាវ រដ្ឋលេខាធិការ អនុរដ្ឋលេខាធិការ អគ្គនាយក មន្ត្រីគ្រប់លំដាប់ថ្នាក់ នៃក្រសួងប្រៃសណីយ៍ និងទូរគមនាគមន៍ ឯកឧត្តម លោកជំទាវ តំណាងក្រសួង ស្ថាប័ន ពាក់ព័ន្ធ លោក លោកស្រី តំណាងដៃគូអភិវឌ្ឍន៍ ក្រុមហ៊ុនបច្ចេកវិទ្យា អង្គការក្រៅរដ្ឋាភិបាល ផ្នែកឯកជន និងអ្នកពាក់ព័ន្ធចូលរួមទាំងអស់សរុបមាន ចំនួនប្រមាណ ១៨០ រូប ។
