ទំព័រដើម

ខេត្តកំពង់ឆ្នាំង៖ នៅព្រឹកថ្ងៃសុក្រ ៩កើត ខែស្រាពណ៍ ឆ្នាំថោះ បញ្ចស័ក ព.ស.២៥៦៧ ត្រូវនឹងថ្ងៃទី២៤ ខែសីហា ឆ្នាំ២០២៣ ឯកឧត្តមសាស្រ្តាចារ្យ ឈាង រ៉ា រដ្ឋមន្រ្តីក្រសួងសុខាភិបាល បានដឹកនាំប្រតិភូក្រសួង និងក្រុមការងារបច្ចេកទេសក្រសួងសុខាភិបាល អញ្ជើញចុះពិនិត្យការផ្តល់សេវាសុខាភិបាលសាធារណៈជូនប្រជាពលរដ្ឋ និងពិនិត្យហេដ្ឋារចនាសម្ព័ន្ធសុខាភិបាល នៅមន្ទីរពេទ្យបង្អែកកំពង់ត្រឡាច មណ្ឌលសុខភាពសាលាលេខប្រាំ មណ្ឌលសុខភាពតាជេស និងមន្ទីរពេទ្យបង្អែកខេត្តកំពង់ឆ្នាំង ដើម្បីពិនិត្យលទ្ធភាព ជម្រុញសេវាថែទាំសុខភាពឱ្យកាន់តែខិតជិតប្រជាពលរដ្ឋ ប្រកបដោយគុណភាព សុវត្ថិភាព ប្រសិទ្ធភាព ស័ក្តិសិទ្ធភាព និងសមធម៌។

នារសៀលថ្ងៃដដែល ឯកឧត្តមសាស្រ្តាចារ្យរដ្ឋមន្រ្តីក្រសួងសុខាភិបាល បានអញ្ជើញជួបសំណេះសំណាល និងសួរសុខទុក្ខ ថ្នាក់ដឹកនាំ និងមន្រ្តីរាជការ នៃមន្ទីរសុខាភិបាលនៃរដ្ឋបាលខេត្តកំពង់ឆ្នាំង ដែលរៀបចំឡើងនៅមន្ទីរសុខាភិបាលនៃរដ្ឋបាលខេត្តកំពង់ឆ្នាំង។ ក្នុងឱកាសនោះដែរ ឯកឧត្តមសាស្រ្តាចារ្យរដ្ឋមន្រ្តី បានសំដែងនូវការអរគុណ និងកោតសរសើរ ដល់ថា្នក់ដឹកនាំ និងមន្រ្តីរាជការ បុគ្គលិកសុខាភិបាល ជាពិសេសក្នុងអំឡុងពេលនៃការឆ្លងរាតត្បាតនៃជំងឺកូវីដ-១៩ និងការធានាបាននូវនិរន្តរ៍ភាពនៃការផ្តល់សេវាសុខាភិបាលជាសារវ័ន្ត។ ឯកឧត្តម សាស្រ្តាចារ្យ រដ្ឋមន្រ្តី ក៏បាន ជម្រុញ និងលេីកទឹកចិត្ត ថា្នក់ដឹកនាំ មន្រ្តីរាជការ និងបុគ្គលិកសុខាភិបាល ក្នុងការធានាឱ្យការផ្តល់សេវាថែទាំសុខភាពជូនប្រជាពលរដ្ឋនៅក្នុងមូលដ្ឋានរបស់ខ្លួន ដោយជម្រុញលេីកកម្ពស់គុណភាព សុវត្ថិភាព ប្រសិទ្ធភាព ស័ក្តិសិទ្ធភាព និងសមធម៌ ឱ្យកាន់តែល្អប្រសេីរឡេីង និងគ្រ ប់ជ្រុងជ្រោយថែមទៀត។

ក្នុងដំណើរទស្សនកិច្ចនេះ ក៏មានការអញ្ជើញចូលរួមអមដំណើរដោយ ឯកឧត្តម លោកជំទាវ រដ្ឋលេខាធិការក្រសួងសុខាភិបាល អភិបាលរងនៃគណ:អភិបាលខេត្តកំពង់ឆ្នាំង អគ្គនាយកបច្ចេកទេសសុខាភិបាល និងក្រុមការងារបច្ចេកទេស ព្រមទាំងប្រធានមន្ទីរសុខាភិបាល នៃរដ្ឋបាលខេត្តកំពង់ឆ្នាំងផងដែរ។

ប្រឡងជ្រើសរើសបេក្ខជនចូលបម្រើការងារក្នុងក្របខណ្ឌសុខាភិបាលសម្រាប់ឆ្នាំ២០២២

បង្កាន់ដៃទទួលពាក្យសម្រាប់ មន្ត្រីរាជការ Application Form-For-Official

បង្កាន់ដៃទទួលពាក្យសម្រាប់ និស្សិត Application Form-For-Student

(ញូដេលី)៖​ ការចូលរួមប្រយុទ្ធប្រឆាំងឱសថក្លែងក្លាយនិងអន់គុណភាព​ និងប្រេីប្រាស់បច្ចេកវិទ្យាវេជ្ជសាស្ត្រ​ត្រឹមត្រូវ​ ដេីម្បីឆ្ពោះទៅរកសុខភាពជាសាកល​ និងពង្រឹងការផ្តល់សេវាសុខាភិបាលប្រកបដោយប្រសិទ្ធិភាពខ្ពស់នៅតំបន់អាស៊ី​៖

នាថ្ងៃុពុធ​ ៣រោច ខែអស្សុជ ឆ្នាំកុរ ព.ស.២៥៦៣ ត្រូវនឹងថ្ងៃទី១៦​ ខែតុលា ឆ្នាំ២០១៩ លោកជំទាវវេជ្ជបណ្ឌិត ឱ វណ្ណឌីន រដ្ឋលេខាធិការក្រសួងសុខាភិបាល និងជាអ្នកនាំពាក្យក្រសួងសុខាភិបាល​នៃព្រះរាជាណាចក្រកម្ពុជា បានដឹកនាំគណៈប្រតិភូក្រសួងសុខាភិបាល អញ្ជើញចូលរួមកិច្ចប្រជុំអន្តរជាតិស្តីអំពី​ “Asia Health 2019” នៅទីក្រុងញូដេលី​(New Delhi) ប្រទេសឥណ្ឌា​ ដែលមានអ្នកចូលរួមជាថ្នាក់ដឹកនាំ មន្ត្រីជំនាញ សាស្ត្រាចារ្យ អ្នកស្រាវជ្រាវវិទ្យាសាស្ត្រសុខភាព ក្រុមហ៊ុនឱសថ​និងបរិក្ខាពេទ្យ​ មន្ទីរពេទ្យឯកជននៅឥណ្ឌា​ និងធុរកិច្ចឯកជនអន្តរជាតិផ្នែកបច្ចេកវិទ្យាវេជ្ជសាស្ត្រ​ សរុបចំនួនប្រមាណ១៧០នាក់។

ក្នុងពេលស្នាក់នៅ​ និងបំពេញបេសកកម្មដែលមានរយៈពេលពីថ្ងៃទី១៦​ ដល់ទី១៩​ ខែតុលា ឆ្នាំ២០១៩ លោកជំទាវវេជ្ជបណ្ឌិត ឱ វណ្ណឌីន រដ្ឋលេខាធិការក្រសួងសុខាភិបាល បានទទួលនូវការស្នេីសុំពីអង្គប្រជុំផ្តល់ជាកិត្តិយសអញ្ជេីញថ្លែងសន្ទរកថាគន្លឹះនៅក្នុងពិធីបេីកកិច្ចប្រជុំ​ “ASIA Health 2019” រួមជាមួយឯកឧត្តមវេជ្ជបណ្ឌិត​ ហាស​ វ៉ាដហាន់​ (H.E. Dr. Harsh Vardhan, Honorable Minister of Health and Family Welfare) រដ្ឋមន្ត្រីក្រសួងសុខាភិបាលនិងសុខមាលភាពគ្រួសារនៃសាធារណ:រដ្ឋឥណ្ឌា​។ ក្នុងសន្ទរកថាដ៏មានខ្លឹមសារនេះ​ លោកជំទាវបានលេីកឡេីងពីការរយកចិត្តទុកដាក់ខ្ពស់បំផុតរបស់សម្តេចអគ្គមហាសេនាបតីតេជោ​ ហ៊ុន​ សែន​ នាយករដ្ឋមន្ត្រីនៃព្រះរាជាណាចក្រកម្ពុជាលើសុខភាពប្រជាជនកម្ពុជាទូទៅ​ និងបានគោរពថ្លែងអំណរគុណយ៉ាងជ្រាលជ្រៅដោយមិនអាចបំភ្លេចបានជូនចំពោះសម្តេចតេជោនាយករដ្ឋមន្ត្រី​ ក្នុងការសង្គ្រោះនិងកសាងប្រទេសកម្ពុជាជាពិសេសការជួយគាំទ្ររបស់សម្តេចលេីការកសាងវិស័យសុខាភិបាលតាំងពីបាតដៃទទេ​ ព្រមទាំងការរក្សាបាននូវសុខសន្តិភាព​ ស្ថេរភាព​នយោបាយ និងការអភិវឌ្ឍន៌ប្រទេសបានរីកចម្រេីនដូចសព្វថ្ងៃនេះ។ លោកជំទាវ​ បានលើកពីកិច្ចខិតខំប្រឹងប្រែងក្នុងវិស័យសុខាភិបាល​ ក្នុងការអភិវឌ្ឍហិដ្ឋារចនាសម្ព័ន្ធរូបវ័ន្ត​ និងបណ្តុះបណ្តាលធនធានមនុស្ស​ ដេីម្បីផ្តល់សេវាសុខភាពជូនប្រជាជនកម្ពុជា​ កិច្ចខិតខំប្រយុទ្ធនឹងជំងឺឆ្លង​ផងនិងឆ្លេីយតបបញ្ហាជំងឺមិនឆ្លងផង​ ព្រមទាំងការអនុវត្តន៌គោលនយោបាយគាំពារសុខភាពសង្គម​ឈ្ពោះទៅរកសុខភាពជាសាកល​ និងបានស្នើសុំឲ្យមានកិច្ចសហការ-សហប្រតិបត្តិការបន្ថែមទៀតពីក្រសួងសុខាភិបាលឥណ្ឌានិងពីដៃគូសុខាភិបាលទាំងរដ្ឋនិងឯកជន​នៅឥណ្ឌានេះ លេីផ្នែកបច្ចេកវិទ្យាពេទ្យ​ ព្រមទាំងការបណ្តុះបណ្តាលសម្រាប់ការអភិវឌ្ឍធនធានមនុស្សលេីបច្ចេកវិទ្យាពិនិត្យនិងព្យាបាលជំងឺ​ផងដែរ។

ទន្ទឹមនឹងនោះ​ លោកជំទាវរដ្ឋលេខាធិការ​ បានជម្រាបជូនអង្គប្រជុំបន្ថែមថា៖​ គំនិតផ្តួចផ្តេីមដ៏ខ្ពង់ខ្ពស់របស់សម្តេចតេជោ​នាយករដ្ឋមន្ត្រីកម្ពុជា​ លេីការប្រយុទ្ធប្រឆាំងឱសថក្លែងក្លាយនិងអន់គុណភាព​ ដែលសម្តេចបានថ្លែងសន្ទរកថាបេីកកិច្ចប្រជុំថ្នាក់មហាអនុតំបន់ទន្លេមេកុងនាខែវិឆ្ឆិកា​ ឆ្នាំ២០១៨​ កន្លងទៅ​ បានក្លាយទៅជាប្រធានបទវិប្បស្សនានៃកិច្ចប្រជុំលេីកទី១៤​ រដ្ឋមន្ត្រីសុខាភិបាលអាស៊ាន​ នាខែសីហា​ ឆ្នាំ២០១៩​ ហេីយរដ្ឋមន្ត្រីសុខាភិបាលអាស៊ានទាំង១០​ បានគាំទ្រគំនិតផ្តួចផ្តេីមរបស់សម្តេចតេជោទាំងស្រុង​ ដោយបានឯកភាពគ្នាចេញសេចក្តីប្រកាសរួម​និងបានដាក់បញ្ចូលប្រធានបទប្រយុទ្ធប្រឆាំងឱសថក្លែងក្លាយនិងអន់គុណភាពក្នុងសេចក្តីប្រកាសរួមនេះ​ ដោយគូសបញ្ជាក់ពីការប្តេជ្ញាចិត្តរួមគ្នាក្នុងការប្រយុទ្ធប្រឆាំងឱសថក្លែងក្លាយនិងអន់គុណភាពក្នុងតំបន់និងក្នុងប្រទេស​។ លោកជំទាវរដ្ឋលេខាអិការ​ បានជម្រាបនិងស្វាគមន៌ដល់ភ្ញៀវអន្តជាតិទាំងអស់អញ្ជេីញចូលរួមវេទិកាអន្តរជាតិអាស៊ី-អឺរ៉ុប​ ស្តីពីការប្រយុទ្ធប្រឆាំងឱសថក្លែងក្លាយនិងអន់គុណភាព​ នៅពាក់កណ្តាលឆ្នាំ២០២០​ នៅខេត្តសៀមរាប​ ប្រទេសកម្ពុជា​ ដែលលទ្ធផលបានពីវេទិកាដ៏មានសារសំខាន់នេះ​ នឹងដាក់បញ្ចូលទៅក្នុងកិច្ចប្រជុំ​កំពូលអាស៊ី-អឺរ៉ុបលេីកទី១៣​ (13th ASIA-Europe Summit) ដែលនឹងត្រូវរៀបចំដឹកនាំកិច្ចប្រជុំដោយសម្តេចតេជោនាយករដ្ឋមន្ត្រីកម្ពុជា​ នាឆ្នាំ២០២០ខាងមុខនេះ។ លេីសពីនេះ​ លោកជំទាវរដ្ឋលេខាធិការក្រសួងសុខាភិបាល​ បានអំពាវនាវឲ្យមានការខិតខំរួមគ្នាក្នុងការប្រយុទ្ធប្រឆាំងឱសថក្លែងក្លាយនិងអន់គុណភាព​ ដេីម្បីឆ្ពោះទៅរកសុខភាពជាសាកលនិងពង្រឹងការផ្តល់សេវាប្រកបដោយប្រសិទ្ធិភាពនៅតំបន់អាស៊ី​យេីងនេះ ជាពិសេសសុំឲ្យមានការចូលរួមយ៉ាងសកម្មពីវិស័យឯកជនដែលធ្វេីធុរកិច្ចផ្នែកឱសថនិងសម្ភារ:បរិក្ខាពេទ្យនៃប្រទេសឥណ្ឌា​ លេីកិច្ចការដ៏សំខាន់នេះផងដែរ។

គួរកត់សម្គាល់ថា នៅក្នុងបទអន្តរាគមន៍ថ្លែងនៅក្នុងកិច្ចប្រជុំដ៏មានសារសំខាន់ខាងលើនេះ លោកជំទាវរដ្ឋលេខាធិការបានបង្ហាញពីស្ថានភាពនៃបន្ទុកជំងឺមិនឆ្លងនៅកម្ពុជា និងកិច្ចខិតខំប្រឹងប្រែងអនុវត្តផែនការយុទ្ធសាស្ត្រសុខាភិបាលជាតិ ​២០១៦-២០២០​ និងផែនការសកម្មភាពពហុវិស័យជាតិ ស្តីពីការការពារនិងការប្រយុទ្ធនឹងជំងឺ មិនឆ្លង ឆ្នាំ២០១៨-២០២៧ របស់ក្រសួងសុខាភិបាល​ផងដែរ​ និងបានលេីកឡេីងថា​ វិស័យសុខាភិបាល ជាវិស័យមួយដែលសម្រេចបាននូវគោលដៅអភិវឌ្ឍន៍សហស្សវត្ស ដែលបានដាក់ចេញដោយរាជរដ្ឋាភិបាលកម្ពុជា និងនៅថ្នាក់សកល (MDGs 4, 5 and 6) មុនកាលកំណត់​ ក្រោមការដឹកនាំរបស់ឯកឧត្តមសាស្ត្រាចារ្យ ម៉ម ប៊ុនហេង រដ្ឋមន្ត្រីក្រសួងសុខាភិបាល និងមន្រ្តីក្រោមឱវាទទាំងអស់។ លោកជំទាវរដ្ឋលេខាធិការ ក៏បានវាយតម្លៃខ្ពស់លើការអភិវឌ្ឍន៍និងទំនាក់ទំនងល្អរវាង ឥណ្ឌានិងកម្ពុជា ក្រោមកិច្ចសហប្រតិបត្តិការ ក្នុងវិស័យ​ ដែលផ្តល់អត្ថប្រយោជន៍ជាក់ស្តែងជូនដល់ប្រជាជននៃប្រទេសទាំងពីរ ជាពិសេសលើការកសាងធនធានមនុស្ស និងបច្ចេកវិទ្យាសុខាភិបាល។ លោកជំទាវរដ្ឋលេខាធិការនិងគណៈប្រតិភូ ក៏បានពិនិត្យមេីលនិងស្វែងយល់បន្ថែមទៀតនូវបច្ចេកវិទ្យាវេជ្ជសាស្ត្រទំនេីបពីការតាំងពិព័ណសម្ភារ:បរិក្ខាពេទ្យនានានៅឯកិច្ចប្រជុំខាងលេីនេះផងដែរ។

ព័ត៌មានទទួលបានពីគណ:ប្រតិភូនៅទីក្រុងញូដេលីនៃប្រទេសឥណ្ឌា។

ឯកឧត្តមសាស្រ្តាចារ្យ ម៉ម ប៊ុនហេង រដ្ឋមន្ដ្រីក្រសួងសុខាភិបាល ជំរុញដល់ភាគីពាក់ព័ន្ធត្រូវរួមគ្នាបន្ដការងារកាន់តែសកម្ម ដើម្បីឈានទៅលុបបំបាត់ជំងឺគ្រុនចាញ់នៅឆ្នាំ២០២៥ ក្នុងទិវាជាតិប្រយុទ្ធនឹងជំងឺគ្រុនចាញ់ ក្រោមប្រធាបបទ «គ្មានជំងឺគ្រុនចាញ់ ផ្តើមចេញពីខ្ញុំ»

(កោះញែក មណ្ឌលគិរី) ៖ ថ្ងៃចន្ទ ៣រោច ខែចេត្រ ឆ្នាំកុរ ឯកស័ក ព.ស.២៥៦២ ត្រូវនឹងថ្ងៃទី២២ ខែមេសា ឆ្នាំ២០១៩ ទិវាជាតិ ប្រយុទ្ធនឹងជំងឺគ្រុនចាញ់ ត្រូវបានប្រារព្ធធ្វេីឡេីង ក្រោមអធិបតីភាពឯកឧត្តមសាស្ដ្រាចារ្យ ម៉ម ប៊ុនហេង រដ្ឋមន្ដ្រីក្រសួងសុខភិបាល ដោយមានការអញ្ជើញចូលរួមពីលោកវេជ្ជ បណ្ឌិត តាក់កេ ស៊ីកាសៃ នាយកអង្គការសុខភាពពិភពលោកប្រចាំតំបន់ ប៉ាស៊ីហ្វិកខាងលិច ឯកឧត្តម លោកជំទាវ រដ្ឋលេខាធិការ អនុរដ្ឋលេខាធិការ អគ្គនាយកបច្ចេកទេសសុខាភិបាល អគ្គនាយករដ្ឋបាលនិងហិរញ្ញវត្ថុ ប្រធាននាយកដ្ឋាន មកពីក្រសួងសុខាភិបាល មជ្ឈមណ្ឌលជាតិប្រយុទ្ធនឹង ជំងឺគ្រុនចាញ់ ប៉ារ៉ាស៊ីតសាស្រ្ត និងបាណកសាស្រ្ត និងអន្តរក្រសួង ព្រមទាំងឯកឧត្តម ស្វាយ សំអ៊ាង អភិបាលនៃ គណៈអភិបាលខេត្តមណ្ឌលគិរី ប្រធានមន្ទីរសុខាភិបាលខេត្តទាំងអស់ មន្ទីរចំណុះសាលាខេត្ត កងប្រដាប់អាវុធ លោកគ្រូ អ្នកគ្រូ សិស្សានុសិស្ស ប្រជាពលរដ្ឋ តំណាងអង្គការសុខភាពពិភពលោកប្រចាំប្រទេសកម្ពុជា ព្រមទាំង អង្គការដៃគូសុខាភិបាលពាក់ព័ន្ធ (PSI, HPA, PFD, CRS, MC, MORU, PFD, CHAI, IPC, PSM/USAID, PMI/USAID, MSF, AFRIM, NAMRU2, CARE) បានចូលរួម សរុបប្រមាណ ១៥០០ នាក់។

នៅក្នុងពិធីដ៏មានសារ:សំខាន់នេះ ឯ.ឧ. រដ្ឋមន្ត្រីក្រសួងសុខាភិបាល បានអានខ្លឹមសារដើមទាំងស្រុងនៃសារលិខិតរបស់ សម្តេចអគ្គមហា សេនាបតីតេជោ ហ៊ុន សែន នាយករដ្ឋមន្រ្តីនៃ ព្រះរាជាណាចក្រកម្ពុជា សម្រាប់ទិវាប្រយុទ្ធនឹងជំងឺគ្រុនចាញ់ក្នុងគោលបំណង ដើម្បីជំរុញ និងបំផុសការយល់ដឹង ឲ្យយកចិត្តទុកដាក់កាន់តែខ្ពស់បន្ថែមទៀតក្នុងការលុបបំបាត់ជំងឺគ្រុនចាញ់សំដៅលើកកំពស់សុខុមាលភាពនិងសុខភាពប្រជាពលរដ្ឋកម្ពុជា។ ជំងឺគ្រុនចាញ់មិនត្រឹមតែធ្វើឲ្យប៉ះពាល់ដល់សុខភាព ចំណាយលុយកាក់ ខាតបង់ការងារ បាត់បង់ផលិតភាព និងអាយុជីវិតប៉ុណ្ណោះទេ ប៉ុន្តែថែមទាំងបង្កផលប៉ះពាល់ជាអវិជ្ជមានដល់ការអភិវឌ្ឍនសង្គម-សេដ្ឋកិច្ចដ៏ធ្ងន់ធ្ងរទៀតផង។ ដូច្នេះ យើងត្រូវយកចិត្តទុកដាក់ខ្ពស់ទាំងអស់គ្នា លើបញ្ហាជំងឺគ្រុនចាញ់ ដើម្បី លើកកំពស់សុខភាព គុណភាពនៃការរស់នៅ និងសេចក្តីថ្លៃថ្នូររបស់ប្រជាពលរដ្ឋយើង សមស្រប នឹងដំណើរវិវត្តន៍ នៃសភាពការណ៍សង្គម-សេដ្ឋកិច្ចរបស់កម្ពុជា ដែលកំពុង អភិវឌ្ឍនតាមព្រំដែន និងអេកូទេសចរធម្មជាតិព្រៃភ្នំ។ ឯកឧត្តមសាស្ដ្រាចារ្យរដ្ឋមន្ត្រីក្រសួងសុខាភិបាល បានថ្លែងបន្ដថា “យើងត្រូវបន្តការខិតខំ និងត្រូវតែយកចិត្តទុកដាក់អនុវត្តថែមទៀតក្នុងការបង្ការជំងឺគ្រុនចាញ់ដោយឲ្យមានការចែក និងប្រើប្រាស់មុងជ្រលក់ថ្នាំឲ្យបានត្រឹមត្រូវ ដោយចាត់ទុកថា មុងគឺជាអាយុជីវិតរបស់ខ្លួន បើទោះបីទៅណា គឺត្រូវតែសំរាន្តក្នុងមុងជ្រលក់ថ្នាំ ហើយត្រូវប្រើប្រាស់មុងឲ្យបានគ្រប់ៗគ្នា ជាពិសេសសម្រាប់បងប្អូនដែលចល័តពីកន្លែងមួយទៅកន្លែងមួយ ដែលទៅធ្វើការនៅតំបន់ព្រៃភ្នំប្រឈមនឹងការឆ្លងជំងឺគ្រុនចាញ់។ ប្រសិនបើមានការសង្ស័យកើតជំងឺគ្រុនចាញ់ ត្រូវ ប្រញាប់ស្វែងរកសេវាធ្វើតេស្តឈាមនៅមូលដ្ឋានុខាភិបាលសាធារណៈឲ្យបានឆាប់រហ័សដែលនៅជិតបំផុតតាមរយៈ អ្នកស្ម័គ្រចិត្តភូមិ មណ្ឌលសុខភាព និងមន្ទីរពេទ្យ ដើម្បី ពិនិត្យព្យាបាលជំងឺគ្រុនចាញ់ទាន់ពេលវេលា ” ។ ហេតុនេះខេត្តទាំងអស់ ត្រូវរួមសហការគ្នា ជាពិសេសមន្ទីរសុខាភិបាលខេត្ត អាជ្ញាធរដែនដី និងអង្គការដៃគូសុខាភិបាលក្នុងខេត្តនីមួយៗ ចាំបាច់ត្រូវអនុវត្តផែនការយុទ្ធសាស្រ្តជាតិលុបបំបាត់ជំងឺគ្រុន ចាញ់អោយមានប្រសិទ្ធភាពខ្ពស់ ដើម្បីឈានលុបបំបាត់គ្រុនចាញ់ អោយខានតែបាននៅឆ្នាំ២០២៥។

ក្នុងឱកាសនេះផងដែរ លោកវេជ្ជបណ្ឌិត តាក់កេស៊ី កាសៃ នាយកអង្គការសុខភាពពិភពលោកប្រចាំតំបន់ប៉ាស៊ីហ្វិកខាងលិច បានសំដែងដោយសេចក្តីរីករាយថា ប្រទេសកម្ពុជា ការសំរេចបានជាលើកដំបូង គឺ គ្មានអ្នកស្លាប់ដោយសារជំងឺគ្រុនចាញ់នាឆ្នាំ២០១៨ និងបានកាត់បន្ថយករណីជំងឺគ្រុនចាញ់សរុបចំនួន ៤២% នៅចន្លោះឆ្នាំ ២០១២ និងឆ្នាំ ២០១៦។ លោកវេជ្ជបណ្ឌិតបានមានប្រសាសន៍ទៀតថា តាមរយៈការ ទស្សនកិច្ចនៅប្រទេសកម្ពុជានេះ លោកវេជ្ជបណ្ឌិតបានសំដែងការពេញចិត្តយ៉ាងខ្លាំង ចំពោះក្រសួងសុខាភិបាល ដែលបានពន្លឿនកិច្ចខិតខំប្រឹងប្រែងគួរអោយកោតសរសើររបស់ខ្លួនលើការលុបបំបាត់ជំងឺគ្រុនចាញ់។ អង្គការ សុខភាពពិភពលោកនឹងបន្តផ្តល់ការគាំទ្រយ៉ាងពេញទំហឹង និងធ្វើការយ៉ាងជិតស្និទ្ធជាមួយក្រសួងសុខាភិបាល ក្នុងការបង្កើតគោលនយោបាយ និងឯកសារណែនាំជាយុទ្ធសាស្រ្តជំរុញការវិនិយោគ និងកិច្ចខិតខំប្រឹងប្រែង ដើម្បីលុបបំបាត់ជំងឺគ្រុនចាញ់។ តាមរយ:លទ្ធផលទាំងអស់នេះ លោកវេជ្ជបណ្ឌិត មានជំនឿយ៉ាងមុតមាំថា ប្រទេសកម្ពុជានឹងលុបបំបាត់ជំងឺគ្រុនចាញ់បានតាមផែនការគ្រោងទុកស្ថិតក្នុងដំណាក់ចុងក្រោយដែលខ្សែបន្ទាត់លុបបំបាត់ជំងឺគ្រុនចាញ់ផ្តាច់ព្រាត់នៅនឹងចំពោះមុខយើងនេះ លោកវេជ្ជបណ្ឌិត មានវត្តមាននៅទីនេះ នាឱកាសនេះ ដើម្បីធានាចំពោះមុខអ្នកទាំងអស់គ្នាថា អង្គការសុខភាពពិភពលោកនឹងបន្តគាំទ្រដល់ប្រទេសកម្ពុជា រូមជាមួយដៃគូរសុខាភិបាលទាំងអស់ក្នុងការងារលុបបំបាត់ជំងឺគ្រុនចាញ់គ្រប់ជំហ៊ាននៅលើមាគ៌ាឆ្ពោះទៅកាន់ការសម្រេចគោលដៅនាពេលខាងមុខនេះ។

ទន្ទឹមនឹងនេះផងដែរ ឯកឧត្តម ស្វាយ សំអ៊ាង អភិបាល នៃគណៈអភិបាលខេត្តមណ្ឌលគិរី ក៏បានជម្រុញ បន្ថែមដល់អង្គភាពមន្ទីរជុំវិញខេត្តទាំងអស់ រួមសហការគ្នា ជាពិសេសមន្ទីរសុខាភិបាលខេត្ត និងអង្គការ ដៃគូសុខាភិបាលក្នុងខេត្ត អនុវត្តផែនការយុទ្ធសាស្រ្តជាតិលុបបំបាត់ជំងឺគ្រុនចាញ់អោយមានប្រសិទ្ធ ភាពខ្ពស់ ដើម្បីឈានទៅលុបបំបាត់ជំងឺគ្រុនចាញ់នៅ ក្នុងខេត្តមណ្ឌលគិរីឲ្យបាននៅឆ្នាំ២០២៥។

ព័ត៌មានទទួលបានពីមជ្ឍមណ្ឌលជាតិប្រយុទ្ធនឹងំងឺគ្រុនចាញ់ ប៉ារ៉ាសុីតសាស្ត្រ និងបាណកសាស្ត្រ នៃក្រសួងសុខាភិបាល។

សេចក្តីថ្លែងអំណរគុណរបស់ក្រសួងសុខាភិបាល៖

ឯកឧត្តមសាស្ត្រាចារ្យ ម៉ម ប៊ុនហេង រដ្ឋមន្ត្រីក្រសួងសុខាភិបាល ព្រមទាំងថ្នាក់ដឹកនាំក្រសួងសុខាភិបាលទាំងអស់ ក្នុងនាមក្រសួងសុខាភិបាល សូមសំដែងនូវការកោតសរសេីរនិងថ្លែងអំណរគុណយ៉ាងជ្រាលជ្រៅជាទីបំផុត ជូនដល់ថ្នាក់ដឹកនាំ បុគ្គលិក និងលោកគ្រូ-អ្នកគ្រូពេទ្យទាំងអស់នៅតាមមូលដ្ឋានសុខាភិបាលសាធារណ:នៅទូទាំងព្រះរាជាណាចក្រកម្ពុជា ដែលបានខិតខំលះបង់ពេលវេលាផ្ទាល់ខ្លួនទាំងមិនបានសម្រាកនៅជួបជុំក្រុមគ្រួសារនាអំឡុងពេលបុណ្យចូលឆ្នាំប្រពៃណីជាតិខ្មែរនេះ ផ្តល់សេវាពិនិត្យនិងព្យាបាលជំងឺជូនដល់ប្រជាពលរដ្ឋដែលមានបញ្ហាសុខភាព បានយ៉ាងល្អប្រសេីរក្នុងភាពទទួលខុសត្រូវខ្ពស់ ហេីយឯកឧត្តម លោកជំទាវ លោក-លោកស្រីប្រធានមន្ទីរពេទ្យជាតិទាំងអស់និងប្រធានមន្ទីរសុខាភិបាលរាជធានី-ខេត្តទាំង២៥ ក៏បានចាត់ចែងដឹកនាំរៀបចំការផ្តល់សេវាសង្គ្រោះបន្ទាន់នៅតាមទីតាំងរៀងៗខ្លួនបានយ៉ាងរលូននិងមានប្រសិទ្ធិភាពខ្ពស់។ សូមកោតសរសេីរ និងប្រសិទ្ធិពរជ័យជូនដល់លោកគ្រូពេទ្យ-អ្នកគ្រូពេទ្យទាំងអស់ នូវពរជ័យសិរីសួស្តី ជ័យមង្គល វិបុលសុខគ្រប់ប្រការ និងមានសុខភាពល្អទាំងអស់គ្នា ដេីម្បីបន្តបេសកកម្មផ្តល់សេវាសុខាភិបាល ឲ្យកាន់តែល្អប្រសេីរ ប្រកបដោយសមធ៌ម ប្រសិទ្ធិភាព និងគុណភាព។ សូមអរគុណ និងសួរស្តីឆ្នាំថ្មី!

លោកជំទាវវេជ្ជបណ្ឌិត ឱ វណ្ណឌីន រដ្ឋលេខាធិការក្រសួងសុខាភិបាលនិងជាអ្នកនាំពាក្យក្រសួងសុខាភិបាលនៃព្រះរាជាណាចក្រកម្ពុជា

ការធានាគុណភាព សុវត្ថិភាព និងប្រសិទ្ធិភាពរបស់ឱសថដែលទទួលបានការអនុញ្ញាតអោយចរាចរណ៍នៅក្នុងព្រះរាជាណាចក្រកម្ពុជាគឺជាការងារចម្បង និងមានសារៈសំខាន់ចាំបាច់ក្នុងការលេីកកម្ពស់គុណភាពសេវាសុខាភិបាល៖

នាថ្ងៃសុក្រ ៩រោច ខែផល្គុន ឆ្នាំច សំរឹទ្ធិស័ក ព.ស ២៥៦២ ត្រូវនឹងថ្ងៃទី២៩ ខែមីនា ឆ្នាំ២០១៩ លោកជំទាវវេជ្ជបណ្ឌិត ឱ វណ្ណឌីន រដ្ឋលេខាធិការក្រសួងសុខាភិបាល បានអញ្ជើញជាអធិបតីចូលរួមបិទសិក្ខាសាលាថ្នាក់ជាតិស្តីពី ការត្រួតពិនិត្យគុណភាពឱសថលើទីផ្សារ ដល់មន្ត្រីសុខាភិបាលមកពីនាយកដ្ឋានឱសថ មជ្ឈមណ្ឌលជាតិពិសោធន៍សុខាភិបាល មជ្ឈមណ្ឌលជាតិកំចាត់រោគរបេង និងហង់សិន មជ្ឈមណ្ឌលជាតិប្រយុទ្ធនឹងជំងឺអេដស៏ សើស្បែក និងកាមរោគ ឃ្លាំងឱសថកណ្តាល និងលោក លោកស្រី ជាភ្នាក់ងារត្រួតពិនិត្យឱសថ មកពីមន្ទីរសុខាភិបាលរាជធានី ខេត្តចំនួន១២ ដែលសិក្ខាសាលានេះរៀបចំឡើងដោយនាយកដ្ឋាន ឱសថ ចំណីអាហារ បរិក្ខាពេទ្យ និងគ្រឿងសម្អាង នៃក្រសួងសុខាភិបាល សហការជាមួយអង្គការសុខភាពពិភពលោក និង USP Global Public Health Asia ។ លោកជំទាវរដ្ឋលេខាធិការ បានលើកឡើងថាគុណភាពឱសថមានទំនាក់ទំនងគ្នាយ៉ាងជិតស្និទ្ធទៅនឹងគុណភាពនៃការព្យាបាល បើឱសថមិនមានគុណភាពត្រឹមត្រូវតាមបទដ្ឋាទបច្ចេកទេសទេនោះ គុណភាពនៃការព្យាបាលមិនអាចទទួលបានជោគជ័យឡើយ ទោះបីជា គ្រូពេទ្យនោះមានជំនាញនិងពូកែយ៉ាងណាក៏ដោយ។ ឱសថអន់គុណភាព ប៉ះពាល់យ៉ាងធ្ងន់ធ្ងរដល់សុខភាពសាធារណៈ ក៏ដូចជាប៉ះពាល់ដល់សេដ្ឋកិច្ចគ្រួសារ និងសេដ្ឋកិច្ចជាតិផងដែរ។ ក្រសួងសុខាភិបាលតែងតែយកចិត្តទុកដាក់ និងគាំទ្រយ៉ាងសកម្ម ដល់សកម្មភាពគ្រប់គ្រង និងតាមដានគុណភាពឱសថក្នុងប្រទេសកម្ពុជា ជាក់ស្តែង ចំពោះឱសថដែលបានអនុញ្ញាតឲ្យដាក់លក់ ឬចរាចរណ៍ លើទីផ្សាហើយនោះ ក្រសួងសុខាភិបាលបានចាត់ឲ្យភ្នាក់ងារត្រួតពិនិត្យឱសថ ចុះត្រួតពិនិត្យជាប្រចាំ និងទិញឱសថពីទីផ្សារ ដើម្បីយកមកវិភាគគុណភាពឡើងវិញ ហើយបានចាត់វិធានការចំពោះឱសថណាដែលមានគុណភាពមិនត្រឹមត្រូវតាមបទដ្ឋានបច្ចេកទេស។ សិក្ខាសាលានេះបានផ្តល់ចំណេះដឹងអំពីការប្រើប្រាស់ឧបករណ៍សម្រាប់កំណត់មុខឱសថ និងទីតាំងដែលត្រូវធ្វើការស្រង់ឱសថដោយផ្អែកលើហានិភ័យ។ បើយើងអនុវត្តតាមឧបករណ៍នេះយើងនឹងជ្រើសរើសបាន មុខឱសថ និងទីតាំងដែលត្រូវចុះស្រង់បានចំគោលដៅ ដោយប្រើប្រាស់ថវិកាតិច និងចំណេញពេលវេលា។ សិក្ខាសាលានេះ ក៏បានកែលម្អផងដែរនូវពិធីសារសម្រាប់ការតាមដានគុណភាពឱសថ ឲ្យស្របតាមស្ថានភាពជាក់ស្តែងក្នុងប្រទេសបច្ចុប្បន្ន។
ក្នុងឱកាសនេះតំណាងអង្គការ USP Global Public Health Asia លោកបណ្ឌិត Souly Phanouvong បានលើកឡើងថាទោះបីជាមានការយកចិត្តទុកដាក់ក្នុងការពង្រឹងគុណភាពឱសថយ៉ាងណាក៏ដោយ ឱសថអន់គុណភាព នៅតែមាននៅលើទីផ្សារ និងជាកង្វល់សុខភាពជាសកល ដែលតែងតែបង្កគ្រោះថ្នាក់ដល់ជីវិត និងបង្កអោយមានភាពស៊ាំនៃឱសថប្រឆាំងនឹងមេរោគ។ សិក្ខាសាលាស្តីពីការត្រួតពិនិត្យឱសថនៅលើទីផ្សារដោយយោងទៅតាមហានិភ័យ បានចូលរួមចំណែកដល់ការពារ ការរកឲ្យឃើញ និងការចាត់វិធានការអោយបានឆាប់ចំពោះឱសថក្លែងក្លាយ និងអន់គុណភាព ដែលសិក្ខាសាលានៅកម្ពុជានាពេលនេះជាគំរូ សម្រាប់ប្រទេសក្នុងតំបន់។ តំណាងអង្គការសុខភាពពិភពលោកអញ្ជេីញមកពីទីក្រុងហ្សឺណែវ ប្រទេសស្វីស លោកស្រី Diana Aram Lee (Technical Officer, Substandard and Falsified Medical Products Group) បានបញ្ជាក់បន្ថែមថាបញ្ហាឱសថក្លែងក្លាយ និងអន់គុណភាពមិនមែនជាបញ្ហាដែលមាននៅតែប្រទេសណាមួយនោះទេ ប៉ុន្តែវាជាបញ្ហដែលកើតមានឡើងជាសកលដែលយើងត្រូវតែរួមគ្នាដោះស្រាយ។ អង្គការសុខភាពពិភពលោកមានការប្តេជ្ញាចិត្តក្នុងការពង្រឹងសម្ថភាព មន្ត្រីភ្នាក់ងារត្រួតពិនិត្យឱសថ រួមបញ្ចូលទាំងការគាំទ្រលើសកម្មភាពត្រួតពិនិត្យឱសថនៅលើទីផ្សារផងដែរ។

ដើម្បីធានាឲ្យបាននូវគុណភាព សុវត្ថិភាព និងប្រសិទ្ធិភាពរបស់ឱសថ លោកជំទាវរដ្ឋលេខាធិការក្រសួងសុខាភិបាល បានបន្ថែមថា ការងារត្រួតពិនិត្យគុណភាពឱសថនេះ តម្រូវឲ្យមានការចូលរួមពីផ្នែកពាក់ព័ន្ធដែលបានទទួលការបណ្តុះបណ្តាលនាពេលនេះរួចហេីយ និងបានណែនាំដូចតទៅ៖
− នាយកដ្ឋានឱសថ ចំណីអាហារ បរិក្ខារពេទ្យ និងគ្រឿងសំអាង និងមន្ទីរសុខាភិបាលរាជធានី/ខេត្ត ត្រូវធ្វើការចុះត្រួតពិនិត្យឲ្យបានទៀងទាត់ជាប់ជាប្រចាំ ដល់ គ្រឹះស្ថានផលិតឱសថ គ្រឹះស្ថានអាហរ័ណ នីហរ័ណឱសថ និងគ្រឹះស្ថានលក់ឱសថ ទៅតាមភារកិច្ច នៅតាមដែនសមត្ថកិច្ចរបស់ខ្លួន។
− នាយកដ្ឋានឱសថ ចំណីអាហារ បរិក្ខារពេទ្យ និងគ្រឿងសំអាង និងកម្មវិធីជាតិនានា ដែលធ្វើការត្រួតពិនិត្យ គុណភាពឱសថលើទីផ្សារ ត្រូវធ្វើការកំណត់មុខឱសថ និងទីតាំង ស្រង់ឱសថ ដោយផ្អែកតាមចំណាត់ថ្នាក់ហានិភ័យ។
− មជ្ឈមណ្ឌលជាតិពិសោធន៍សុខាភិបាលត្រូវបន្តពង្រឹងសមត្ថភាពក្នុងការត្រួតពិនិត្យគុណភាពឱសថ រួមទាំងឱសថបុរាណ ឱសថបំប៉នសុខភាព និងគ្រឿងសំអាងផងដែរ។
– ក្នុងឱកាសនេះ ខ្ញុំសូមអំពាវនាវដល់ប្រជាពលរដ្ឋទាំងអស់ត្រូវជៀសវាងការប្រើប្រាស់ឱសថ តាមគ្នាដោយគ្មានវេជ្ជបញ្ជាត្រឹមត្រូវ និងឱសថដែលលក់តាមបណ្តាញសង្គម និងគេហទំព័រ ព្រោះឱសថទាំងនេះពុំមានសុវត្ថិភាពឡើយ ប៉ុន្តែវាធ្វើឲ្យបងប្អូនខាតបង់ថវិកា ពន្យាពេលវេលានៃការព្យាបាល និងអាចបណ្តាលឲ្យមានគ្រោះថ្នាក់ដល់ជីវិតថែមទៀតផង។
ឆ្លៀតក្នុងឱកាសនេះ លោកជំទាវរដ្ឋលេខាធិការក្រសួងសុខាភិបាល បានពាំនាំនូវការកោតសរសើរពីសំណាក់ឯកឧត្តម សាស្ត្រាចារ្យ ម៉ម ប៊ុនហេង រដ្ឋមន្ត្រីក្រសួងសុខាភិបាល ដល់ការខិតខំប្រឹងប្រែងកន្លងមករបស់មន្ត្រីសុខាភិបាលគ្រប់ជាន់ថ្នាក់ និងដៃគូពាក់ព័ន្ធទាំងអស់ ដែលធ្វើឲ្យវិស័យមួយនេះមានវឌ្ឍន:ភាពគួរជាទីមោទន: ។

មុននឹងបញ្ចប់ លោកជំទាវរដ្ឋលេខាធិការក្រសួងសុខាភិបាល បានស្នេីសុំដល់អង្គការសុខភាពពិភពលោកនិងអង្គការ USP Global Public Health Asia ជួយបន្តការបណ្តុះបណ្តាលដល់មន្ត្រីទទួលខុសត្រូវត្រួតពិនិត្យផ្នែកឱសថនៃខេត្តដែលនៅសល់ចំនួន១៣ទៀត ដេីម្បីអាចអនុវត្តការងារដ៏សំខាន់នេះបានគ្រប់ខេត្តនៅក្នុងព្រះរាជាណាចក្រកម្ពុជា។

ព័ត៌មានទទួលបានពីការិយាល័យនិយ័តកម្មនៃនាយកដ្ឋានឱសថ ចំណីអាហារ បរិក្ខារពេទ្យ និងគ្រឿងសំអាងនៃក្រសួងសុខាភិបាល។

ឯកឧត្តមសាស្ត្រាចារ្យ ម៉ម ប៊ុនហេង រដ្ឋមន្ត្រីក្រសួងសុខាភិបាល បានណែនាំឲ្យមន្ទីរសុខាភិបាលរាជធានី-ខេត្តទាំងអស់ ត្រៀមលក្ខណ:ទុកជាមុនដោយមានផែនការត្រឹមត្រូវសម្រាប់អន្តរាគមន៌និងផ្តល់សេវាសុខភាពជូនប្រជាពលរដ្ឋប្រសិនបើមានគ្រោះមហន្តរាយទឹកជំនន់ក្នុងរដូវភ្លៀងដែលកំពុងតែធ្លាក់មកជាបន្តបន្ទាប់។

រដូវភ្លៀងបានមកដល់ហើយក៏កំពុងតែបង្អោរធ្លាក់មកយ៉ាងខ្លាំងនៅតាមតំបន់មួយចំនួន ដែលនឹងអាចមានទឹកជំនន់កើតមានឡើងនៅក្នុងឆ្នាំនេះ បើយោងតាមការព្យាករណ៌ឧតុនិយមលើអាកាសធាតុ និងយោងតាមបទពិសោធន៌ពីគ្រោះមហន្តរាយដោយសារទឹកជំនន់នាឆ្នាំមុនៗ។ ដើម្បីត្រៀមលក្ខណ:ទុកជាមុន ឯកឧត្តមសាស្ត្រាចារ្រ ម៉ម ប៊ុនហេង រដ្ឋមន្ត្រីក្រសួងសុខាភិបាល បានផ្តាំផ្ញើណែនាំឲ្យមន្ទីរសុខាភិបាលរាជធានី-ខេត្តទាំងអស់ រៀបចំផែនការត្រឹមត្រូវសម្រាប់គ្រប់គ្រងកាត់បន្ថយនូវហានិភ័យដោយសារទឹកជំនន់ និងជួយអន្តរាគមន៌ផ្តល់សេវាសុខភាពជូនប្រជាពលរដ្ឋឲ្យបានទាន់ពេលវេលា ប្រសិនបើមានគ្រោះមហន្តរាយទឹកជំនន់កើតមានឡើងក្នុងរដូវភ្លៀងដែលកំពុងតែធ្លាក់មកជាបន្តបន្ទាប់នៅក្នុងឆ្នាំនេះ។

នេះជាការលើកឡើងរបស់លោកជំទាវវេជ្ជបណ្ឱិត ឱ វណ្ណឌីន អគ្គនាយកបច្ចេកទេសសុខាភិបាលនិងជាអ្នកនាំពាក្យក្រសួងសុខាភិបាលនៃព្រះរាជាណាចក្រកម្ពុជា ដែលបានថ្លែងពាំនាំនូវអនុសាសន៌ណែនាំរបស់ឯកឧត្តមរដ្ឋមន្ត្រីក្រសួងសុខាភិបាលជូនថ្នាក់ដឹកនាំនិងមន្ត្រីទទួលបន្ទុកការងារគ្រោះមហន្តរាយនៃមន្ទីរសុខាភិបាលរាជធានី-ខេត្តទាំងអស់ នៅក្នុងឱកាសអញ្ជើញចូលរួមជាអធិបតីក្នុងពិធីបើកសិក្ខាសាលាពង្រឹងសមត្ថភាពសហគមន៍ស្តីពី ការកាត់បន្ថយផលប៉ះពាល់សុខភាពដោយសាការប្រែប្រួលអាកាសធាតុ តាមរយៈការគ្រប់គ្រង និង ការកាត់បន្ថយហានិភ័យគ្រោះមហន្តរាយ នាព្រឹកថ្ងៃពុធ ៧រោច ខែបឋមាសាឍ ឆ្នាំចរ ព.ស.២៥៦២ ត្រូវនឹងថ្ងៃទី ០៤ ខែកក្គដា ឆ្នាំ ២០១៨ នៅសណ្ឋាគារហូលីដេ ទីរួមខេត្តបាត់ដំបង។ លោកជំទាវ បានគូសបញ្ជាក់និងពន្យល់ណែនាំដល់សិក្ខាកាមទាំងអស់ផងដែរថា ៖
១. គោលបំណងនៃការជួបជុំគ្នានាថ្ងៃនេះ គឺដើម្បីផ្តល់ចំណេះដឹងនិងពង្រឹងសមត្ថភាពបន្ថែមទៀតដល់មន្រ្តីសុខាភិបាលលើការគ្រប់គ្រងហានិភ័យគ្រោះមហន្តរាយ ព្រមទាំងការត្រៀមរៀបចំផែនការពាក់ព័ន្ធនឹងការជួយអន្តរាគមន៌សុខភាពនៅពេលមានទឹកជំនន់។
២. ការប្រែប្រួលអាកាសធាតុជាបាតុភូតឌីណាមិកផងនិងបាតុភូតប្រព្រឹត្តកម្មដោយសារមនុស្សផងហើយសូម្បីតែមនុស្សក៏មានការប្រែប្រួលខ្លួនពីទារក ទៅកុមារ ទៅពេញវ័យ ទៅវ័យចាស់ជរា។ ក៏ដូចគ្នានេះដែរ កត្តាធម្មជាតិក៏មានការ ប្រែប្រួលផងដែរ ប៉ុន្តែវាមានលំនាំផ្សេងៗគ្នា មានកត្តាធម្មជាតិ និងកត្តាមនុស្ស៖
-កត្តាធម្មជាតិដូចជា ទឺកជំនន់ គ្រោះរាំងស្ងួត និងខ្យល់កន្រ្តាក់ រន្ទះបាញ់ជាដើម ។
-កត្តាមនុស្សដូចជាការអភិវឌ្ឍន៍ឆាប់រហ័ស លើឧស្សាហកម្ម ដែលអាចមានការបច្ចេញនូវឧស្ម័នបំពុលបរិស្ថាន និងឧស្ម័នដែលអាចធ្វើឲ្យឡើងកំដៅផែនដី ការសាងសង់អាគារធំៗដែលអាចនឹងមានការទុកដាក់កាកសំណល់ និងការបង្ហូរទឹកស្អុយពុំបានត្រឹមត្រូវ និងខ្វះការ ប្រុងប្រយ័ត្នធ្វើឱ្យប៉ះពាល់ដល់បរិស្ថាន និងសុខភាពជាដើម។
៣. បានទាញចំណាប់អារម្មណ៍ដល់សិក្ខាមឱ្សយកចិត្តទុកដាក់ទៅលើគ្រោះទឹកជំនន់ ព្រោះរដូវនេះជារដូវវស្សាអាចនឹងទទួលរងនូវទឹកជំនន់ ហើយនៅពេលដែលមានទឹកជំនន់ធ្វើឱ្សមានបញ្ហាសុខភាពដូចជា ជំងឺបង្ករឡើងដោយសារទឹកមិនស្អាត ការពុលចំណីអាហារ ជំងឺរាគ អាសន្នរោគ ជំងឺដែលបង្ករឡើងដោយភ្នាក់ងារចម្លងមាន គ្រុនចាញ់ គ្រុនឈាម និងជំងឺរមាស់ ភ្នែកក្រហម រលាកផ្លូវដង្ហើម របួសដោយសារការប៉ះទង្គិចនឹងវត្ថុផ្សេងៗ ពស់ចឹក លង់ទឹក និងវិបត្តិផ្លូវចិត្តផងដែរ។
៤. អ្នកដែលងាយរងគ្រោះជាងគេគឺ ស្រ្តី មានផ្ទៃពោះ កុមារ មនុស្សចាស់ និងជនពិការ ដូច្នេះហើយលោកជំទាវអគ្គនាយកបានផ្តល់អនុសាន៍ ដល់សិក្ខាកាមដែលជាប្រធានការិយាល័យស្រុកប្រតិបត្តិ និងប្រធានមណ្ឌលសុខភាព ត្រូវយកចិត្តទុកដាក់រៀបចំផែនការត្រៀមឆ្លើយតប រួមមាន ទីទួលសុវត្ថភាព ទឹកស្អាត ក្រុមគ្រូពេទ្យ សម្ភារៈបរិក្ខា ថ្នាំពេទ្យ សម្រាប់ជួយសង្គ្រោះជនរងគ្រោះដោយ សារទឹកជំនន់ជាពិសេស ការអប់រំ សុខភាពនិងសុវត្ថិភាពចំណីអាហារ និងសុខភាពផ្លូវចិត្ត។
៥. ត្រូវផ្តលនូវសេវាសុខភាពជូនប្រជាពលរដ្ឋរងគ្រោះប្រសិនបើទោះជាមានទឹកជំនន់កើតមានឡើងក៏ដោយ ព្រោះប្រជាពលរដ្ឋនឹងអាចមានបម្លាស់ទីទៅនៅតាមទីទួលសុវត្ថិភាព។
៦. សេវាពិនិត្យផ្ទៃពោះ និងចាក់ថ្នាំបង្ការដល់កុមារ គឺត្រូវតែធ្វើជាចាំបាច់ ដោយក្រុមគ្រូពេទ្យចល័តទៅដល់ទីស្នាក់នៅរបស់ពួកគាត់។
៧. ទីបញ្ចប់លោកជំទាវ បានសំនូមពរ សុំឱ្យសិក្ខាកាមជួយពាំនាំនូវអនុសាន៍ទាំងអស់ទៅជម្រាបជូនដល់ថ្នាក់ដឹកនាំរបស់ខ្លួន គឺត្រូវរៀបចំផែនការដើម្បីឆ្លើយតបឱ្យបានទាន់ពេល និងសូមឱ្យបញ្ជូនសិក្ខាកាមជាស្ត្រីដែលមាន សមត្ថភាពមកចូលរួម ឱ្យបានច្រើនក្នុងវគ្គបណ្តុះបណ្តាលនិងសិក្ខាសាលា លើកក្រោយៗ ដើម្បីបញ្ជ្រាបយេនឌ័រក្នុងការងារគ្រប់គ្រងគ្រោះមហន្តរាយ ដោយសារការ ប្រែប្រួលអាកាសធាតុ។

សិក្ខាសិលានេះ មានការអញ្ជើញចូលរួមពីតំណាងគណកម្មការគ្រប់គ្រងគ្រោះមហន្តរាយ តំណាងសម្ព័ន្ធភាពប្រែប្រួលអាកាសធាតុនៃក្រសួងបរិស្ថាន ថ្នាក់ដឹកនាំនិងមន្ត្រីទទួលបន្ទុកការងារគ្រប់គ្រងគ្រោះមហន្តរាយនៃនាយកដ្ឋានការពារសុខភាពរបស់ក្រសួងសុខាភិបាល បុគ្គលិកមន្ត្រីសុខាភិបាលមកពីខេត្តចំនួន១៥ និងតំណាងអង្គការសុខភាពពិភពលោកផងដែរ។

ព័ត៌មានទទួលបានពីនាយកដ្ឋានការពារសុខភាពនៃក្រសួងសុខាភិបាល។

ថ្លែងនៅក្នុងសន្និសីទសារព័ត៌មាន ស្តីពីប្រទេសកម្ពុជាបានសម្រេចគោលដៅជាតិ និងតំបន់ប៉ាស៊ីហ្វិកខាងលិចក្នុងការប្រយុទ្ធនឹងជំងឺរលាកថ្លើមប្រភេទបេ លើកុមារ នៅទីស្តីការក្រសួងសុខាភិបាល នារសៀលថ្ងៃសុក្រ ១០ រោច ខែជេស្ឋ ឆ្នាំច សំរឺទ្ធិស័ក ព.ស. ២៥៦២ ត្រូវនឹងថ្ថ្ងៃទី០៨ ខែមិថុនា ឆ្នាំ២០១៨ ឯកឧត្តមសាស្រ្តាចារ្យ ម៉ម ប៊ុនហេង រដ្ឋមន្រ្តីក្រសួងសុខាភិបាល (ដោយមានការចូលរួមពីសំនាក់លោកវេជ្ជបណ្ឌិត Liu Yunguo តំណាងអង្គការសុខភាពពិភពលោក ប្រចាំនៅកម្ពុជា និងលោកស្រី Natascha Paddison នាយិការងអង្គការយូនីសេហ្វ ប្រចាំនៅកម្ពុជា លោកជំទាវវេជ្ជបណ្ឌិត ឱ វណ្ណឌីន អគ្គនាយកបច្ចេកទេសសុខាភិបាល លោកស្រីសាស្ត្រាចារ្យ ទុង រដ្ឋាវី ប្រធានមជ្ឍមណ្ឌលជាតិគាំពារមាតានិងទារក និងឯកឧត្តម លោកជំទាវជាថ្នាក់ដឹកនាំក្រសួងសុខាភិបាល មន្ត្រី បុគ្គលិកសុខាភិបាល ព្រមទាំងដៃគូអភិវឌ្ឍសុខាភិបាល) បានប្រកាសថា “​ប្រទេសកម្ពុជា ត្រូវបានអង្គការសុខភាពពិភពលោក ទទួលស្គាល់ថាជាប្រទេសបានសម្រេច គោលដៅជាតិ និងតំបន់ប៉ាស៊ីហ្វិកខាងលិចក្នុងការប្រយុទ្ធនឹងជំងឺរលាកថ្លើមប្រភេទបេ លើកុមារ’ ដែលសមិទ្ធិផលដ៏គួរឲ្យមោទនៈនេះ គឺបានមកពីការគាំទ្រសព្វបែបយ៉ាង និងការយកចិត្តទុកដាក់ខ្ពស់លើសុខភាពមាតា ទារកនិងកុមារ ព្រមទាំងប្រជាជនទូទៅ របស់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា និងសម្តេចកិត្តិព្រឹទ្ធបណ្ឌិត ប៊ុនរ៉ានី ហ៊ុនសែន។ ឯកឧត្តមរដ្ឋមន្ត្រី ក៏បានបន្តទៀតថា ៖ នៅមុនឆ្នាំ២០០៥ មុនពេលបញ្ចូលវ៉ាក់សាំងការពារជំងឺរលាកថ្លើមប្រភេទបេ ទៅក្នុងកម្មវិធី ផ្តល់ថ្នាំបង្ការនៅកម្ពុជាមានការឆ្លងរាលដាលជំងឺរលាកថ្លើមប្រភេទបេ ជាច្រើន។ តាមការប៉ាន់ស្មាន របស់អង្គការសុខភាពពិភពលោក និងតាមការអង្កេតជាច្រើនបានបង្ហាញថា អត្រាផ្ទុកវីរុសរលាកថ្លើម ប្រភេទបេ ក្នុងចំណោមប្រជាជនទូទៅមានប្រមាណចន្លោះពី៥% ទៅ ១០%។
នៅឆ្នាំ២០០៦ ការអង្កេតមួយធ្វើឡើងដោយវិទ្យាស្ថានជាតិសុខភាពសាធារណៈ កម្មវិធីជាតិផ្តល់ថ្នាំបង្ការ និងមានការគាំទ្រដោយអង្គការសុខភាពពិភពលោក និងអង្គការ PATH នៅទូទាំង ប្រទេសទៅលើកុមារអាយុក្រោម៥ឆ្នាំ។ លទ្ធផលបានបង្ហាញថា ប្រេវ៉ាឡង់នៃជំងឺរលាកថ្លើមប្រភេទបេ លើកុមារមាន ៣.៥%។ នៅឆ្នាំ២០១១ ការអង្កេតមួយបានធ្វើឡើងដោយសាកលវិទ្យាល័យវិទ្យាសាស្ត្រសុខាភិបាល និងគាំទ្រដោយអង្គការសុខភាពពិភពលោក ទៅលើកុមារអាយុ៥ឆ្នាំ នៅក្នុងរាជធានីភ្នំពេញ-ខេត្ត ក្រចេះ និងរតនគីរី។ លទ្ធផលបានបង្ហាញថា ប្រេវ៉ាឡង់នៃជំងឺរលាកថ្លើមប្រភេទបេលើកុមារមានភាពខុសប្លែកគ្នាទៅតាមរាជធានី-ខេត្ត ដោយនៅរាជធានីភ្នំពេញប្រេវ៉ាឡង់នៃជំងឺរលាកថ្លើមប្រភេទបេ លើកុមារមានត្រឹមតែ ០.៣៣% នៅខេត្តក្រចេះមាន ១.៤១% និងនៅខេត្តរតនគីរី មានរហូតដល់ ៣.៤៥%។

ក្រោមការដឹកនាំដ៏ឈ្លាសវៃ និងប្រកបដោយគតិបណ្ឌិតរបស់ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា ប្រទេសកម្ពុជាបានប្រឹងប្រែងយ៉ាងខ្លាំងក្នុងការកាត់បន្ថយការចម្លងវីរុសរលាកថ្លើមប្រភេទបេ តាមរយៈការបញ្ចូលវ៉ាក់សាំងការពារជំងឺរលាកថ្លើមប្រភេទបេ ទៅក្នុងកម្មវិធីជាតិផ្តល់ថ្នាំបង្ការនៅទូទាំងប្រទេសនាឆ្នាំ២០០៥។ ចាប់ពីពេលនោះមក វ៉ាក់សាំងការពារជំងឺរលាកថ្លើមប្រភេទបេ ត្រូវបានផ្តល់ដល់ទារកចាប់ពីពេលកើត (ក្នុងអំឡុងពេល២៤ម៉ោង) និងផ្តល់ជាបន្តបន្ទាប់ចំនួន៣ដូសបន្ថែមទៀត នៅពេលទារកមានអាយុ ៦ សប្តាហ៍ ១០សប្តាហ៍ និង១៤សប្តាហ៍។ ការផ្តល់ថ្នាំបង្ការជំងឺដល់ទារក និងកុមារ ជាសកម្មភាពអទិភាពចម្បងដែលមន្ត្រី បុគ្គលិកសុខាភិបាលទាំងអស់គ្រប់ជាន់ថ្នាក់អនុវត្តយ៉ាងសកម្មដោយមានការគាំទ្រពីអង្គការដៃគូអភិវឌ្ឍន៍ និងមានការចូលរួមពីសហគមន៍ និងអជ្ញាធរមូលដ្ឋាន។ ជាលទ្ធផល អត្រាគ្របដណ្តប់នៃការផ្តល់ថ្នាំបង្ការជំងឺរលាកថ្លើមប្រភេទបេ មានការកើនឡើងគួរឱ្យកត់សំគាល់ ដោយអត្រាគ្របដណ្តប់នៃការផ្តល់ថ្នាំបង្ការនៅពេល២៤ម៉ោង ក្រោយកើតកើនពី២៤% នៅឆ្នាំ២០០៥ ដល់ ៧១% នៅឆ្នាំ២០១០ និង៨៤% នៅឆ្នាំ២០១៧។ ឯអត្រាគ្របដណ្តប់នៃការផ្តល់ថ្នាំបង្ការ៣ដូសទៀត កើនពី៨៣% នៅឆ្នាំ២០០៥ ដល់៩២% នៅឆ្នាំ២០១០ និង៩៨% នៅឆ្នាំ២០១៧។

ផ្អែកតាមលទ្ធផលនេះ អង្គការសុខភាពពិភពលោកបានស្នើឱ្យមានការអង្កេតស្រាវជ្រាវម្តងទៀត ដើម្បីវាយតម្លៃប្រេវ៉ាឡង់ជំងឺរលាកថ្លើមប្រភេទបេលើកុមារនៅកម្ពុជា ធៀបទៅនឹងគោលដៅ តំបន់របស់អង្គការសុខភាពពិភពលោក ដែលបានកំណត់កាត់បន្ថយប្រេវ៉ាឡង់ជំងឺរលាកថ្លើមប្រភេទ បេ ក្នុងចំណោមកុមារឱ្យនៅតិចជាង១% នៅឆ្នាំ២០១៧។ ការអង្កេតត្រូវបានធ្វើឡើងដោយសាកល វិទ្យាល័យហ៊ីរ៉ូស៊ីម៉ា អង្គការសុខភាពពិភពលោក US-CDC និងសាកលវិទ្យាល័យវិទ្យាសាស្ត្រសុខាភិបាល។ ជាលទ្ធផល ប្រេវ៉ាឡង់ជំងឺរលាកថ្លើមប្រភេទបេ លើកុមារមានត្រឹមតែ ០.៥៦% ប៉ុណ្ណោះ។
លទ្ធផលដែលបានពីការអង្កេតនេះ ត្រូវបានពិនិត្យដោយក្រុមការងារវាយតម្លៃឯករាជ្យមួយ (Regional Independent Verification Panel) ដឹកនាំដោយលោកវេជ្ជបណ្ឌិត John Ward នាយកកម្មវិធីលុបបំបាត់ជំងឺរលាកថ្លើមដោយវីរុស/ក្រុមការងារសុខភាពសកល លោកវេជ្ជបណ្ឌិត Jong-Hyun Kim សាស្ត្រាចារ្យនៅសាកលវិទ្យាល័យកាតូលិកកូរ៉េ និងលោកវេជ្ជបណ្ឌិត Mark Kane ទីប្រឹក្សាបច្ចេកទេសផ្នែកវ៉ាក់សាំងរបស់អង្គការសុខភាពពិភពលោក។
ក្រុមការងារវាយតម្លៃនេះបានធ្វើការសន្និដ្ឋានថា ប្រទេសកម្ពុជាបានសម្រេចគោលដៅជាតិ និងគោលដៅតំបន់ប៉ាស៊ីហ្វិកខាងលិច ក្នុងការប្រយុទ្ធនឹងជំងឺរលាកថ្លើមប្រភេទបេ លើកុមារ។
ខ្ញុំសូមថ្លែងអំណរគុណយ៉ាងជ្រាលជ្រៅជាទីបំផុតជូនចំពោះ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា និងសម្តេចកិតិ្តព្រឹទ្ធបណ្ឌិត ប៊ុន រ៉ានី ហ៊ុនសែន ដែលតែងតែផ្តល់នូវការគាំទ្រសព្វបែបយ៉ាងលើសុខភាពមាតា ទារក និងកុមារ ជាពិសេស និងដល់ប្រជាជនកម្ពុជាទូទៅ និយាយជារួម ដែលធ្វើឲ្យក្រសួងសុខាភិបាលអាចសម្រេចបាននូវសមិទ្ធផលជាច្រើន។ ជាក់ស្តែងថ្ងៃនេះ កម្ពុជាទទួលបាននូវការបញ្ជាក់ពីអង្គការសុខភាពពិភពលោកថា ប្រទេសកម្ពុជាបានសម្រេចតាមគោលដៅប្រយុទ្ធនឹងជំងឺរលាកថ្លើមប្រភេទបេ នៅឆ្នាំ២០១៧នេះ ជាសក្ខីភាពជាក់ស្តែង។
ខ្ញុំក៏សូមថ្លែងអំណរគុណដល់ថ្នាក់ដឹកនាំ មន្ត្រី បុគ្គលិកសុខាភិបាលគ្រប់ជាន់ថ្នាក់ ព្រមទាំងអាជ្ញាធរមូលដ្ឋាន ស្ថាប័នពាក់ព័ន្ធ និងដៃគូអភិវឌ្ឍសុខាភិបាលទាំងអស់ ដែលបានខិតខំធ្វើសកម្មភាព និងផ្តល់ការគាំទ្រលើកម្មវិធីជាតិផ្តល់ថ្នាំបង្ការ ដែលធ្វើឲ្យប្រេសកម្ពុជាសម្រេចបាននូវសមិទ្ធផលនាថ្ងៃនេះ។
ខ្ញុំសូមថ្លែងអំណរគុណជាអនេកដល់មាតា បិតា និងអាណាព្យាបាលទាំងអស់ ដែលបាននាំបុត្រា បុត្រី មកទទួលថ្នាំបង្ការជំងឺរលាកថ្លើមប្រភេទបេ។ ខ្ញុំសូមជំរុញឲ្យមាតា បិតា និងអាណាព្យាបាលទាំងអស់បន្តនាំកូន ចៅមកទទួលថ្នាំបង្ការបន្តទៀតឲ្យបានគ្រប់មុខទៅតាមកម្មវិធីថ្នាក់ជាតិ។

ភ្ជាប់មកជាមួយនេះ នូវសេចក្តីប្រកាសព័ត៌មានស្តីពីប្រទេសកម្ពុជាបានសម្រេចគោលដៅជាតិ និងតំបន់ប៉ាស៊ីហ្វិកខាងលិចក្នុងការប្រយុទ្ធនឹងជំងឺរលាកថ្លើមប្រភេទបេ លើកុមារ របស់ក្រសួងសុខាភិបាលជាភាសាខ្មែរនិងផាសាអង់គ្លេស។

ព័ត៌មានទទួលបានពីអ្នកនាំពាក្យក្រសួងសុខាភិបាលនៃព្រះរាជាណាចក្រកម្ពុជា។

នាថ្ងៃព្រហស្បត៌ ១១ រោច ខែពិសាខ ឆ្នាំច សំរឹទ្ធិស័ក ព.ស.២៥៦២ ត្រូវនឹងថ្ងៃទី១០ ខែឧសភា ឆ្នាំ២០១៨ វេលាម៉ោង ០៨:០០ ព្រឹក នៅមន្ទីរពេទ្យមិត្តភាពខ្មែរ-សូវៀត ឯកឧត្តមសាស្រ្តាចារ្យ ម៉ម ប៊ុនហេង រដ្ឋមន្រ្តីក្រសួងសុខាភិបាល បានអញ្ជើញជាអធិបតីរួមជាមួយ ឯកឧត្តម សុង បូ ឯកអគ្គរដ្ឋទូតវិសាម័ញ្ញនិងពេញសមត្ថភាពនៃ សាធារណរដ្ឋប្រជាមានិតចិន ប្រចាំព្រះរាជាណាចក្រកម្ពុជា ក្នុងពិធីប្រគល់-ទទួលរថយន្តគ្លីនិកចល័ត ចំនួន២០គ្រឿង លើកដំបូង ដែលជាជំនួយឥតសំណងរបស់សាធារណរដ្ឋប្រជាមានិតចិន ជូនក្រសួងសុខាភិបាលនៃព្រះរាជាណាចក្រកម្ពុជា។

ឯកឧត្តមរដ្ឋមន្រ្តីក្រសួងសុខាភិបាបានមានប្រសាសន៍ថា តាមគំនិតផ្តួចផ្តើមរបស់មេដឹកនាំកំពូលនៃប្រទេសយើងទាំងពីរ គឺ សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្រ្ដីនៃព្រះរាជាណាចក្រកម្ពុជា និង ឯកឧត្តម ស៊ី ជីងពីង ប្រធានាធិបតីនៃសាធារណរដ្ឋប្រជាមានិតចិន លិខិតប្តូរសារស្តីពីការផ្តល់គ្លីនិកចល័តចំនួន៤០គ្រឿង រវាងរាជរដ្ឋាភិបាលកម្ពុជានិងរដ្ឋាភិបាលនៃសាធារណរដ្ឋប្រជាមានិតចិន ត្រូវបានចុះហត្ថលេខានាថ្ងៃទី០៩ ខែវិច្ឆិកា ឆ្នាំ២០១៧។ ការផ្គត់ផ្គង់រថយន្តគ្លីនិកចល័តនេះ ត្រូវបានធ្វើជាពីរដំណាក់កាល គឺដំណាក់កាលទី១ ភាគីមិត្តចិនប្រគល់ចំនួន២០គ្រឿង ឱ្យក្រសួងសុខាភិបាលនាពេលនេះ។ រីឯ ២០គ្រឿងទៀត ភាគីមិត្តចិននឹងផ្តល់ជូនក្នុងតំណាក់កាលទី២ នៅពេលវេលាសមស្រប បន្ទាប់ពីទទួលបានព័ត៌មានត្រឡប់ពីការប្រើប្រាស់រថយន្តគ្លីនិកចល័តទាំង២០គ្រឿងនៃដំណាក់កាលទី១។ រថយន្ត ចំនួន២០គ្រឿង ក្នុងតំណាក់កាលទី២ នឹងត្រូវបញ្ជូនមកកម្ពុជាយ៉ាងយូរបំផុតត្រឹមថ្ងៃទី៣១ ខែតុលា ឆ្នាំ២០១៨។

ឯកឧត្តមរដ្ឋមន្រ្តី ក៏បានគូសបញ្ជាក់បន្ថែមថា គ្លីនិកចល័តនេះ ត្រូវបានបំពាក់ដោយសម្ភារៈបរិក្ខារពេទ្យ មានដូចជា ម៉ាស៊ីនកាំរស្មីអ៊ិចឌីជីថល អេកូឌីជីថល ឧបករណ៍វិភាគទឹកនោម ឧបករណ៍វិភាគឈាម ម៉ូនីទ័រតាមដានគភ៌ទារក និងម្តាយ ជញ្ជីងថ្លឹងទម្ងន់ និងវាស់កម្ពស់ ឧបករណ៍ឆែកមុខងារសួត ឧបករណ៍វិភាគជីវគីមីដោយស្វ័យប្រវត្តិ (Electrocardiograph, Binocular Handheld Slit Lamp Microscope, General type hanging diagnosis System, Digital Electronic Colposcope) ឧបករណ៍ពិនិត្យសុដន់អ៊ីនហ្រ្វារ៉េដ កញ្ចប់ឧបករណ៍ផ្នែករោគស្រ្តី កញ្ចប់ឧបករណ៍ផ្នែកវះកាត់ទូទៅ ត្រចៀក ច្រមុះ បំពង់ក កៅអីព្យាបាលធ្មញ ម៉ាស៊ីនខ្យល់កំចាត់មេរោគ មីក្រូទស្សន៍ជីវសាស្រ្ត ឧបករណ៍កំចាត់មេរោគ ទូទឹកកកវេជ្ជសាស្រ្ត និងគ្រឿងបន្លាស់សរុប ៥% នៃសម្ភារៈបរិក្ខារពេទ្យទាំងអស់។ គ្លីនិកចល័តទាំងនេះនឹងត្រូវបានបែងចែកទៅឱ្យមន្ទីរសុខាភិបាលរាជធានី-ខេត្តទាំង២៥ ដើម្បីប្រើប្រាស់ក្នុងការផ្ដល់សេវាពិនិត្យ ព្យាបាលដល់ប្រជាពលរដ្ឋ ដែលនឹងចូលរួមចំណែកបង្ខិតសេវាសុខាភិបាលឱ្យកាន់តែជិតប្រជាពលរដ្ឋ ប្រកបដោយគុណភាព សុវត្ថិភាព និងប្រសិទ្ធភាព។
ឯកឧត្តមរដ្ឋមន្រ្តី បានថ្លែងអំណរគុណយ៉ាងជ្រាលជ្រៅដល់រដ្ឋាភិបាល នៃសាធារណរដ្ឋប្រជាមានិតចិន ប្រជាជនចិន ហើយអំណោយដ៏ថ្លៃថ្លានាពេលនេះ នឹងចូលរួមចំណែកលើកកម្ពស់សុខភាព និងគុណភាពជីវិតប្រជាជនកម្ពុជា ស្របតាមគោលនយោបាយរបស់រាជរដ្ឋាភិបាលកម្ពុជា។

ឯកឧត្តមឯកអគ្គរដ្ឋទូតចិន បានមានប្រសាសន៍ថា ជំនួយគ្លីនិកចល័តនេះជាជំនួយក្រៅប្រទេសទី១ របស់សាធារណរដ្ឋប្រជាមានិតចិន ហើយដែលបានផ្តល់ជូនកម្ពុជា និងសូមសំណូមពរដល់មន្រ្តីសុខាភិបាលកម្ពុជា ប្រើប្រាស់ ព្រមទាំងថែទាំគ្លីនិកចល័តទាំងនេះឱ្យមានប្រសិទ្ធិភាពខ្ពស់។

ព័ត៌មានទទួលបានពីនាយកដ្ឋានសហប្រតិបត្តិការអន្តរជាតិនៃក្រសួងសុខាភិបាល។

សេចក្តីជូនព័ត៌មាន អំពីសកម្មភាពចូលរួមរបស់ឯកឧត្តមសាស្ត្រាចារ្យ ម៉ម ប៊ុនហេង រដ្ឋមន្ត្រីក្រសួងសុខាភិបាល និងលទ្ធផលសន្និសីទអន្តរជាតិថ្នាក់រដ្ឋមន្ត្រី ស្តីពីសុវត្ថិភាពអ្នជំងឺលើកទី៣ ពីថ្ងៃទី១៣ ដល់ទី១៤ ខែមេសា ឆ្នាំ២០១៨ ៖

នាថ្ងៃសុក្រ ១៣រោច ខែចេត្រ ឆ្នាំរកា នព្វស័ក ព.ស.២៥៦១ និងថ្ងៃសៅរ៌ ១៤រោច ខែចេត្រ ឆ្នាំចរ សំរិទ្ធិស័ក ព.ស.២៥៦២ ត្រូវនឹងថ្ងៃទី១៣-១៤ ខែមេសា ឆ្នាំ២០១៨ ឯកឧត្តមសាស្ត្រាចារ្យ ម៉ម ប៊ុនហេង រដ្ឋមន្ត្រីក្រសួងសុខាភិបាល អមដំណើរដោយលោកជំទាវវេជ្ជបណ្ឌិត ឱ វណ្ណឌីន អគ្គនាយកបច្ចេកទេសសុខាភិបាល និងលោកវេជ្ជបណ្ឌិត ស៊ុង វិនត: ប្រធាននាយកដ្ឋានសហប្រតិបត្តិការអន្តរជាតិនៃក្រសួងសុខាភិបាល បានអញ្ជើញចូលរួមសន្និសីទអន្តរជាតិថ្នាក់រដ្ឋមន្ត្រី ស្តីពីសុវត្ថិភាពអ្នជំងឺលើកទី៣ ដែលបានប្រព្រឹត្តទៅនៅទីក្រុងតូក្យូ ប្រទេសជប៉ុន ដែលមានគណ:ប្រតិភូនៃបណ្តាប្រទេសចំនួន៤២ ដឹកនាំដោយឯកឧត្តម លោកជំទាវ ជារដ្ឋមន្ត្រីក្រសួងសុខាភិបាលមកពីគ្រប់តំបន់លើសាកលលោក គណ:ប្រតិភូនៃអង្គការសុខភាពពិភពលោក និងអង្គការអន្តរជាតិនានា នៅលើសាកលលោក និងដៃគូនានា សរុបប្រមាណជា ៥០០នាក់ បានអញ្ជើញចូលរួម។

សន្និសីទអន្តរជាតិថ្នាក់រដ្ឋមន្ត្រីនេះ បានរៀបចំជាដំបូងនៅប្រទេសអង់គ្លេស លើកទី២នៅប្រទេសអាល្លឺម៉ង់ និងលើក ទី៣ គឺប្រទេសជប៉ុនទទួលធ្វើជាម្ចាស់ផ្ទះ។ សន្និសីទលើកទី៣នេះ ត្រូវបានរៀបចំឡើងក្នុងគោលបំណងដើម្បីលើកកម្ពស់សុខភាពនិងដាក់បញ្ចូលសារសំខាន់នៃសុវត្ថិភាពអ្នកជំងឺនៅក្នុងមូលដ្ឋានសុខាភិបាល ដែលផលិតចេញបានពីអង្គសន្និសីទក្នុងរយ:ពេល២ថ្ងៃ ទៅក្នុងប្រព័ន្ធសុខាភិបាលរបស់ប្រទេសនីមួយៗនៅទូទាំងពិភពលោក ព្រមទាំងលើកកម្ពស់កិច្ចសហប្រតិបត្តិការ ចែករំលែកបទពិសោធន៌ ព័ត៌មាន និងដំណោះស្រាយនានាជុំវិញប្រធានបទនៃអង្គសន្និសីទនេះផងដែរ។

ថ្ងៃទី១នៃអង្គសន្និសីទ មានការជួបប្រជុំឧត្តមមន្ត្រី អ្នកជំនាញការ ទីប្រឹក្សានិងអ្នកបច្ចេកទេសសុខាភិបាល ដោយមានធ្វើបទបង្ហាញនិងពិភាគ្សា ដាក់ចេញនូវសារសំខាន់ៗពាក់ព័ន្ធទៅនឹងបញ្ហាសុវត្ថិភាពអ្នកជំងឺ ហើយដាក់ជូនកិច្ចប្រជុំថ្នាក់រដ្ឋមន្ត្រីនៅថ្ងៃទី២នៃសន្និសីទអន្តរជាតិ ដែលឯកឧត្តមសាស្ត្រាចារ្យ ម៉ម ប៊ុនហេង រដ្ឋមន្ត្រីក្រសួងសុខាភិបាល បានអញ្ជើញចូលរួមដោយបានថ្លែងបទអន្តរាគមន៌ផ្តោតលើចំណុចសំខាន់ៗដូចតទៅ៖
១. ការយកចិត្តទុកដាក់ដ៏ខ្ពង់ខ្ពស់បំផុតនិងការដាក់ចេញនូវគោលនយោបាយជាតិគាំពារសុខភាពសង្គមរបស់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា លើការផ្តល់សេវាសុខភាពជាសាកលសម្រាប់ប្រជាជនកម្ពុជា ជាពិសេសការផ្តល់សេវាសុខភាពដោយរដ្ឋជាអ្នកចេញថ្លៃសេវាជំនួសតាមរយ:មូលនិធិសមធ៌ម សម្រាប់ជនក្រីក្រ និងបេឡាជាតិសន្តិសុខសង្គមសម្រាប់កម្មករ-កម្មការិនីក្នុងនិងក្រៅប្រព័ន្ធ អ្នកធាក់សុីក្លូ សមាជិក-ជិកាក្រុមប្រឹក្សាភូមិ-ឃុំ-សង្កាត់ មន្ត្រីសាធារណ: មន្ត្រីធ្វើសកម្មភាពដោះមីន អតីតយុទ្ធជន ជនពិការ និវត្តន៌ជន ជនចាស់ជរាគ្មានទីពឹង និងការផ្តល់សាច់ប្រាក់ផ្ទាល់ជូនដល់ស្រ្តីសម្រាលកូន ជាដើម ដែលជាការចូលរួមចំណែកផងដែរលើការគិតគូរពីសុវត្ថិភាព និងសុខភាពអ្នកជំងឺរបស់រាជរដ្ឋាភិបាលកម្ពុជា
២. បទពិសោធន៌ដែលកម្ពុជាបានអនុវត្តគោលនយោបាយសុវត្ថិភាពអ្នកជំងឺ និងការកែលម្អគុណភាពសេវាសុខាភិបាល ដោយបានដាក់បញ្ចូលរួចហើយនូវបញ្ហាសុវត្ថិភាពអ្នកជំងឺ និងអ្នកផ្តល់សេវា ទៅក្នុងប្រព័ន្ធសុខាភិបាលកម្ពុជា
៣. តួនាទីរបស់គ្រូពេទ្យនិងការបង្កើននូវសុវត្ថិភាពអ្នកជំងឺនៅក្នុងបរិបទដែលក្រសួងសុខាភិបាលកម្ពុជា ក៏ដូចជាសាកលលោក កំពុងអនុវត្តន៌ការផ្តល់សេវាសុខភាពជាសាកល។

បន្ថែមលើនេះ ឯកឧត្តមរដ្ឋមន្ត្រីក្រសួងសុខាភិបាល សាស្ត្រាចារ្យ ម៉ម ប៊ុនហេង បានផ្តល់ជាអនុសាសន៌ជូនអង្គសន្និសីទលើចំណុចសំខាន់ៗ ដូចខាងក្រោមនេះ ៖
១. ត្រូវរៀបចំឲ្យមានជាផ្នែក “សុវត្ថិភាពអ្នកជំងឺនិងអ្នកផ្តល់សេវា” នៅក្នុងប្រព័ន្ធសុខាភិបាល ដូចជាការបង្កើតឲ្យមានគណ:កម្មការសុវត្ថិភាពនិងគុណភាពអ្នកជំងឺនិងអ្នកផ្តល់សេវា ជាដើម
២. បង្កើតនូវវប្បធ៌មរាយការណ៌ដោយតម្លាភាពសម្រាប់អ្នកជំងឺនិងអ្នកផ្តល់សេវា
៣. បង្កើតនូវប្រព័ន្ធទទួលស្គាល់គុណភាពសម្រាប់មូលដ្ឋានសុខាភិបាល ដើម្បីធានាគុណភាពនិងសុវត្ថិភាពសេវាខ្ពស់ដែលត្រូវផ្តល់ជូនអ្នកជំងឺ
៤. រៀបចំឲ្យមានឫធ្វើបច្ចុប្បន្នភាព ច្បាប់និងបទដ្ឋានគតិយុទ្ធ គោលការណ៌ណែនាំ និងឧបករណ៌ឫសម្ភារ:វាយតម្លៃ ដែលពាក់ព័ន្ធនឹងសុវត្ថិភាពអ្នកជំងឺក្នុងគ្រប់ទម្រង់នៃប្រព័ន្ធសុខាភិបាល
៥. ត្រូវអភិវឌ្ឍន៌ផែនការសកម្មភាពសម្រាប់គុណភាពនិងសុវត្ថិភាព ព្រមទាំងតាមដានការអនុវត្តជាប្រចាំនៅតាមថ្នាក់និមួយៗនៃប្រព័ន្ធសុខាភិបាល
៦. បញ្ជ្រាបចូលទៅក្នុងកម្មវិធីបណ្តុះបណ្តាលទាំងមុននិងក្រោយធ្វើការនូវប្រធានបទសុវត្ថិភាពអ្នកជំងឺនិងអ្នកផ្តល់សេវា
៧. រៀបចំឲ្យមានកិច្ចប្រជុំជាប្រចាំឆ្នាំលើ “សុវត្ថិភាពអ្នកជំងឺនិងអ្នកផ្តល់សេវា” ដើម្បីចែករំលែកបទពិសោធន៌ វឌ្ឍនភាពនិងបញ្ហាប្រឈមពីបណ្តាប្រទេសលើសាកលលោក ព្រមទាំងផ្តល់អនុសាសន៌សម្រាប់ការអនុវត្តបន្ត
៨. ចាត់តាំងឲ្យមានជាជនបង្គោលសម្រាប់ប្រទេសនិមួយៗ សម្រាប់ទំនាក់ទំនងផ្សារភ្ជាប់ជាមួយបណ្តាញសាកលលោកលើសុវត្ថិភាពអ្នកជំងឺនិងអ្នកផ្តល់សេវា
៩. ធ្វើឲ្យបានល្អប្រសើរឡើងនូវប្រព័ន្ធព័ត៌មានដើម្បីធានាថាការសម្រេចចិត្តណាមួយ ត្រូវបានធ្វើឡើងដោយមានទិន្នន័យត្រឹមត្រូវយកជាការបាន។

គួរកត់សម្គាល់ថា មានការជួបប្រជុំដោយឡែកជាលក្ខណ:ទ្វេភាគី រវាង ឯកឧត្តមរដ្ឋមន្ត្រីក្រសួងសុខាភិបាល សាស្ត្រាចារ្យ ម៉ម ប៊ុនហេង ជាមួយសមភាគីជប៉ុន ឯកឧត្តម កាត់ស៊ូណូប៊ូ កាតូ រដ្ឋមន្ត្រីក្រសួងសុខាភិបាល ការងារ និងសុខុមាលភាពនៃប្រទេសជប៉ុន ( H.E. Mr. Katsunobu Kato, Minister of Health, Labour and Welfare, Japan) ដើម្បីពង្រឹងកិច្ចសហប្រតិបត្តិការលើវិស័យសុខាភិបាល រឹតចំណងមិត្តភាពរវាងប្រទេសទាំងពីរ ដែលទទួលបានលទ្ធផលល្អ ដោយភាគីជប៉ុននឹងបន្តជួយដល់វិស័យសុខាភិបាលកម្ពុជាជាបន្តទៀត។ ឯកឧត្តមរដ្ឋមន្ត្រី ម៉ម ប៊ុនហេង ក៏បានឆ្លៀតពេលដ៏មមាញឹកជួបជាលក្ខណ:ផ្ទាល់ៗ ជាមួយបណ្តាប្រទេសមួយចំនួនទៀត ដើម្បីពង្រឹងចំណងទំនាក់ទំនងជាមួយបណ្តាប្រទេសទាំងនោះផងដែរ។

អង្គសន្និសីទបានបញ្ចប់ទៅដោយជោគជ័យ នៅថ្ងៃ១៤ រោច ខែចេត្រ ឆ្នាំចរ សំរិទ្ធិស័ក ព.ស.២៥៦២ ត្រូវនឹងនៅថ្ងៃទី១៤ ខែមេសា ឆ្នាំ២០១៨ ដោយបានចេញសេចក្តីប្រកាសទីក្រុងតូក្យូស្តីពីសុវត្ថិភាពអ្នកជំងឺ ដែលមានខ្លឹមសារជាសង្ខេបដូចខាងក្រោមនេះ៖
– បញ្ជាក់នូវការប្តេជ្ញាចិត្តយ៉ាងខ្លាំងក្លាដើម្បីអនុវត្តន៌ “សកម្មភាពរួមជាសាកលលើសុវត្ថិភាពអ្នកជំងឺ“ នៃបណ្តាប្រទេសលើសាកលលោក ដោយយកចិត្តទុកដាក់ដាក់បញ្ចូលជាអាទិភាពក្នុងគោលនយោបាយនិងសកម្មភាពសម្រាប់វិស័យសុខាភិបាលនូវសុវត្ថិភាពអ្នកជំងឺក្នុងពេលខិតខំអនុវត្តន៌ការផ្តល់សេវាសុខភាពជាសាកល
– បន្តគាំទ្រអនុវត្តន៌នូវការផ្លាស់ប្តូរក្នុងប្រព័ន្ធនិងការប្រតិបត្តិធ្វើឲ្យបានល្អប្រសើរឡើងនូវសុវត្ថិភាពអ្នកជំងឺ ចូលរួមចំណែកក្នុងការសម្រេចបាននូវសុខភាពសាកលនិងគោលដៅអភិវឌ្ឍន៌ប្រកបដោយចេរភាព
– ពង្រឹងសមត្ថភាពក្នុងការដឹកនាំនិងគ្រប់គ្រងក្នុងការគាំទ្រមជ្ឍមណ្ឌលថែទាំអ្នកជំងឺ ពង្រឹងនិងអនុវត្តដំណើរការប្រព័ន្ធសុវត្ថិភាពអ្នកជំងឺ បង្កើតវប្បធ៌មសុវត្ថិភាព អប់រំបណ្តុះបណ្តាលបុគ្គលិកសុខាភិបាលនិងក្រុមគ្រួសារអ្នកជំងឺ លើផ្នែកសុវត្ថិភាពអ្នកជំងឺ កាត់បន្ថយហានិភ័យ និងចែករំលែកបទពិសោធន៌ល្អៗ ព្រមទាំងគំរូធ្វើបានជោគជ័យលើកិច្ចការនេះ
– សហការជាមួយអ្នកជំងឺនិងក្រុមគ្រួសារដែលមានផលប៉ះពាល់ អង្គការអន្តរជាតិនិងដៃគូនានា បង្កើននូវភាពច្បាស់លាស់ ធ្វើសកម្មភាពរួមគ្នាលើសុវត្ថិភាពអ្នកជំងឺថែមទាំងបង្កើតឲ្យមាន “ ទិវាសាកលលោកសុវត្ថិភាពអ្នកជំងឺប្រចាំឆ្នាំ” ដែលត្រូវប្រព្រឹត្តទៅនៅថ្ងៃទី១៧ ខែកញ្ញា ជារៀងរាល់ឆ្នាំ។

នៅថ្ងៃអាទិត្យ ១៥រោច ខែចេត្រ ឆ្នាំចរ សំរិទ្ធិស័ក ព.ស.២៥៦២ ត្រូវនឹងថ្ងៃទី១៥ ខែមេសា ឆ្នាំ២០១៨ គណ:ប្រតិភូក្រសួងសុខាភិបាលកម្ពុជា ដឹកនាំដោយឯកឧត្តមសាស្ត្រាចារ្យ ម៉ម ប៊ុនហេង រដ្ឋមន្ត្រីក្រសួងសុខាភិបាល នឹងធ្វើដំណើរមាតុភូមិនិវត្តន៌ ហើយនឹងនាំមកនូវផលប្រយោជន៌ជាច្រើនលើកិច្ចសហប្រត្តិបត្តិការសម្រាប់ការអភិវឌ្ឍវិស័យសុខាភិបាលនៃព្រះរាជាណាចក្រកម្ពុជា។

ព័ត៌មានទទួលបានពីលោកជំទាវវេជ្ជបណ្ឌិត ឱ វណ្ណឌីន អគ្គនាយកបច្ចេកទេសសុខាភិបាល និងជាអ្នកនាំពាក្យក្រសួងសុខាភិបាលនៃព្រះរាជាណាចក្រកម្ពុជា។

ថ្ងៃច័ន្ទ ៩រោច ខែចេត្រ ឆ្នាំរកា នព្វស័ក ព.ស.២៥៦១ ត្រូវនឹងថ្ងៃទី០៩ ខែមេសា ឆ្នាំ២០១៨ មន្ទីរសុខាភិបាលខេត្តកំពង់ស្ពឺបានរៀបចំពិធីបិទសន្និបាតបូកសរុបលទ្ឋផលកាងារសុខាភិបាលឆ្នាំ២០១៧ និងលើកទិដៅបន្តឆ្នាំ២០១៨ក្រោមអធិបតីភាពលោកជំទាវសាស្ត្រាចារ្យ តាន់ វួចឆេង រដ្ឋលេខាធិការក្រសួងសុខាភិបាល ដោយមានការអញ្ជើញចូលរួមពីតំណាងគណអភិបាលខេត្ត ថ្នាក់ដឹកនាំ មន្ត្រីនិងបុគ្គលិកមន្ទីរសុខាភិបាលខេត្តកំពង់ស្ពឺ សរុបប្រមាណជាង១០០នាក់ ហើយនៅក្នុងពិធីនេះដែរ លោកជំទាវបានផ្តល់កិត្តយសចែកជូនប័ណ្ណសរសើរចំនួន២៤ លិខិតសរសើរចំនួន៥៧ និងរង្វាន់លើកទឹកចិត្តជាកុំព្យូទ័រនិងព្រីនធ័រចំនួន៥ឈុតជូនល់អង្គភាពចំនួន៥ដែលមានស្នាដៃល្អ ។

ព័ត៌មានទទួលបានពីមន្ទីរសុខាភិបាលខេត្តកំពង់ស្ពឺ។