ការចុះពង្រឹងការងារផ្ដល់សេវាសុខាភិបាលនៅតាមមណ្ឌលសុខភាព សំដៅជំរុញបង្កើនការថែទាំសុខភាពបឋមនៅក្នុងខេត្តព្រៃវែង
ថ្ងៃទី ១៦ ខែ សីហា ឆ្នាំ ២០២៤
ខេត្តព្រៃវែង៖ ចាប់ពីថ្ងៃទី១៤ ដល់ ថ្ងៃទី១៦ ខែសីហា ឆ្នាំ២០២៤ ដោយទទួលបានការអនុញ្ញាតដ៏ខ្ពង់ខ្ពស់ពី ឯកឧត្តមសាស្ត្រាចារ្យ ឈាង រ៉ា រដ្ឋមន្ត្រីក្រសួងសុខាភិបាល លោកជំទាវវេជ្ជបណ្ឌិត ឱ វណ្ណឌីន រដ្ឋលេខាធិការក្រសួងសុខាភិបាល ទទួលបន្ទុកការងារបច្ចេកទេសសេវាសុខភាពបឋមនៅកម្រិតមណ្ឌលសុខភាពក្នុងខេត្តចំនួន ១៣ ដោយមានការចូលរួមដំណេីរដោយលោកជំទាវឱសថការី លី គឹអេង រដ្ឋលេខាធិការក្រសួងសុខាភិបាល និងឯកឧត្តមវេជ្ជបណ្ឌិត ឈរ កក្ដដា អនុរដ្ឋលេខាធិការក្រសួងសុខាភិបាល បានបំពេញដំណើរបេសកកម្មក្នុងខេត្តព្រៃវែង ដើម្បី៖
១. ប្រជុំត្រួតពិនិត្យ និងពិភាក្សាលើការអនុវត្តការកែលម្អគុណភាពសេវាសុខាភិបាលនៅកម្រិតមណ្ឌលសុខភាព និងការជំរុញចូលរួមអនុវត្តក្របខណ្ឌជំរុញបង្កើនការថែទាំសុខភាពបឋមនៅក្នុងខេត្តព្រៃវែង។
២. ចុះពិនិត្យមណ្ឌលសុខភាពដែលត្រូវជួយកែតម្រូវគុណភាព និងកែលម្អបន្ថែម ដោយឱ្យមានការស្វែងយល់ និងរៀនសូត្រពីមណ្ឌលសុខភាពដែលជាប់លេខ៤ ទូទាំងប្រទេស។
៣. ជំរុញកិច្ចសហប្រតិបត្តិការពីដៃគូចំនួន ៦ ដែលកំពុងធ្វេីការនៅក្នុងខេត្តព្រៃវែង។
កិច្ចប្រជុំនេះបានធ្វើឡើងនៅក្នុងសាលប្រជុំនៃមន្ទីរសុខាភិបាលនៃរដ្ឋបាលខេត្តព្រៃវែង ដោយមានអ្នកចូលរួមសរុបចំនួន ១៥០នាក់ រួមមាន ឯកឧត្ដមប្រធានមន្ទីរសុខាភិបាលខេត្ត ប្រធានការិយាល័យចំណុះមន្ទីរសុខាភិបាល ប្រធានការិយាល័យសុខាភិបាលស្រុកប្រតិបត្តិ ប្រធានមន្ទីរពេទ្យបង្អែកខេត្ត-ស្រុក ប្រធានមណ្ឌលសុខភាព និងដំណាងដៃគូអភិវឌ្ឍ។ ក្នុងឱកាសនេះ លោកជំទាវបានជំរុញដល់ថ្នាក់ដឹកនាំវិស័យសុខាភិបាលក្នុងខេត្ត ប្រធានការរិយាល័យសុខាភិបាលស្រុកប្រតិបត្តទាំង៩ សហការជាមួយប្រធានមណ្ឌលសុខភាពទាំងអស់ ត្រូវកំណត់យកមណ្ឌលសុខភាពដែលមានសក្តានុពល និងដាក់ផែនការអភិវឌ្ឍជាមណ្ឌលសុខភាពគំរូ ដោយកំណត់ចំនួនជាលំដាប់ៗ ដោយរៀនសូត្រពីមណ្ឌលសុខភាពព្រៃព្នៅ ដែលជាប់លេខ៤ ទូទាំងប្រទេស។
បន្ថែមលើនេះ លោកជំទាវក៏បានចុះពិនិត្យមណ្ឌលសុខភាព ពពឹសនៃការិយាល័យសុខាភិបាលស្រុកប្រតិបត្តស្វាយអន្ទរ និងមណ្ឌលសុខភាពព្រៃព្នៅនៃការិយាល័យសុខាភិបាលស្រុកប្រត្តបត្តិពារាំងផងដែរ។
